Jăt jơnau kơlôi sơnơng bơh ală cau jăk dê, khà C3, C4 geh lơh gơs gơrềng tơn mờ broă bruh bơh bơnơm ồs Chư Bluk pơgăp mờ do di pơgăp 600 rơbô nam. Trồm rơgồng C3, C4 gơtìp bal, mờ jòng mờr 1 rơbô thơ̆k. Bàr trồm rơgồng do gơwèt trồm rơgồng bơnơm ồs jòng ngan tàm Tiah đah jum măt tơngai lik câu Á dê mờ ù tiah krơi is ngan mờ geh bơta kwơ tàm broă kơlôi sơnơng uă.

Lài mờ hơ̆, càr Dăk Nông neh bơyai lơh Dơ̆ dờp Pang sră rơndăp tăp sèng Tiah lời wơl dà lơgar Trồm rơgồng C6-1, gơwèt mpồl trồm rơgồng bơnơm ồs tàm Krông Nô. Trồm rơgồng C6-1 geh sền là tiah lời wơl niam bơnĕ ngan mìng geh tàm lơgar Việt Nam mờ tiah Đah jum măt tơngai lik câu Á dê. Do ờ mìng là dùl tiah lời wơl ù tiah mờ gam là dùl tiah jòi nàng git phan kwơ yau, tiah jòi gŏ ƀồc ntìng cau rài lài do mờ uă tăp niam chài pơgăp mờ do bơh 6 rơbô nam lài.

Bơh broă jòi rồ sền tàm trồm rơgồng C6-1 mờ C6, ală cau jăk jòi phan kwơ yau neh gŏ uă bơta phan là ală phan lơh broă mờ lŭ, bal mờ ù buh, ntìng phan 4 nơm jơng, ngkàr, tiah tềl bơnhă ồs. Kwơ màng là broă gŏ 3 tiah ƀồc yau, tiah tềl ƀồc bơh 10 nă cau rài yau. Broă dơ̆ sơnrờp jòi gŏ bơtô ƀồc cau rài yau tàm ală trồm rơgồng bơnơm ồs là bơta jòi gơ̆ geh nùs nhơm tờm tàm gah jòi phan kwơ yau.

Tàm bồ nam do, kơnhoàl Cư̆ Jút, neh bơyai lơh dờp pang sră rơndăp tăp sèng phan lời wơl kấp càr gơwèt mờ ù tiah niam Bơnơm ồs Băng Mo, mpồl ƀòn 4, ƀòn drà Ea Tling. Jăt jơnau kơlôi sơnơng bơh ală cau jăk dê, tàm tiah kông viên địa cất gùt plai ù UNESCO Dăk Nông geh 5 bơr bơnơm ồs, tàm hơ̆ geh: Nơnơm ồs Nâm B’lang, bơnơm ồs Nam Ka, bơnơm ồs Nam Gle, kơnhoàl Krông Nô, bơnơm ồs Nâm Dơng mờ bơnơm ồs Băng Mo, kơnhoàl Cư̆ Jút.

Bơnơm ồs Băng Mo geh rùp rài niam bơnĕ ngan. Bơnơm ồs do geh rùp bè đoan mờ geh thòng tàm gùl, jăt gah bơr geh rùp oval, tàm bơr geh rùp wil mờ geh pòt tơlik dà là bơta niam krơi is ngan ai bơta bruh tờm dê. Bă ù gùt dar tàm tiah geh sền gàr là di pơgăp 13 lồ ù.

Broă geh uă tiah geh dờp tiah lời wơl dà lơgar, tiah lời wơl kấp càr là broă lơh kwơ màng pơgồp bal tàm broă sền gàr, prăp gàr mờ ngui bơta kwơ phan lời wơl ù tiah, uă bơta siñ họk bơh Kông viên địa cất gùt plai ù UNESCO Dăk Nông dê. Bơh tŭ hơ̆, lơh pràn broă hòi jà bơta pràn bơcri priă tàm broă lơh kơ̆ kơl jăp ù tiah niam, lơh geh ală bơta phan lòt nhơl, pơgồp bal tàm broă bơtàu tơnguh lơh sa mpồl bơtiàn, tơnguh uă rài kis làng bol in.