Tiah kòp gơlik geh tàm ơdŭ lơ̆p lá, hìu bơsram mầm non Hoa Lan, tàm thôn Chiềng, xã Ya Lốp, kơnhoàl Ea Súp. Cau kòp mờ tềl tơngŏ kòp duh să, jê rơnồng dờ, ờ gơdan sa, sồt tàm mbùng bơr mờ gơlik toh dà tàm tê, jơng, kồ jơng mờ pơnai tơr è. Ală kơnòm bơsram gơbàn kòp neh geh hìu bơsram ai rlô bơsram mờ sồr mè bèp kơnòm dềt jun kơnòm dềt tus kham tàm hìu sơnơm. Tơnơ̆ tŭ geh gĭt tiah gơbàn kòp, Hìu sơnơm kơnhoàl Ea Súp neh sồr Hìu sơnơm xã Ya Lốp pơgồp bal mờ Hìu bơsram lùp sền bơta bơtờp kòp bơh ală cau kòp dê; bồm dà sơnơm lơh kloh khuẩn mờ rào goh ơdŭ bơsram, phan nhơl bơh kơnòm dềt dê.

Jat ồng Dương Văn Hải, Phó khoa Gròi sền kòp tê jê să- Hìu sơnơm kơnhoàl Ea Súp yal, tus mho ngai 2/04, bơdìh mờ 8 nă cau geh kòp tàm Hìu bơsram mầm non Hoa Lan, tàm ù tiah xã Ya Lốp dê, gĭt gŏ tai 1 nă kơnòm dềt geh tềl tơngŏ kòp jơng- tê- bơr. Broă lơh cang tiah, kơryan kòp mờ bơto pơlam rcang lài kơryan kòp gam geh Hìu sơnơm kơnhoàl dê lam lơh mhar ngan.