Là dồ nă klau pơnu geh jàu lơh broă tàm tiah jơi bơtiàn dồ êt nă cau Dà Mròng, kơnhoàl Dam Rong, càr Lâm Đồng bơh nam 1980, tơnơ̆ mờr 40 nam lơh sir jak ngan broă lơh bơto bơtê, nam 2018, ồng Liêng Jrang Ha Tương ơm tàm ƀòn Dà Tế, xã Dà Mròng rê rlô lơh broă mờ geh jàu kơnòl broă kơn jơ̆ kơn jŭt ngan Ƀí thư Ci ƀộ thôn. Tàm gơnoar broă pa, ồng Liêng Jrang Ha Tương neh lơh jăt niam gơnoar broă bơh đảng viên dê, bal mờ ală đảng viên ndai tàm ci ƀộ sùm bơyai lơh pơrjum tàm bơyai, lam lơh jăt geh cồng nha ală kơrnoăt mìng dồ tơngume bè bơtàu tơnguh lơh sa, niam chài, mpồl bơtiàn, bơtàu tơnguh uă rài kis phan bơna, nùs nhơm ai làng bol in. Ồng Liêng Jrang Ha Tương yal, nàng làng bol tàm ƀòn jơh nùs tơnguh uă lơh sa, tam gơl rơndăp tăp sèng chi tam, tơnguh uă cồng nha tam phan, să tờm ồng mờ ală đảng viên tàm ci ƀộ ndrờm pal lơh lài, lơh krơh lòt lài tàm tŭ lơh jăt. Kwơmàng pal lơh jăt gơnoar broă đảng viên, jơh nùs bơsram mờ lơh jăt bồ tơngoh, nùs nhơm, broă lơh mờ rài kis Hồ Chí Minh dê bơh ală broă loh làng ngan, dipal ngan tàm rài kis geh ngan. Ồng Liêng Jrang Ha Tương, đơs: Gơ wèt mờ cau đảng viên là pal lòt lài, pal là cau lơh lài, bơh hơ̆ làng bol cau hơ̆ sồng tam gơl bơta gĭt wă, sền gŏ loh cồng nha broă he lơh. Bè tơngai pa do, bol hi geh ală broă rơndăp lơh loh làng ngan, bè broă tam biăp sa kung bè ròng tai iar, ada, sur...nàng tam gơl rài kis lơh sa hìu bơnhă dê. Bơh ală broă neh lơh, bol hi neh mblàng yal tàm jơh gùt làng bol mờ khi lơh jăt, tam gơl pa rài kis lơh sa bơh he dê, tơrmù ƀà dồ bơnah priă tă nàng blơi phan sa pah ngai. Hơ̆ là kung bơta mờ añ gŏ gơ wèt mờ cau đảng viên tŭ bơsram den bol he pal lơh ală broă loh làng ngan, dipal ngan mờ rài kis geh ngan bè hơ̆.

Tơnơ̆ 05 nam lơh Ƀí thư Ci ƀộ, ồng Liêng Jrang Ha Tương neh lời wơl uă jơnau kah niam mờ nùs nhơm niam bơnĕ tàm tơl nă kwang bàng, đảng viên mờ làng bol tàm thôn. Bơh ală broă lơh loh làng ngan mờ dipal ngan mờ bơta geh ngan tàm rài kis tàm broă lòt lài tơnguh uă lơh sa, tam gơl rơndăp tăp sèng chi tam tơnguh uă priă lơh geh, uă làng bol tàm thôn neh jơh nùs lơh jăt. Mùl màl, neh geh mờr 50 hìu bơnhă cau jơi bơtiàn dồ êt nă cau tàm thôn khin cha tam gơl bă sre lơh kòi gơ ai cồng nha dồ êt ir nàng tam tờm zơu ròng tu, uă hìu tam tai biăp sa, ròng siam uă phan ròng nàng ờ mìng lơh geh jơnau kờñ phan sa dồ bă tiah mờ gam tăc jăt jơnau kờñ bơh drà kă bro dê tai. Bơh hơ̆, rài kis lơh sa làng bol dê tàm thôn rơhời tơl ngui tơl sa mờ bơtàu tơnguh. Ală adăt bơhiàn bơngơl gơla ờ gam kwơ tai tàm broă lăp bau, ñô bau, ies tơ̆p bơthi ƀồc cau chơ̆t kung geh sang jơh sơl, ală bơhiàn niam cèng rài kis niam chài krơi is ală jơi bơtiàn dê geh prăp gàr mờ ngui niam. Gùng lòt tàm ƀòn, jơng gùng tung rềng geh pơs wàs sàng goh ngan mờ sùm tơlir niam, lơh geh ală broă jàu bè thôn, ƀòn niam chài. Ồng Liêng Hót Ha Phương, kòn cau K’Ho ơm tàm thôn Dà Tế, xã Dà Mròng, pà gĭt: Tàm thôn Dà Tế bơh bol hi dê geh Ƀí thư Ci ƀộ thôn lam bồ den gùng ƀòn sang goh ngan, niam bơnĕ ngan, jơh ală broă tàm thôn ndrờm niam lơm, sàng goh rơndăp tăp sèng lơm.

Thôn Dà Tế, xã Dà Mròng, kơnhoàl Dam Rong, càr Lâm Đồng geh mờr 220 hìu, mờr 1 rbô nă làng bol, mìng là cau jơi bơtiàn dồ êt nă cau lơm, khà hìu bơnhă rƀah geh rlau nggùl khà. Kơnờm bơh tam gơl bơta kơlôi, broă lơh, rơhời tam gơl rơndăp tăp sèng chi tam, tơnguh tai lơh sa mờ ngui bơta jak chài măy mok tàm broă tam phan...khà hìu bơnhă rƀah neh gơmù uă ngan gơmù gam hơđơm 20%. Tàm thôn sơnđờm geh bàr pe broă lơh lơh sa lơh geh priă jền gĭt nđờ rhiang tơlak đong dồ nam.

Pal sền ngăc là, nàng lơh niam broă lơh ătbồ thôn, sền gàr lơngăp lơngai rơndăp tăp sèng mờ ƀươn tàm broă mblàng yal, hòi jà làng bol lơh jăt niam ală jơnau sồr, gùng dà broă lơh bơh Đảng dê, adăt boh lam bơh dà lơgar dê, ồng Liêng Jrang Ha Tương gam lam ală đảng viên tàm Ci ƀộ, Mpồl lơh broă Làng bol wăc sềr rùp ù tiah thôn, tơngŏ nền cê uă jơnau yal tờm bè ală broă lơh kwơ bal mpồl bơtiàn, gùng lòt, hìu pơrjum niam chài mpồl bơtiàn, anih pơrjum gah jăt yàng dê mờ anih hìu ơm bơh tơl hìu bơnhă dê. Sră wăc sềr rùp ù tiah do geh yồng niam ngan tàm hìu niam chài thôn nàng pah tŭ làng bol, năc lòt nhơl tus nhơl, lơh rài bồ tơngoh, bơsram mờ lòt còp sền ƀươn ƀoài gĭt mờ sền. Mơkung là cơng tàng nàng ătbồ ƀươn bè làng bol ơm kis, khà cau ơm kis sùm, ơm kis ing, ntrờn tus, lik lòt...gơgơs broă lơh pa ătbồ thôn, ƀòn gam geh rề ơnàng lơh uă tàm xã Dà Mròng đơs is mờ kơnhoàl Dam Rong đơs bal.

Jăt ồng Nguyễn Hoàng Mai, Ƀí thư Đảng ủy, Củ tịc Ủy ƀan Ñân zân xã Dà Mròng, kơnhoàl Dam Rong, càr Lâm Đồng đơs, ồng Liêng Jrang Ha Tương là dồ nă cau geh bơngă pin dờn mờ là đảng viên lơh krơh. Mờ gơnoar broă Ƀí thư Ci ƀộ thôn, ồng neh tă pơgồp uă ngan tàm broă lơh bơ̆t bơtàu Đảng, bơ̆t bơtàu gơnoar ătbồ, hòi jà làng bol tus bal jơh nùs bơtàu tơnguh lơh sa- mpồl bơtiàn, tơrmù rƀah kơ̆ kơl jăp mờ sơm băt tê bal bơ̆t bơtàu ƀòn lơgar pa, là krơh pơnrơ niam nàng ală đảng viên kơnòm să in đòm jăt. Ồng Nguyễn Hoàng Mai, đơs: Dà Tế tŭ do là thôn geh uă bơta niam ngan. Mờ tàm hìu pơrjum hìu niam chài thôn kung neh ai lơh ală kƀàng cih yal bơh Ci ƀộ, Mpồl lơh broă Làng bol thôn, bơh ală mpồl cau dê nàng cih wơl broă lơh bơh ală anih lơh broă do dê, pah nhai, pe nhai geh sền swì tơn tềng kƀàng hơ̆ nàng geh bơta tàm pơndrờm lơh ngan. Gơtùi đơs là, mờ gơnoar broă là Ƀí thư Ci ƀộ thôn bơh ồng Liêng Jrang Ha Tương dê neh lơh geh uă cồng nha jơh nùs ngan, geh Đảng ủy, Ủy ƀan Ñân zân xã geh uă sră jờng rơ, pơndờm pơnđiang mờ kơ̆p kờñ là tàm tơngai tus ồng Tương pơn jăt tai gàr niam ală cồng nha do nàng ai Ci ƀộ Dà Tế ngai sơlơ bơtàu tơnguh rlau tai. Gơgơs là dồ Ci ƀộ lam lài lơh krơh niam ngan bơh Dà Mròng dê mờ geh uă xã ndai pal lùp bơsram mờ lơh jăt.

Ngan bơh bơta tơryăng tơryồng jơh nùs jơh tồr, sùm lòt lài tàm tŭ lơh jăt ală srơh bơh tiah do lam lơh, lơh krơh nàng đảng viên kơnòm să mờ làng bol in lơh jăt, đảng viên Liêng Jrang Ha Tương, Ƀí thư Ci ƀộ thôn Dà Tế gơgơs là krơh pơnrơ niam bơh ƀòn lơgar dê, dờp geh uă sră jờng rơ bơh kơnhoàl Dam Rong, càr Lâm Đồng dê.