Gơs ƀòn ƀòn lơgar pa bơh nam 2021, ƀòn Đăk Mông, xã Đăk Rong, kơnhoàl Đăk Đoa geh tai gùng dă mờ bê tông jòng mờ ơnàng geh dà lơgar bal mờ làng bol lơh bal. Hìu nhă lŏ Thoan kung là dùl tàm ală hìu geh ai ù tềng gah gùng nàng lơh gùng dă mờ bê tông tàm ƀòn. Yal wơl jơnau bơh să tờm dê, lŏ Thoan pà git, tơnơ̆ mờ uă nam lơh ngan tam gơl phan tam mờ phan ròng, tus nam 2018, hìu nhă lŏ neh lik klàs mờ rơƀah. Nam do hìu lŏ geh 170 tơlăk đong bơh broă tam 1 rơbô 500 tờm kơphe mờ ròng sur me. Lŏ Thoan pà git: “Hìu añ geh ù tàm broă lơh gùng lòt, bal mờ dà lơgar nàng lơh, añ cri bơyai mờ cau tàm hìu nàng ai ù lơh gùng lòt nàng ƀòn niam rơlao. Tơnơ̆ do làng bol pơn diang kơphe, tiêu mờ uă bơta phan tam tài neh geh gùng lòt niam. Tàng bol tam klăc bal uă ngan”.

Ồng Crăm, Ƀí thư Ci ƀộ mờ kung là kwang atbồ ƀòn pà git, tàm ƀòn geh 215 hìu, 729 nă làng bol. Wèt tus gàr niam khà ƀòn ƀòn lơgar pa, xã mờ ƀòn neh lơh uă broă lơh mùl màl tàm broă ngui ală priă càn sa priă cồng ờ uă mờ pơgồp bal mờ broă lơh pơgồp bal geh cồng nha ală broă lơh, rơndăp broă bơh Dà lơgar, bơsram tàp bơta chài gơwèt mờ ală hìu làng bol kòn cau gơtìp kal ke tàm broă tam gơl phan tam, phan ròng. Kơnờm mờ hơ̆, rài kis làng bol neh rơhời kơl jăp mờ rơhời brồ guh lik klàs rơƀah, khà hìu rơƀah gơmù rơhời jăt ală nam mờ tus tŭ do mìng gam 10 hìu rơƀah, 25 hìu ndrờm rơƀah. Kờp dŭ nam 2024, ƀòn geh gơmù 2 hìu rơƀah, 7 hìu ndrờm rơƀah. Ồng Crăm pà git: “Là Ƀí thư Ci ƀộ mờ kung là kwang atbồ ƀòn, añ dong kờl, pơgồp bal làng bol nàng bơtàu tơnguh lơh sa bơh broă tam kơphe, wèt tus kơphe geh bơta bơkah uă tŭ lơh broă bal mờ mpồl lơh sa kă bro. Làng bol neh geh lă cau lam lài tam klăc, dong kờl bal nàng bơ̆t bơtàu ƀòn lơgar pa, geh uă bơhiàn ờ niam lài do neh geh sơbì, ƀòn pơn jăt tai lơh ngan nàng lơh gơs ală jơnau kờñ bè ƀòn lam lài. Kơ̆p kờñ Đảng mờ Dà lơgar pơn jăt tai sền gròi tus làng bol nàng rài kis ngai sơlơ bơtàu tơnguh rơlao mờ lài”.

Tàm broă bơ̆t bơtàu ƀòn lơgar pa, broă prăp gàr mờ ngui ală bơta niam chài ờs mờng bơh làng bol ală jơi bơtiàn geh xã sền gròi ngan. Ồng Phách nam do neh rơlao 90 sơnam, là Kra ƀòn Đăk Mông, xã Đăk Rong pà git: bŭ lah rài kis geh tam gơl pa, ală bơta geh bơtàu tơnguh, mơya mpồl cau kơnòm să pal prăp gàr ală bơta niam chài bơh mò ồng lời wơl. Bơh ală broă prăp gàr bơta niam chài, ƀòn neh geh gơnoar atbồ sền gròi mờ lam sồr làng bol ƀòn lơgar prăp gàr mờ lơgeh wơl broă lơh chờ gờm kòi pa. Ală lơh chờ do geh priă lơh sùm pah nam. Ồng Phách đơs: “Lài do den tàm lồi nam tàm nhai 11 là geh bơyai lơh ñô sa chờ gờm kòi pa nàng ưn ngài yàng neh ai mìu nhàc niam, ai geh dùl nam kòi geh tơnhào uă, bồ nam den geh lơh niam wơl dà mbòr, añ tus bal là tài neh đềt mềr mờ broă lơh do bơh jŏ ngan, mờ kung kờñ bơto wơl oh kòn, kòn sao in nàng geh bơyai lơh sùm, nàng bol khi kah bè bơta niam chài mò ồng dê mờ tơnơ̆ do geh lơh jăt. Gam broă tàñ phan den lài do ơm tàm hìu rông cau lơi kờñ bơsram den neh geh ală ồng bơto, bơsram rơhời den git, geh bal tàñ phan mờ lơh ntas cing bal mờ dròng cing tàm ală tŭ chơ̆t, bơthi ƀồc, mpồl cau kơnòm să kờñ bơsram là geh bơsram tơn di lah kờñ”.

Ồng Hà Văn Tuấn, Phó Củ tịc UɃÑZ xã Đăk Rong, kơnhoàl Đăk Đoa, càr Gia Lai pà git, kờp tus tŭ do, ƀòn Đăk Mông neh lơh geh 14 tàm 19 khà broă tàm broă bơ̆t bơtàu ƀòn lơgar pa. Tàm broă bơ̆t bơtàu ƀòn lơgar pa, ƀòn tơrgùm bơtàu tơnguh tờm kơphe, phan ròng geh bơta pràn ƀòn dê. Tus tŭ do, priă geh tơl nă cau geh 35 tơlăk đong tàm 1 nam. Ồng Hà Văn Tuấn pà git tai: “Tàm xã den geh ƀòn Đăk Mông, ƀòn do là ƀòn bơ̆t bơtàu ƀòn lơgar pa lam lài. Geh uă broă lơh bơh Đảng mờ Dà lơgar lơh nàng bol kờñ ngan. Tŭ do broă lơh hìu niam chài, lơh gùng lòt den ƀòn Đăk Mông neh bơcri rơlao 12 tơmàn đong, làng bol den ai ù nàng lơh gùng lòt ha là ờ uă broă lơh bơh dà lơgar bal mờ làng bol lơh bal. Tŭ do geh ờ uă bơta kal ke bè sră ƀảo hiểm Y tế den pal tơrgùm pràn tàm broă mblàng yal, lam sồr. Dơ̆ bàr tai bè khà broă hìu rơƀah, ndrờm rơƀah pal tơmù mờ tam pà tus ală thôn ƀòn geh kwang bàng tờm sền gròi mờ dong kờl”.

Nàng bơ̆t bơtàu ƀòn Đăk Mông là ƀòn lơgar pa lam lài, tàm tơngai tus, kấp ủy, gơnoar atbồ xã ai jơ nau kờñ tơnguh uă rài kis phan bơna, bơta niam chài nùs nhơm làng bol in. Mờ lơh gơs broă bơ̆t bơtàu phan bơna ƀòn lơgar, bơtàu tơnguh ƀòn lơgar rơhời lơh pa jăt broă rơndăp ù tiah pơgồp bal mờ lơh sa suơn sre mờ bơtàu tơnguh broă lơh drơng ala, kă bro, bơta niam chài geh prăp gàr sùm.