Tàm 5 ngai ơm rlô chờ, kơnhoàl Kon Plông, càr Kon Tum, tiah geh Tiah lòt nhơl ƀòn brê bơnơm Dà lơgar Măng Đen neh wă rlau 55 rơbô dơ̆ năc lòt nhơl, ndrờm mờ rlau 10 rơbô dơ̆ pah ngai mờ uă ngan là năc lòt nhơl tàm lơgar. Kờp jơh priă lơh geh lòt nhơl jơh gùt kơnhoàl dê tàm dơ̆ ơm rlô chờ kờp dŭ rlau 19 tơmàn đong, geh bal broă lơh ơm kis ing, phan sa, lòt sền tiah lòt nhơl...

Ồng Đặng Đình Toán, Lam bồ Cơldŭ lơh broă Niam chài, Jak chài mờ Yal tơngĭt jơnau kơnhoàl Kon Plông pà gĭt, nùs nhơm lơngăp lơngai, rềp mềr mờ uă broă lơh gơ kờñ neh pơgồp bơnah đơs nền bơngă ngai sơlơ pơn rơ ngan bơh Măng Đen dê tàm sră wăc sềr rùp lòt nhơl Tây Nguyên mờ jơh gùt lơgar dê.