Tàm dơ̆ tơngkah kir sơnrai 30 nam Ngai tơlik mat kơnhoàl, kwang đơng lam bồ kơnhoàl Đăk Hà, càr Kon Tum đơs nền, pơn jat tai bơt bơtàu ƀòn lơgar kơnhoàl Đăk Hà ngai sơlơ pas pràn, niam jak, kòn bơnus kơnhoàl Đăk Hà “Tam klăc bal, ngăc ngar, bơceh lơh, rềp mềr, geh nùs nhơm niam”, bơt bơtàu kơnhoàl lơh geh broă lơh ƀòn lơgar pa tàm nam 2025 nàng di pal mờ sră jờng rơ Cau ling khin cha jak chài lơh broă tàm tơngai tam gơl pa mờ nam 2008 Đảng, Dà lơgar dê neh jàu pà.

Nàng lơh geh jơnau kờñ gơ gơs kơnhoàl ƀòn lơgar pa sơnrờp bơh càr Kon Tum dê tàm nam 2025, kơnhoàl Đăk Hà lơh jat uă broă lơh, tàm hơ̆ tơrgùm ngui geh cồng nha ală bơta ƀuơn, bơta pràn nàng bơtàu tơnguh kă bro- drơng broă pơgồp bal mờ broă bơt bơtàu ală phan bơna krơi is jat ală bơta kwơ dê; bơtàu tơnguh lòt nhơl mpồl bơtiàn, lòt nhơl ƀòn brê bơnơm, lòt nhơl lơh sa suơn sre gơ gơs gah lơh sa tờm.