Jat sền pơrjum dơ̆ 7, Quôk hội khoă XV, uă ngan cau tĕ khà tàm càr Gia Lai, ngan là cau tĕ khà tiah jơi bơtiàn dồ ết nă cau sền gròi tus dơ̆ lùp mờ hơ jơnau lùp bơh Ƀộ trưởng Ƀộ Văn hoá, Thể thao mờ Zu lịc ồng Nguyễn Văn Hùng dê. Cau tĕ khà kơ̆p kờñ gah lơh broă niam chài rơ̆p lơh geh ală bơta, broă lơh dong kờl nàng ngui niam bơhiàn niam chài jơi bơtiàn dê, bơtàu tơnguh lòt nhơl bơtàu tơnguh rài kis ai làng bol in.

Cau tĕ khà mò H’ Uyên, ơm tàm kơnhoàl Chư Păh, càr Gia Lai, đơs: “Tơnơ̆ pơrjum să tờm añ kơ̆p kờñ ngan Quôk hội sền gròi rlau tai bè broă prap gàr bơhian niam chài niam bơnĕ bơh jơi bơtiàn càr Gia Lai dê, tiah làng bol jơi bơtiàn dồ ết nă cau. Prăp gàr ală bơhiàn niam chài bè ală hìu rông pal geh lơh di mờ bơta bè ờs ngan, ală broă tàñ ồi bơh yau mờ ală broă tàñ phan mờ tê, drờm lơh wơl ală dơ̆ lơh chờ bơh jơi bơtiàn tàm tiah do dê nàng tơnơ̆ do rơnàng kơnòm să in gơtùi gĭt wă rlau mờ prăp gàr tus rài tơnơ̆ do bơh rơnàng kơnòm să tơnơ̆ do dê”.