Pa khòm tơrgùm ală ƀàu kơphe gar kơn jơ̆ neh geh kâng mờ tơm priă, ồng Y Blul Niê (mat mờng hòi là ồng Khom) ơm tàm ƀòt Chiết, xã Ea Tiêu, kơnhoàl Cư Kuiñ sơñio tê hờ ƀlàng bê tông mờ pơng gàr tềng đap mpồng mờ đơs, pơng gàr do pa lơh wơl dơ̆ 2 pơgap mờ do 2, 3 nhai. Lài do, hìu bơnhă kung neh lơh pơng gàr mờ mpồng kơ̆ ngan, mơya tŭ ƀòn geh broă rơndap lơh pờ ơnàng gùng lòt tàm ƀòn, lơh tai rbòng dà mờ tiah kềng gah gùng. Geh bơta mblàng yal, hòi jà bơh mpồl atbồ is ƀòn mờ cau kra ƀòn dê, hìu bơnhă ồng Y Blul neh chờ hờp, tă sờr is pơng gàr, ai is 30 thơk vuông ù tềng đap ƀlàng hìu nàng lơh gùng, ntrờn lơh wơl pơng gàr mờ mpồng mut tàm dơlam. Ồng Y Blul Niê đơs: “Tŭ geh broă rơndap lơh lơh gùng den añ kờñ ngan, gùng do bơh sơn đờm rơndap ù tiah lơh den ơnàng ngan, mơya tơnơ̆ tŭ cò rơnring ù, khi cò jat kềng pơng gàr mờr 30 thơk vuông, den añ kung ai lơh sơl, ntrờn mut tàm dơlam mờ lơh wơl pơng gàr”.

Kung bè hìu bơnhă ồng Y Blul sơl, uă hìu bơnhă ndai tàm ƀòn Chiết neh ai is git nđờ rhiang thơk vuông ù tềng bồ đap hìu nàng pờ ơnàng gùng lòt tàm ƀòn, pơgồp bơnah bal mờ ƀòn lơgar bơt bơtàu ƀòn lơgar pa. Bal mờ hơ̆, jat gùng dà là dà lơgar mờ làng bol lơh bal, làng bol neh tă pơgồp priă jền, phan bơna, ngai lơh broă nàng lơh niam wơl hìu chài rơgơi ƀòn, blơi tai phan bơna nàng ngui ai ală broă lơh bal in.

Ƀòn Chiết tŭ do geh rlau 300 hìu bơnhă mờ mờr 2 rbô nă cau, ndrờm là kòn cau Rơđê, uă ngan là lơh suơn sre, tam kơphe bơrlŭ mờ tiêu bal mờ 2, 3 bơta chi sa plai. Jat ồng Y Kuă Êñuôl, kra ƀòn ƀòn Chiết đơs, làng bol tàm ƀòn sùm tam klac, lơh ngan brồ guh lơh sa. Kơnờm bơh hơ̆, rài kis ngai sơlơ kơ̆ kơljap, priă lơh geh kờp bal dùl nă cau geh mờr 34 tơlak đông dùl nă cau dùl nam. Tàm ƀòn tŭ do mìng gam 8 hìu bơnhă rƀah mờ 28 hìu bơnhă ndrờm bè cau rƀah: “Bơh bơta tam klac, bơta đơng lam bồ bơh Đảng mờ dà lơgar dê, ai tơlik ală gùng dà, broă lơh ai làng bol in, tơnguh niam rài kis ai tơl hìu bơnhă in. Tơl nă cau tam klac, dùl nùs bal tàm dong kờl bal mờ gơp. Kơnờm bơta ring bal dùl nùs, tam klac hơ̆ mờ bol hi geh bơta bơtàu tơnguh, lơh sa ngai sơlơ bơtàu tơnguh rlau”.

Kung jat ồng Y Kuă đơs, nàng gơtùi geh bơta ring bal dùl nùs, tam klac bơh làng bol dê den geh gơnoar broă uă ngan bơh ală cau atbồ, kwang bàng tờm ngan thôn ƀòn dê, lam lài tơn tàm ală broă lơh, ală srơh, bơto pơlam tơn nàng làng bol in gơtùi gŏ cồng nha mờ lơh jat. Ồng Y Nguôl Êban (mat mờng hòi là ồng Hằng), Ƀí thư Ci ƀộ ƀòn Chiết pà git, ală cau tàm mpồl atbồ is ƀòn sùm ngui niam gơnoar broă lơh krơh mờ lơh niam broă lơh hòi jà làng bol nàng bơt bơtàu mpồl tam klac dờng tàm làng bol, gàr niam bơta pràn tàm dơlam is nàng lơh gơs ală jơnau kờñ bal: “Mblàng yal làng bol in nàng dong làng bol git mờ ờ gơtìp pơn jồ, bơ chồt halà lơh tìs mờ adat boh lam mờ jơnau sồr bơh dà lơgar dê. Kơnờm bơh hơ̆ mờ ƀòn lơgar geh ring lơngai, ờ geh bơta dră wơl dà lơgar halà gơlik geh ală broă ờ niam, mìng tơrgùm kơlôi rơcang lơh broă, bơtàu tơnguh lơh sa, bơt bơtàu ƀòn lơgar mờ muh mat phan bơna ngai sơlơ niam bơnĕ”.

Là ù tiah krơi is mờ nggùl khà kờp làng bol là cau jat yàng mờ 40% là cau jơi bơtiàn kòn cau dùl êt nă cau, xã Ea Tiêu, kơnhoàl Cư Kuiñ neh geh uă bơta lơh ngan tàm broă tam klac, tơrgùm bơ tòm làng bol nàng at tê bal bơt bơtàu ƀòn lơgar pa. Jat ồng Nguyễn Văn Dũng, Củ tịc Ủy ƀan Ñân zân xã Ea Tiêu pà git, broă lơh mblàng yal mờ hòi jà làng bol sùm geh sền gròi. Kơnờm bơh hơ̆ neh gơtùi hòi jà bơta pràn tàm dơlam is tàm mpồl bơtiàn làng bol ơm kis nàng lơh niam wơl, bơt bơtàu phan bơna gùng lòt; tuh bê tông, lă mờ cài gùng lòt tàm ƀòn; uă gơl gùng dờng tàm ƀòn làng bol ơm kis neh geh đèng sòl àng. Pơgồp bơnah bơt bơtàu xã tơl khà lơh gơtùi 16 tàm 19 broă lơh, dong xã tơl khà ƀòn lơgar pa tàm nam 2022: “Làng bol kung dùl nùs ring bal, pơgồp bal bơta pràn mờ dà lơgar nàng lam lơh ală broă lơh bè bơt bơtàu ƀòn lơgar pa. Mùl màl bè bơcri priă lơh pa, lơh niam wơl hìu chài rơgơi ƀòn, phan bơna gùng lòt, ngai sơlơ tơnguh niam rài kis làng bol. Nam 2023 pơn jat tai lơh jat Nghị quyết bơh Đảng ƀộ dê, bơt bơtàu broă lơh, broă rơndap lơh mùl màl bơh nam 2023 dê nàng bơtàu tơnguh lơh sa mpồl bơtiàn, sền gàr lơngap lơngai, sền gàr dà lơgar mờ pơn jat tai sơlơ chồl pràn nàng lam lơh gơtùi broă lơh bơt bơtàu ƀòn lơgar pa, lơh ngan bơt bơtàu tơl khà mờ tơl khà gơguh jơnhua”.

Tàm nùs nhơm chờ hờp bơh ală ngai bồ nam pa dê, xã Ea Tiêu ngai sơlơ chờ hờp rlau tàm tơngai lơh gơs broă lơh bơt bơtàu ƀòn lơgar pa mờ lơh ngan lơh gơtùi broă lơh bè ƀòn lơgar pa gơguh jơnhua. Mờ bơta ring bal dùl nùs, tam klac bal bơh làng bol dê, bơta lơh ngan bơh jơh gùt anih lơh broă cíñ trị dê, muh mat ală thôn ƀòn tàm xã Ea Tiêu geh ngai sơlơ tam gơl niam, rơhời ndrờm bal mờ bơta bơtàu tơnguh bơh ƀòn lơgar, dà lơgar dê ngai sơlơ pas sơm, niam bơnĕ.