Mờ suơn kơphe ơnàng rơlao 1 lồ 1 sào gam tam nam dơ̆ pe, kàl tơnhào nam do, hìu ồng Triệu Văn Phúc, kis tàm thôn 3, xã Cư̆ Suê, kơnhoàl Cư̆ Mgar, càr Dăk Lăk tơnhào geh 5 tấn kơphe gar. Ồng Phúc pà git: khà tơnhào geh do neh geh mờr 2 dơ̆ pơn drờm mờ tơngai lài.

Ờ hềt kờp tus do tơnhào gam gơguh tai kơnờm bơh ală phan tam bơrlŭ bal. Mờ khà priă tăc bè tŭ do, pah nam hìu nhă ồng geh bơh 800 tơlăk priă. Jăt ồng Phúc đơs, geh khà priă bè do là kơnờm mờ broă tam gơl bơh broă lơh sa jăt jơnau bơto sồr bơh Hợp ták xã Lơh sa suơn sre mờ broă lơh drơng ala Bình Minh dê. Ồng Triệu Văn Phúc đơs tai: “Hợp ták xã bơto sồr làng bol lơh broă sa, làng bol lơh jăt broă lơh bơh Hợp ták xã dê bè bơta chài sơnka, sih phơng, sơnơm sền gàr phan tam, sơndră mờ kòp tàm ù,… Lơh jăt Hợp ták xã den geh uă bơta kwơ, priă geh uă rơlao. Tài lài do lơh is jăt mờ bơta mờng chài bơh să tờm dê, den tàng cồng nha geh ờ uă”.
Bal mờ broă tus bal hợp ták xã bơh tàm ală ngai sơnrờp geh lơh, lŏ Triệu Thị Hạnh yal, tơl nă cau ndrờm geh lòt bơsram, bơsram ală bơta gơguh jăk khoa họk, kỹ thuật dê. Ală cau tàm mpồl là cau ngăc ngar gam kơnòm să gam dong kờl, bơto sồr làng bol crăp phan tuh dà tềm pềr, lam sồr ală cau tàm mpồl tam phan jăt broă lơh hữu kơ, đềt mềr mờ tiah kis.

Lŏ Triệu Thị Hạnh pà git: “Bơh tŭ sơn đờm lơh cau tàm Hợp ták xã Bình Minh den geh tus bal uă adŭ bơsram. Tơnơ̆ mờ tŭ neh geh bơsram là he kung geh tam gơl bồ tơngoh lơh broă, geh uă tŭ lơh bè ờs den añ gŏ ờ geh cồng nha. Gŏ Dà lơgar kung geh uă broă dong kờl ai hợp ták xã in nàng ală cau tàm mpồl hợp ták xã in git jơnau pa rơlao, lơh sa suơn sre bè kơphe, tiêu tam bơrlŭ bal den geh cồng nha”.

Geh lơh bơh nam 2016, Hợp ták xã lơh sa Suơn sre mờ broă lơh drơng ala Bình Minh geh 27 nă cau ndrờm là làng bol kòn cau Dao dê lơm, kis tàm thôn 3, xã Cư̆ Suê, kơnhoàl Cư̆ Mgar. Lŏ Triệu Thị Châu, Kwang atbồ Hợp ták xã pà git, kơnờm geh 17 nă cau tàm mpồl neh geh jơh bơsram đại họk, cao đẳng den tàng hợp ták xã lơh ală broă lơh ndrờm mhar.

Tus tŭ do hợp ták xã neh geh tiah tam phan ơnàng rơlao 108 lồ kơphe tam bơrlŭ bal mờ uă bơta phan tam ndai bè tiêu, sầu riêng, ƀơ…, mờ ală phan geh lơh rơhời geh anih tăc tàm drà kă bro. Lŏ Triệu Thị Châu đơs: “Ce mãng cầu bơh Hợp ták xã tơnơ̆ mờ tŭ tăc tàm drà kă bro geh cau ngui sa kờñ ngan. Tŭ do geh tai sầu riêng pơr thăng hoa mờ pơnăt pơr thăng hoa tơnơ̆ mờ tŭ tăc tàm drà kă bro den kung geh cau ngui sa kờñ ngan sơl. Bơh tŭ hơ̆ añ kơlôi ndan lah he ờ lơh nền nòn gơs phan ngui sa mờ lơh ngan nề nòn bơh tơl phan geh lơh nàng tơnơ̆ do geh lơh gơs rơhời. Kơ̆p kờñ ală phan geh lơh bơh hợp ták xã dê geh tăc tus mờ ală càr ndai, geh tus tàm gùt lơgar Việt Nam tơn”.

Kơnờm mờ tam gơl bồ tơngoh, pơgồp bal lơh sa jăt broă lơh kơl jăp, rài kis ală cau tàm mpồl Hợp ták xã geh gơguh sùm. Priă geh tơl hìu geh bơh 300 tus 500 tơlăk đong tàm 1 nam. Ồng Nguyễn Công Văn, Phó Củ tịc UɃÑZ kơnhoàl Cư̆ Mgar đơs: “Hợp ták xã Bình Minh là dùl tàm ală hợp ták xã lơh broă geh cồng nha. Ờ mìng là gah lơh kơphe mờ gam rơcang pơgồp bal nàng tăc ală bơta phan ndai bơh boă lơh sa suơn sre dê, ală bơta tờm chi sa plai mờ hợp ták xã do kung geh lơh niam broă blơi phan tàm broă lơh sa suơn sre dê mờ pơgồp bal kă bro phan geh lơh den tàng lơh broă kơl jăp ngan. Dùl bơta mờ bol añ sền gròi ngan mờ bol añ gŏ iang nùs ngan rơlao, hơ̆ là nùs nhơm tam klăc bal, broă bơceh lơh tàm Mpồl atbồ đơng lam, broă đơng lam geh cồng nha mờ ngui geh nùs nhơm lơh tờm tàm ală cau tàm hợp ták xã dê”.

Rơcang jòi nàng ngui ală broă lơh pa, pơgồp bal lơh sa, lơh gơs nền nòn ală bơta phan…, ală làng bol lơh broă sa kòn cau Dao tàm ƀòn Bình Minh neh pơgồp bal lơh geh ală tam gơl niam, tơnguh uă cồng nha lơh sa mờ tơnguh bơta kwơ bơh broă lơh sa suơn sre tàm tiah làng bol jơi bơtiàn ờ gal cau tàm xã Cư̆ Suê, kơnhoàl Cư̆ Mgar, càr Dăk Lăk dê.