Jat Jơnau lơh nền bơh Củ tịc lơgar dê bè toh glài tơngklàs jàm nam 2025, cau geh toh glài tơngklàs jàm nam 2025 geh: Cau gam lơh jat lơh glài jàm geh tŭ tơngai, cau gơtìp lơh glài jàm jơh rài kis neh geh tơrmù jàm geh tŭ tơngai, cau gam ơm ing lơh jat glài jàm.

Đơs tàm broă lơh, ồng Phạm Thanh Hà, Phó Cau kong kơnòl  Cơldŭ lơh broă Củ tịc lơgar đơs nền, bơh nam 2009 tus tŭ do, Dà lơgar neh lơh 10 dơ̆ toh glài tơngklàs jàm di broă lơh dờng, ngai lơh chờ dờng bơh Dà lơgar dê, toh glài tơngklàs jàm ai mờr 100 rơbô nă cau jàm geh broă lơh jat jàm niam, lơh broă, bơsram niam wơl rê wơl mờ mpồl bơtiàn. Cồng nha ală dơ̆ toh glài tơngklàs jàm neh gàr niam ală jơnau sồr cíñ trị, adat boh lam, cribơyai broă mờ lơgar ndai, geh làng bol tàm lơgar dồ nùs bal mờ mpồl bơtiàn ală lơgar jờng rơ uă ngan; pơn jat tai đơs nền gùng dà broă lơh ờ tŭ lơi tam gơl bơh Đảng mờ Dà lơgar dê tàm broă sơlơ tơnguh mờ sền gàr gơnoar kòn bơnus dồ bă song dơ pă, ring bal ai jơh tơl nă làng bol in, kờp bal ală cau gam lơh jat kơrnoat lơh glài jàm. Mờ ală Jơnau lơh nền toh glài tơngklàs jàm bơh Củ tịc lơgar dê, gĭt nđờ jơ̆t rơbô nă cau neh dờp geh bơta chờ hờp geh toh glài, rê wơl bơtòm tơrgùm mờ hìu bơnhă, crăp rcang lơh wơl rài kis.