Jat hơ̆, Sở Y tế ƀòn dờng Hồ Chí Minh rơp dong kờl gah lơh sơnơm ală càr Tây Nguyên tàm broă tơnguh cồng nha lơh geh tàm broă lơh rơcang sơndră kòp bơtờp; dong kờl tàm jàu bơta chài măi mok đah ală Hìu sơnơm dờng, cuyên khoa kâp dut ndơl tàm ƀòn dờng Hồ Chí minh mờ ală Hìu sơnơm kâp càr tàm tiah Tây Nguyên. Ồng Nay Phi La, Kwang atbồ Sở Y tế càr Dăk Lăk pà git, tơnơ̆ tŭ ring bal ală tơngume lơh broă bal, Sở neh geh sră nggal sồr ală hìu sơnơm tàm càr geh broă rơndap lơh ngan ngồn nàng lam lơh jat geh cồng nha tơngume pơgồp bal. Kờp dŭ tơnơ̆ bơh 3 tus 6 nhai, gah lơh sơnơm càr Dăk Lăk rơp gơtùi lơh 2, 3 bơta chài măi mok jrô ơnàng mờ ƀòn dờng Hồ Chí Minh neh mờ gam lơh.