Tân Lập là dùl tàm 3 xã kơnhoàl Kon Rẫy, càr Kon Tum dê ờ geh ƀák sĩ. Y sỹ Đa khoa mò Nguyễn Thị Thanh Tuyền, Atbồ hìu sơnơm xã Tân Lập pà gĭt, jơnau tờm gơbàn là nhai 01 pa do ƀák sĩ lơh broă tàm Hìu sơnơm xã geh ntrờn tus lơh broă tàm Cơldŭ kham kòp dờng tàm tiah Đăk Rve.

Ờ gam ƀák sĩ, lơh broă ờs mờng bơh Hìu sơnơm xã Tân Lập dê ờ hoan gơtùi lơh broă tai, geh tŭ rơndeh rơndồ măi mok geh bơcri priă blơi tŭ do lời gời lơm. Y sỹ Đa khoa mò Nguyễn Thị Thanh Tuyền, đơs:“Tŭ mờ ờ geh ƀák sĩ geh bàr pe phan bơna kờñ ngui tus broă lơh ờs mờng bơh ƀák sĩ dê pơn yơu bè: siêu âm, điện tim den hìu sơnơm xã ờ gơtùi lơh tai. Geh bàr pe nơm măi mok lơh tàm hìu sơnơm xã kờñ geh ƀák sĩ den sơnơm tơm ba gơ jat bal sơl, Hìu sơnơm xã geh ƀák sĩ den sơnơm hơ̆ sồng geh ngui”.

Tàm kơnhoàl Kon Rẫy, càr Kon Tum, bơta ờ tơl ƀák sĩ neh jŏ jòng tàm uă nam. Nam 2023 Hìu sơnơm kơnhoàl geh jàu 32 nă ƀák sĩ, mơya bơta geh ngan tŭ do mìng geh 17 nă ƀák sĩ lơm. Bơh nam 2019 tus tŭ do neh geh 7 nă ƀák sĩ dan ơm rlô broă tàm tŭ mpồl lơh broă ờ sac rơwah geh cau lơi tai. Ƀák sỹ ồng Nguyễn Luận, Phó Kwang atbồ drơng broă Hìu sơnơm kơnhoàl Kon Rẫy pà gĭt, broă ờ tơl 15 nă ƀák sĩ gam lơh mpồl lơh broă gơtìp uă ngan kal ke tàm broă bơto bơtê, tơnguh uă bơta gĭt wă ờs mờng kung bè broă kham sơm kòp ai làng bol in.

Ƀák sỹ ồng Nguyễn Luận, đơs: “Ờ tơl ƀák sĩ gơrềng tus broă lơh ờs mờng kham sơm kòp, sền gròi pràn kơl dang să jan ai làng bol in mờ broă lơh rcang lài kơryan kòp tàm ƀòn lơgar, ngan là lam lơh ală broă drơng măi mok pa nàng tơnguh uă cồng nha sền gròi cau kòp in, tơrmù ƀà cau kòp pal ntrờn hìu sơnơm gơlam tus priă jền hoàc huơr tàm tŭ sơm kòp”.

Gah lơh sơnơm càr Kon Tum tŭ do geh 539 nă ƀák sĩ, tàm hơ̆ kơnă càr geh 294 nă ƀák sĩ, kơnă kơnhoàl 146 nă ƀák sĩ mờ kơnă xã 99 nă ƀák sĩ. Cau lơh sơnơm chài ngan, Ƀák sĩ CKII Trần Ái, Phó Kwang atbồ Hìu sơnơm càr Kon Tum pà gĭt, bơh tŭ do tus nam 2030 càr pal geh tai pơgap 100 nă ƀák sĩ nàng bơtơl, ala pa nàng gàr niam khà bơh 10,5- 11 nă ƀák sĩ tàm 10 rơbô nă làng bol tàm tŭ hơ̆ broă sac rơwah ƀák sĩ gam gơtìp kal ke uă ngan. Ƀák sĩ CKII Trần Ái, đơs:“Sac rơwah mpồl ƀák sĩ tàm hìu sơnơm ƀòn lơgar là kal ke ngan. Pơn yơu bè nam 2023 mờ broă jàu sac rơwah ai Hìu sơnơm ƀòn lơgar dê là 108 nă ƀák sĩ mơya bol añ mìng sac rơwah geh 23 nă ƀák sĩ. Kal ke tai là ală ƀák sĩ neh jơh bơsram đại họk cíñ quy đa khoa ờ hoan geh ngan bè hìu sơnơm xã, hìu sơnơm kơnhoàl, ờ kờñ rê. Do là dùl broă kal ke ngan gơwèt mờ bol añ”.

Tềng đap bơta ờ tơl ƀák sĩ, gah lơh sơnơm càr Kon Tum gam lơh ngan mờ broă lơh jat jat tàm pơdar ƀák sĩ đah ală hìu sơnơm; ai ƀák sĩ tàm ală Hìu sơnơm xã rềp mờ tiah anih tờm ntrờn tus tàm tiah sar lơgar ngài halà tiah geh uă cau kòp... Mơya, do mìng là broă lơh tềng đăp mat lơm. Bè jŏ jòng gah lơh sơnơm càr Kon Tum gam kờñ ngan geh ală broă lơh pràn rlau tai nàng bơsong bơta ờ tơl ƀák sĩ bè là bơto bơtê jat ù tiah mờ bơto bơtê sac rơwah cau bơsram.

Pa do, tàm dơ̆ lơh broă mờ Mpồl lơh broă bơh Cíñ phủ dê, mò Y Ngọc, Phó Củ tịc Ủy ƀan Ñân zân càr Kon Tum neh dan mờ Cíñ phủ sền sơwì, geh gùng dà broă lơh krơi is nàng bơto bơtê ƀák sĩ tàm ală tiah, dong càr bơsong bơta ờ tơl ƀák sĩ tàm ƀòn lơgar bè tŭ do. Mò Y Ngọc kung đơs là, dilah ờ geh gùng dà broă lơh bơto bơtê ƀák sĩ là làng bol jơi bơtiàn dồ ết nă cau, cau ơm kis tàm ƀòn lơgar den bơh 5 tus 10 nam tai tàm tiah sar lơgar ngài, tiah làng bol jơi bơtiàn dồ ết nă cau bơh càr Kon Tum dê rơ̆p ờ geh ƀák sĩ tai.