Bi Phàn Diếu Hồ, kòn cau Dao, kis tàm ƀòn Nậm Lúng, sàh Bản Lang, kơnhoàl Phong Thổ, càr Lai Châu geh 6 nă cau, mơya mìng geh 2 nă cau lơh broă tờm, lơh sa hìu nhă uă nam mìng gơrềng tàm rơlao 5 sào ù sre lơh kòi dùl kàl. Bơh priă dong kờl broă bơtàu tơnguh lơh sa, mpồl bơtiàn tiah làng bol jơi bơtiàn ờ gal cau mờ tiah kơh bơnơm dê, ùr bơklao bi neh tam gơl tam plai màk mờ ròng lơwe ai dà, priă geh bơh tŭ hơ̆ ngai sơlơ gơguh uă rơlao.

Bŭ lah ờ hềt mùl màl tơl ngui tơl sa, mơya ùr bơklao bi lơh ngan lơh sră dan lik bơdìh khà măt hìu rơƀah ƀòn, sàh dê. “Lài do hìu nhă añ gơwèt hìu rơƀah jăt khà măt bơh sàh 4 nam. Nam 2024 là hìu nhă cih is sră lik klàs hìu rơƀah, nàng dà lơgar lời ai priă hơ̆ dong kờl ală hìu kal ke rơlao in”.

Bal mờ hìu bi Phàn Diếu Hồ, tàm càr Lai Châu neh geh uă hìu cih is sră dan lik bơdìh khà măt hìu rơƀah. Tŭ do, nùs nhơm niam làng bol mờ jơnau git tam pà bal kal ke neh lơh geh tàm ală ƀòn tiah làng bol jơi bơtiàn ờ gal cau kis tàm càr do. Ală hìu do ndrờm geh nùs nhơm kơlôi sơnơng niam bơnĕ ngan. “Hìu nhă ờ kờñ kơ̆p gơn tàm broă dong kờl bơh dà lơgar dê, tài sền hờ tơnơ̆ kung gam uă ngan hìu kal ke rơlao mờ hìu añ uă ngan”.

“Añ gam kơnòm, gam pràn, añ pal lơh ngan mờ añ neh cih is sră lik bơdìh hìu rơƀah, nàng lời priă dong kờl bơh dà lơgar ai ală hìu gam kal ke rơlao mờ hìu nhă añ”.

Lài ngan mìng geh ờ uă hìu tàm sàh Bản Lang, mơya srơh cih sră dan lik bơdìh khà măt ală hìu rơƀah tŭ do neh geh tàm uă sàh tàm kơnhoàl dê. Bè tàm sàh tiah kơh bơnơm, tiah nhàr lơgar Sin Suối Hồ, do là tiah mìng geh làng bol kòn cau Mông mờ Dao ơm kis, là tiah gam jơgloh rơƀah ngan càr dê, mơya kơnờm mờ broă tus bal pràn bơh gơnoar atbồ sàh, tàm nam 2024 neh geh rơlao 30 hìu cih is sră geh lik klàs rơƀah, ai khà hìu rơƀah tàm sàh gơmù tŭ do gam rơlao 40%. Ồng Sùng A Lùng, Phó Củ tịc Anih duh broă làng bol sàh Sin Suối Hồ pà git: “Broă cih is sră dan lik klàs rơƀah tàm sàh neh lơh geh uă tus tàm ală hìu ndai tàm ƀòn, tàm sàh. Bơh tŭ do dà lơgar rơ̆p geh tai bơta pràn nàng dong kờl ală hìu nhă ndai mờ là bơta pràn nàng ală hìu neh lik klàs rơƀah lơh ngan brồ guh lơh pas di pal”.

Càr tiah nhàr lơgar Lai Châu geh git tus là tiah rơƀah ngan gùt lơgar dê, mờ khà hìu rơƀah gam rơlao 20%. Lài do, uă hìu làng bol gam geh nùs nhơm kơ̆p gơn tàm broă dong kờl bơh dà lơgar dê. Kơnờm mờ kấp ủy, gơnoar atbồ mờ ală mpồl lơh broă lơh pràn broă mblàng yal, lam sồr mờ lơh jăk ală broă tơrmù rơƀah, den tàng làng bol neh rơhời tơnguh jơnau git wă, lơh ngan brồ guh lik klàs rơƀah.

Jăt jơnau kờp tàm nam 2024, gùt càr geh rơlao 4 rơbô hìu lik klàs rơƀah, tàm hơ̆ geh mờr 500 hìu cih is sră dan lik bơdìh khà măt hìu rơƀah. Kơnhoàl tiah nhàr lơgar Phong Thổ pơn jăt tai là tiah lam lài bè broă tơrmù rơƀah mờ khà làng bol cih is sră dan lik bơdìh khà măt hìu rơƀah.

Mò Mai Thị Hồng Sim, Phó Củ tịc Anih duh broă làng bol kơnhoàl Phong Thổ pà git, nam 2025 do, kơnhoàl lơh ngan tơrmù bơh 4 tus 5% hìu rơƀah, ai khà hìu rơƀah gơmù gam di pơgăp 27%. “Nàng tơl niam ai làng bol in pơn jăt tai lik klàs rơƀah kơl jăp, làng bol kơl jăp rài kis den kơnhoàl ngui jơh ală broă lơh jơnau kờñ dà lơgar dê, bơtàu tơnguh lơh sa mpồl bơtiàn tiah làng bol jơi bơtiàn ờ gal cau mờ tiah kơh bơnơm; broă lơh jơnau kờñ bơtàu tơnguh lơh sa mpồl bơtiàn tơrmù rơƀah kơl jăp mờ bơ̆t bơtàu ƀòn lơgar pa. Mờ kơnhoàl rơ̆p lơh pràn ală broă dong kờl bè broă tơrlòng lơh broă lơh sa, bơtàu tơnguh lơh sa ai làng bol in”.

Broă geh uă làng bol cih is sră dan lik bơdìh hìu rơƀah ờ mìng là cồng nha bơh ală broă dong kờl bơh ală kấp gơnoar atbồ dê, mờ gam là cơng tàng pà gŏ nùs nhơm rơcang lài brồ guh lik klàs rơƀah bơh làng bol kis tàm tiah kơh bơnơm dê. Bơta do neh ai tơngŏ bơta pràn tam klăc bal, lơh ngan, pin dờn tàm dùl rài tơnơ̆ do àng sơrdah niam tàm ù tiah ƀòn lơgar dê.