Tơnơ̆ mờ tŭ lơh jăt Jơnau lơh nền tàm pơrjum sồ 57, lài ngan jơnau git wă bơh kwang bàng, đảng viên bal mờ làng bol dê bè gơnoar, bơta kwơ màng bơh bơta jăk chài mờ măi mok pa, tam gơl bơceh lơh pa mờ tam gơl sồ geh gơguh.

Bè lơh jăt Jơnau jơnau pơndŭt sồ 123, bè gàr niam gơguh lơh sa 8% rơlao hờ đang tàm nam 2025, càr Lâm Đồng neh ai geh uă sră nggal sồr lơh tơrgùm lơh jăt ală kơnòl, gùng dà broă lơh, ală broă lơh pràn mhar nàng lơh ngan geh khà gơguh lơh sa tàm nam 2025 do geh bơh 9,0 tus 10%. Đơs tàm pơrjum, Phó Thủ tướng Duh broă sùm Cíñ phủ ồng Nguyễn Hoà Bình gŏ loh broă lơh ngan, geh kơnòl, bơta pràn đơng lam, sồr lơh, nùs nhơm tam klăc, ring bal tàm broă lơh jăt ală gùng dà broă lơh dờng bơh Đảng tàm càr Lâm Đồng dê. Mờ sồr Mpồl Lơh kơnòl broă sùm Tỉñ ủy càr Lâm Đồng iăt ală jơnau đơs tàm pơrjum. Đơs tus bơta kơlôi rơcang bè mpồl kwang bàng neh tơrmù di pal mơya kòn bơnus gam lơh broă, ờ ngăc ngar jăk chài, ală cau ờ lơh gơtùi broă, Phó Thủ tướng Duh broă sùm Cíñ phủ ồng Nguyễn Hoà Bình đơs nền kấp ủy bal mờ cau lam bồ pal dờp kơnòl bè broă do.