Ală ngai rềp ngai sa tềp Dà lơgar 2023, ùr bơklau bi Trần Ngọc Vũ ơm tàm thôn 10, xã Tâm Thắng (kơnhoàl Cư Jút), ờ ru ngan lòt tàm tiah mìr ơnàng 5 lồ bơh hìu bơnhă nàng ntrờn pơng gàr, koh sơr bì uă tờm kơphê, tiêu nàng jàu ù ai ală mpồl lơh gùng in còr pơn ring gùng. Bi Trần Ngọc Vũ đơs, geh mblàng yal hòi jà, ùr bơklau bi neh ring bal pà is ù rlau 11 rơbô thơk vuông, koh sơr bì 300 tờm kơphê, 250 jrong tiêu gam tàm tơngai ai tơnhào nàng lơh gùng lòt. Kờp priă ù mờ phan bơna gơguh tus mờr 2 tơmàn đong. Do là phan bơna dờng ngan. Bulah bơh chờm jơh 2 nă ùr bơklau gơ lơh pơlai ngan, mơya kơlôi sơnơng nền là broă pà is ù lơh gùng là gùng dà broă lơh di bơh Dà lơgar dê, ală bơta ờ niam neh geh hời rơ hời sang tĕ jơh.

Bi Trần Ngọc Vũ đơs: Hìu bơnhă geh gơnoar atbồ tiah do kung bè ala mat Mpồl mblàng yal ai ù tus tơn tàm hìu nàng hòi jà pà is ù lơh gùng. Ùr bơklau gŏ geh kwơ jŏ jòng bơh broă pà is ù, tài bơh pà is ù den tơnơ̆ do geh gùng lòt rê, làng bol lòt rê ƀuơn ƀoài, jun pơdiang phan lơh geh bơh suơn sre ƀuơn ngan, muh mat ƀòn lơgar geh uă bơta gơl niam. Añ sền gŏ ală bơta kwơ bè hơ̆ den hìu bơnhă añ ring bal.

Kung lơh jat srơh pà is ù lơh gùng lòt bơh xã Tâm Thắng dê, bi Lê Anh Tuấn ơm tàm thôn 8 neh pà is rlau 2 rơbô thơk vuông ù mờ 50 tờm kơphê, 70 jrong tiêu. Kờp jơh priă jền bơh ù mờ phan bơna geh pà is gơguh tus 700 tơlak đong. Bi Lê Anh Tuấn pà gĭt, ala mat Ủy ƀan Ñân zân xã mblàng broă Dà lơgar mìng lơh niam broă bơcri priă tơl priă tă lơh crăp lơh gùng, ai broă mblàng yal jơnau ai ù den ờ geh đơs. Den tàng, dilah làng bol ờ pà is ù den gùng lòt kal ke nàng lơh sir. Bơh ală kal ke do, hìu bơnhă neh ring bal pà is ù nàng lơh gùng.

Bi Lê Anh Tuấn đơs: Mpồl mblàng yal tus hòi jà, pơndờm pơnđiang đơs bơta kwơ bơh broă pà is ù lơh gùng mờ tơnguh bơngă ai tiah do in, să tờm hìu bơnhă añ kung gơ lơh di sơl den ring bal. Gùng lòt tàm tiah he dê bơh lài den gùng dềt, lơm bè tàm kàl mìu, tŭ do geh Dà lơgar bơcri priă tă lơh gùng dờng rao nàng làng bol in lòt rê den chờ hờp ngan. Geh gùng dờng lòt rê tàm hìu den hoàc huơr tềng đap mat kung di sơl, tơnơ̆ do sền wơl, să tờm añ rcang pà is ù lơh gùng, geh kwơ bal lơm.

Lơh jat gùng dà broă lơh bơh Hội đồng Ñân zân kơnhoàl Cư Jŭt, Ủy ƀan Ñân zân kơnhoàl neh ai priă tă lơh gùng pleh ală xã jòng 7,5 kơi sồ, tàm tơrbŏ ală xã Tâm Thắng, thị trấn Ea T’ling mờ xã Trúc Sơn. Gơl gùng geh sơnđờm mut lơh bơh nhai 10 nam 2022 mờ kờp dŭ nggùl nam 2024 den lơh sir mờ mŭt ngui. Tàm Nghị quyết bơh Hội đồng Ñân zân kơnhoàl đơs loh, tài bơh kal ke bè priă jền, Ủy ƀan Ñân zân kơnhoàl geh ai tơl priă tă lơh, bơnah ai ù ai ală xã, thị trấn rcang mblàng yal hòi jà làng bol pà is ù nàng lơh jat.

Ồng Trần Thế Quang- Ƀí thư Đảng ủy xã Tâm Thắng pà gĭt, gơl gùng lòt gan xã jòng 3,2 kơi sồ. Nàng lơh rơndap broă lơh lam lơh jat broă rơndap lơh, Đảng ủy xã crơng gơs Mpồl dong broă lơh broă mblàng yal hòi jà ală hìu bơnhă geh ù tiah tàm tiah rơndap broă lơh pà is ù lơh gùng. Tus tơngai do, geh 57/67 hìu bơnhă ring bal pà is ù lơh gùng. 65% bă ù neh geh ai jơh, ai gam 35% tai geh lơh tàm tơngai tus. Gơl gùng lòt gan xã Tâm Thắng geh ai lòt rê lài mờ ngai 03/02. Kờp jơh priă pà is ù bơh làng bol in geh pơgap 12 tơmàn đong. Broă pà is ù, tờm chi, phan bơna lơh gùng bơh làng bol dê jat tàm nùs nhơm pà is.

Ồng Trần Thế Quang đơs: Bol añ mblàng ai làng bol gĭt tŭ geh ală gơl gùng lòt pa lòt gan den tơnơ̆ tŭ geh gùng lòt pa den bơta kwơ ù tiah dê geh gơnguh. Nghị quyết Ủy ƀan Ñân zân kơnhoàl kung geh broă lơh dong kờl geh hời rơ hời tơmŭt tàm broă rơndap ù tiah ngui ù tàm tŭ sền gŏ di pal, mờ ờ duh pal tong ală bơta priă tă tam gơl Sră ngui ù. Bơta do nàng pleh bơta làng bol neh pà is ù rao den ờ duh pal tă tơm priă tă halà lơh jat kơnòl broă priă jền nàng lơh wơl sră ngui tai.

Jat ồng Nguyễn Anh Tú, Củ tịc Ủy ƀan Ñân zân kơnhoàl Cư Jŭt, srơh pà is ù, tờm chi tam, phan tam lơyah ngai mờ phan bơna lơh gùng lòt tàm ală nam do ờ mìng geh bơyai lơh uă tàm xã Tâm Thắng, mờ tàm jơh ală xã, thị trấn tàm ù tiah kơnhoàl dê. Broă làng bol pà is gĭt nđờ jơ̆t thơk vuông ù kờp priă gĭt nđờ jơ̆t tơmàn đong lơh gùng lòt neh mờ gam pơgồp bơnah uă ngan tàm jơnau kờñ bè lơh sir kơnhoàl ƀòn lơgar pa Cư Jŭt tàm nam 2025.