Cau tàm kâp ủy geh săc rwah pal mùl màl là cau đơng lam cíñ trị, là ala măt ai mpồl cau đảng viên in mờ geh làng bol dòn kơnờm kờñ gơboh, pin dờn…Ală jơnau sồr bơh cau lam bồ Đảng he dê sồr kơnòl broă pal săc rwah kwang bàng mùl màl pơnrơ ai nùs nhơm bồ tơngoh in; mùl màl geh broă lơh jak sơrlèt bơta lòng bơh tŭ tơngai dê; lơh jăt geh gơnoar broă lam dà lơgar mŭt tàm rài bơtàu tơngguh, pas pràn.

Tàm jơnau cih, Tổng Ƀí thư ồng Tô Lâm is ồn sền gròi rơcăng kwang bàng Pơrjum dờng. Bè rơndăp tăp sèng kâp ủy, pal gàr geh bơta đơng lam tơn, tơl làm bơh kâp ủy dê gơ wèt mờ ală ƀòn lơgar, broă kwơmàng; sền gròi bơta niam, ờ gŏ di tài rơndăp tăp sèng mờ tơrmù lơyah jơnau sồr pal geh; ờ duh pal ƀòn lơgar, mpồl, gah lơi kung pal geh cau tus bal kâp ủy; cau tàm kâp ủy geh săc rwah pal mùl màl là cau đơng lam cíñ trị, là ala măt ai mpồl cau đảng viên in mờ geh làng bol dòn kơnờm kờñ gơboh, pin dờn; ală cau tàm kâp ủy pal dipal là cau tàm “mpồl dong broă” tam lơh mờ pal tam klăc, ring bal uă bè bồ tơngoh mờ lơh broă, mùl màl sàng goh, kơ̆ dơn, dòn song. Tổng Ƀí thư ồng Tô Lâm đơs loh: “Pal rơcăng mờ bơyai lơh gơ in Pơrjum dờng Đảng ƀộ ală kâp wèt tus Pơrjum dờng dơ̆ 14 Đảng dê, broă tờm là dong broă rơcăng pồ geh anih lơh broă đơng lam Đảng dê tàm tơl âp geh bơta pràn tam lơh uă. Tơrgùm rơcăng kwang bàng kâp ủy tơngai lơh broă pa jăt di ală tơngume neh geh bơto pơlam”.

Tàm jơh ală broă lơh kăc màng Việt Nam dê 95 nam do, mờ 13 dơ̆ Pơrjum dờng, Wa Hồ mờ Đảng he is ồn sền gròi tus broă lơh kwang bàng. Bơh tơl dơ̆ pơrjum dờng, tàm tơl gơl gùng kăc màng, Đảng he neh bơ̆t bơtàu mpồl kwang bàng, tă pơgồp dờng ngan gơcèng bơta lơh nền, lơh gơs ală cồng nha kah yau, lam dà lơgar ngai sơlơ bơtàu tơngguh rlau tai. Tài bè hơ̆, tàm broă lơh rơcăng Pơrjum dờng tàm tơngai lơh broă lơi broă lơh kwang bàng kung geh sền là broă dờng mờ kwơmàng ngan. Ală jơnau sồr bơh Đảng dê bè ală jơnau sồr, broă jàu săc rwah kwang bàng geh cih loh làng ngan mờ nền cê. Bulah bè hơ̆, broă “rwah bè lơi gơ in di?” kung gam sùm là jơnau lùp kal ke ngan sơl. Ồng Vũ Văn Phúc, lài do Đơng lam Sền swì Pang ƀăo Kộng sản đơs là: “Kờñ pal đơs di mờ di ngan tơl nă kwang bàng nàng ai tơmŭt tàm mat Pơrjum dờng pồ kâp ủy khoă pa. Ală cau ala măt tus bal Pơrjum dờng kung kờñ pal sền swì nền săc rwah pồ ală kwang bàng geh bơta kơ̆ dơn cíñ trị kơ̆ kơl jăp, nùs nhơm bồ tơngoh niam, geh bơngă, geh bơta gĭt wă, geh pràn jak lơh geh jơnau sồr bơh dà lơgar dê mŭt tàm rài pa rài brồ să jơi bơtiàn Việt Nam dê. Broă săc rwah bè lơi gơ in di, gơ in rơgeh kwang bàng kâp ủy là dùl jơnau lùp dờng gam gơ tơlik gơ wèt mờ kơnòl bơh kwang bàng kâp ủy ală kâp mờ đảng viên là cau ala măt tus bal Pơrjum dờng Đảng ƀộ ală kâp”.

Tàm broă lơh kwang bàng kung neh yờ tơnguh nùs nhơm cau lam bồ dê tŭ dan, yal tơnggĭt kwang bàng, ngan là cau tàm pơdờn kơnòl broă jăt ală jơnau cih pa bơh Dà lơgar dê. Broă tàm bơrkuăt kơ̆ kơnòl cau sồr pồ, yal tơnggĭt kwang bàng pal geh lơh jăt mờ jăt sền nàng ngan ngồn jòi geh kwang bàng geh nùs nhơm niam, geh broă lơh jak mŭt tàm mpồl kwang bàng đơng lam ală kâp mờ tàm Dà lơgar. Tài bơh, tàm dùl mpồl, ờ gŏ di dồ ròt kàr hơ̆ cau yờ tê bal yal tơnggĭt dùl nă mờ pal geh dùl nă cau dan, yal tơnggĭt lài. Cau sồr pồ, cau yal tơnggĭt pal geh tŭ tơngai đềt mềr mờ cau geh sồr pồ, cau geh yal tơnggĭt. Khi pal gĭt wă loh bơta jak chài, nùs nhơm bơh cau geh sồr pồ, yal tơnggĭt dê ờ gŏ di là yal tơnggĭt dồ bă bu ba, đềt mềr halà pròc mhàm, geh tŭ là “tăc blơi gơnoar broă” hơ̆ sồng tơnơ̆ hơ̆ geh jơnau gơlời wơl den tuh tìs ai mpồl in. Tiến sĩ Vũ Dương Huân, lài do Kwang Lam bồ Anih bơsram mờ kơlôi sơnơng Cribơyai broă mờ lơgar ndai, đơs nền: “Uă khoă lài neh sồr pồ tus kwang bàng tơnơ̆ do ờ lơh geh jơnau sồr, geh tŭ là gơtìp gơmŭt tàm bơta kŭp jàm. Cau yal tơnggĭt kwơmàng ngan, yal tơnggĭt di den geh kwang bàng jak, dilah yal tơnggĭt tìs geh aniai ai dà lơgar in. Den tàng pal geh kơnòl tàm broă yal tơnggĭt kwang bàng. Tơngguh kơnòl ờ mìng să tờm cau hơ̆ lơm mờ să tờm anih lơh broă yal tơnggĭt neh gơlik jơnau yal tơnggĭt ờ di jơnau sồr”.

Geh mùl màl là tŭ Pơrjum dờng, săc rwah tơmŭt tàm rơcăng kwang bàng, să tờm cau geh săc rwah mŭt tàm kâp ủy sàng goh lơm, mơya tŭ neh mŭt tàm gơnoar broă den sơnđờm gơtìp gơrềng wơl tài gơnăp gơnoar, bơta kwơ, hàm kờñ phan bơna…gơlam tus gơtìp kơplơ̆ kơhŭc, gơtìp aniai. Bơta hơ̆ pà gŏ, broă săc rwah ờ gŏ ƀươn soh, gơ sồr ală broă lơh kwang bàng pal geh lơh niam, rơndăp tăp sèng, loh làng, song dơ pă; săc rwah ală cau tơl nùs nhơm niam, bơta jak, tơl bơta mŭt bal tàm kâp ủy khoă pa. Cau tàm kâp ủy geh săc rwah pal ngan ngồn là cau tờm đơng lam cíñ trị, là ala măt ai mpồl đảng viên mờ geh làng bol dòn kơnờm kờñ gơboh, pin dờn. Ồng Trần Ngọc Đường, Kwang bàng Mpồl Củ tịc Anih duh broă Mặt trận Dà lơgar Việt Nam pà gĭt: “Broă jàu kwơmàng ngan là pal “sàng goh, dòn song”. Ờ “sàng goh, dòn song” den ngan ờ gơtùi tơmŭt tàm kâp ủy. Tổng Ƀí thư ồng Tô Lâm neh đơs wih đơs wơl bè nùs nhơm, gơnoar broă, nùs nhơm bồ tơngoh cau geh săc rwah mŭt bal tàm kâp ủy tàm tơngai tus. Bơdìh mờ ală broă jàu bè nùs nhơm bồ tơngoh cíñ, pràn jak, bơta gĭt wă den pal sền gròi nùs nhơm bồ tơngoh bè “sàng goh, dòn song”.

Nàng bơyai lơh geh cồng nha Pơrjum dờng ală kâp wèt tus Pơrjum dờng cau ala măt gùt lơgar dơ̆ 14 Đảng dê, sồr broă lơh kwang bàng pal geh lơh jăt broă rơndăp lơh kơ̆ kơl jăp, jak chài mờ ờ tŭ lơi tam gơl; pleh lơh ƀươn soh, khăt gơboh, ờ lơh jăt jơnau pal jăt, ơn tơmŭt lài “ling tơlir, ling pơrhê”.

Mơkung, jơh nùs kơ̆ dơn dră wơl ală tơnggŏ tŭ tơngai niam, hàm hà gơnăp gơnoar, hòi jà să is, gah mpồl, bơta kwơ mpồl, bồ tơngoh êt sơ ềl, ƀòn lơgar, đềt mềr, gơ̆p bơyô…Geh bè hơ̆ den hơ̆ sồng săc rwah geh cau mùl màl geh bồ tơngoh nùs nhơm; mùl màl geh bơta pràn jak sơrlèt bơta lòng bơh tŭ tơngai dê; lơh jăt geh gơnoar broă lam dà lơgar mŭt tàm rài bơtàu tơngguh, pas pràn.