Xã Gung Reh, kơnhoàl Di Linh, càr Lâm Đồng geh uă ƀòn là jơi bơtiàn kòn cau. Bal mờ 2 bơta phan tam tờm ngan là kơphe mờ lơh kòi sre, ală nam do, tàm xã do neh bơtàu tơnguh tai git nđờ rơhiang lồ ù tam chi sa plai bè ƀơ, sầu riêng, măk ka, plai màk, jơu tu mờ uă bă ù tam biăp bal mờ phan tam ờ jŏ tơngai ală bơta. Kơnờm mờ broă sền kwơ broă tam gơl phan tam jăt gùng dà broă lơh tơnguh uă bơta kwơ phan kă bro, ai ală bơta sơntìl phan tam pa geh cồng nha uă mờ bơkah tàm broă tam phan, mờ ngui broă lơh sa chài nàng lơh sa, den tàng priă geh tàm dùl bă ù tam phan tàm xã Gung Reh dê neh geh mờr 150 tơlăk đong tàm 1 lồ 1 nam. Bơh tŭ hơ̆, khà hìu rơƀah tàm xã neh gơmù gam 5%.

Jăt ồng K’ Keo, Ƀí thư Ci ƀộ thôn Hàng Làng, xã Gung Reh yal, geh cồng nha do là kơnờm mờ broă sền gròi bơcri priă bơh Đảng mờ Dà lơgar dê bè ală gah broă, tàm hơ̆ uă ngan là lơh jăt broă lơh jơnau kờñ dà lơgar bè bơ̆t bơtàu ƀòn lơgar pa neh tam gơl uă ngan tus mờ nùs nhơm kơlôi sơnơng, broă lơh bơh làng bol dê. Ồng K’ Keo đơs tai: “Thôn Hàng Làng là thôn kal ke ngan, geh Đảng, Dà lơgar, UɃÑZ xã sền gròi bơcri priă, drơng gàr rài kis mờ bơtàu tơnguh lơh sa ai làng bol in. Bơh tàm broă pờ geh uă adŭ bơsram bè broă lơh sa, bơta chài sơnka sền gàr phan tam, phan ròng, ală bơta gơguh jăk Khoa họk-kỹ thuật kờñ ngui tàm broă lơh sa… neh dong kờl làng bol tam gơl bồ tơnguh kơlôi sơnơng tàm broă tam phan. Tơnơ̆ mờ tŭ làng bol ngui tàm broă tam phan den neh rơhời geh cồng nha uă, priă geh tŭ do gơguh uă ngan pơn drờm mờ lài. Tàm broă lam sồr bơ̆t bơtàu ƀòn lơgar pa, den làng bol neh dùl nùs bal mờ gơnoar atbồ xã pơs wàs kloh gùng lòt tàm ngai dơ̆ poh pah poh, làng tơl tơrgùm pơs wàs siồ siă mờ tam chi jăt gah gùng lòt nàng lơh muh măt ƀòn lơgar tơlir, kloh, niam”.

Gam gơwèt mờ kra ƀòn Dơng Gur Ha Lơng, kis tàm thôn  Dà Mpao, xã Dà Đờng, kơnhoàl Lâm Hà yal, bơh ngai geh dờp bơta kwơ ală broă lơh jăt jơnau kờñ dà lơgar dê, muh măt ƀòn lơgar tàm tiah jơi bơtiàn kòn cau kis tàm xã Dà Đờng neh geh tam gơl uă. Ờ mìng ồs đèng, gùng lòt, hìu bơsram, hìu sơnơm geh bơcri priă lơh di mờ jơnau geh ai, nus nhơm git kơlôi sơnơng brồ guh is bơh làng bol kis tàm ƀòn kung neh tam gơl niam. Hìu lơi kung lơh ngan tàm broă lơh sa, tơnguh uă rài kis lơh sa hìu nhă mờ tus bal mờ mpồl bơtiàn bơ̆t bơtàu ƀòn lơgar ngai sơlơ pas gơs mờ niam bơnĕ.

Kra ƀòn Dơng Gur Ha Lơng pơn yờ să yal: “Tàm ƀòn Dà Mpao bol añ geh uă oh mi jơi bơtiàn ơm kis bal, bè cau K’ Ho Cil, K’Ho Sre, K’ Ho Ryồng, cau yoan… mơya làng bol sùm dùl nùs bal, tam klăc bal nàng bơtàu tơnguh bal ngai sơlơ niam rơlao. Làng bol tus bal lơh gùng lòt, lơh dà ngui sa, lơh ồs đèng àng. Añ là kra ƀòn den tàng sơlơ pal lam ală cau tàm ƀòn tam klăc bal, dùl nùs bal bơ̆t bơtàu lơh sa ƀòn lơgar dê, kung bè tam klăc bal đah ală gah jăt yàng tờm tàm ƀòn bè Yàng Bàp, Yàng Tin Lành mờ Yàng Phờk”.

Gŏ broă pơgồp bal lơh sa jăt broă lơh tơnguh bơta kwơ phan kă bro là gùng dà pal geh lơh, xã Phú Hội, kơnhoàl Đức Trọng neh mhar lơh jăt dơ̆ lam sồr làng bol tus bal niam tàm ală mpồl pơgồp bal lơh sa mờ tăc phan geh lơh bơh broă lơh sa suơn sre dê. Gùt xã tŭ do geh mờr 800 hìu tus bal tàm ală broă lơh pơgồp bal tam biăp, bơkào, kơnuh, plai chi ală bơta mờ uă kông ty, mpồl lơh sa kă bro mờ Hợp ták xã, tàm hơ̆ geh tus 87% geh hơ lơh sa bal jăt gùng dà broă lơh kơl jăp. Jăt ồng Liêng Hót Ha Huyền, Ƀí thư Ci ƀộ thôn Rchai 2 yal, kơnờm mờ tam gơl jơnau git wă tàm gùng dà tam phan, sền kwơ tus mờ drà kă bro bal mờ bơta ai – kờñ phan geh lơh ndrờm geh tăc mờ khà priă di pal, den tàng rài kis phan bơna mờ nùs nhơm làng bol dê neh gơguh loh làng ngan. Ồng Liêng Hót Ha Huyền đơs tai: “Broă bơ̆t bơtàu ƀòn lơgar pa nàng geh cồng nha bè tŭ do hơ̆ là kơnờm tàm broă geh dùl nùs bal bơh gùt làng bol dê bal mờ jơh ală gah, mpồl lơh broă cíñ trị. Geh uă ngan làng bol kis tàm ƀòn Rchai 2 là cau jơi bơtiàn ờ gal cau, nàng làng bol tus bal niam tàm broă bơ̆t bơtàu ƀòn lơgar pa, ai ù lơh gùng lòt den broă lam sồr kwơ màng ngan, ală kra ƀòn, cau geh bơngă pin dờn, gah, mpồl lơh broă cíñ trị pal tus bal, pal ai geh bơta pràn tam klăc bal jơi bơtiàn. Tŭ do gơwèt mờ gùng geh lơh bê tông jơh den mờr geh lơh gơs”.

Tus jơh nam 2023, càr Lâm Đồng geh 109 tàm 111 xã geh khà ƀòn lơgar pa, tàm hơ̆ geh 41 xã ƀòn lơgar pa tơnguh uă mờ 16 xã ƀòn lơgar pa lam lài. Mờ broă tus bal pràn kơl dang bơh ală gah, mpồl lơh broă cíñ trị, bal mờ broă tam klăc bal, dùl nùs bal bơh làng bol dê, pin dờn là càr Lâm Đồng geh lơh gơs broă bơ̆t bơtàu ƀòn lơgar pa lài mờ nam 2025 bè jơnau neh geh ai.