Bơh nam 2023 tus ngai 19 nhai 3 nam 2024, càr Dăk Lăk geh 8 nă cau gơtìp chơ̆t tài kòp sơnrang, uă dơ̆ 3 tàm gùt lơgar. Mìng is bơh bồ nam tus tŭ do, càr do geh 4 nă cau gơtìp chơ̆t tài kòp sơnrang, ndrờm mờ khà cau chơ̆t tài kòp sơnrang tàm gùt lơgar nam 2023.

UɃÑZ càr Dăk Lăk pà git, nàng tơmù broă di gơlan gơtìp kòp sơrang kung bè tơmù khà cau chơ̆t tài kòp sơnrang, ală gah lơh broă geh gơnoar mờ ală tiah pal tơrgùm ală bơta pràn nàng lơh jăt nền nòn ală broă rơndăp lơh sơndră mờ kòp sơnrang mờ càr neh geh ai. Jăt UɃÑZ càr đơs, broă lơh geh cồng nha ngan nàng tơmù kòp sơnrang là tơnguh khà cit vaccine rơcang sơndră mờ kòp sơnrang, lơh ngan cit vaccine kòp sơnrang ai rơlao 70% khà so mèo tàm tơngai bơh nam 2022 tus 2025, wèt tus geh 80% tàm tơngai bơh nam 2026 tus 2030.