Uă nam do, làng bol thôn 6, xã Dăk Buk So, kơnhoàl Tuy Đức, càr Dăk Nông pơn yờ să ngan tài geh Hìu duh khoai Bơtau Hùng dờng niam, king crŭ tŭ lơi kung bềng lìu nhŭ ñàng geh chu. Hìu duh khoai Bơtau Hùng geh lơh bơh nam 2003, ơnàng 250 thơk vuông bơh làng bol ƀòn bal càr Phú Thọ tàm xã Dăk Buk So ai is ù, tă pơgồp priă nàng lơh.

Ồng Chử Văn Chúc, Kwang atbồ Mpồl bơyai lơh chờ duh kah Bơtau Hùng tàm do pà git, ală nam pa lơh, mìng geh làng bol tàm xã Dăk Buk So tus duh khoai tàm ală ngai chờ, sa tềp, ngan là ngai duh kah Bơtau sơn rờp dà lơgar. Tơnơ̆ hơ̆, làng bol tàm uă tiah ndai tàm càr kung tus duh khoai sơl: “Jơh ală làng bol ƀòn bal Phú Thọ mut tàm do lơh sa ngài ngan. Sơlơ ngài kàr lơi den sơlơ kah ƀòn kàr hơ̆. Hơ̆ sồng làng bol ai is ù, tă pơgồp priă jền nàng lơh hìu duh khoai là dùl anih nàng duh khoai gah huềng. Bol hi bơ tòm tơrgùm rê ndo, bè nùs nhơm den tơrmù ƀà bơta kah ƀòn, nàng rơnàng tơnơ̆ do ală kòn ală sau tàm pơdờn jat jờng rài bèp, rài bi nàng lơh broă lơh duh khoai do”.

Tàm bơnơm Phượng Hoàng gơ wèt tiah lòt nhơl ñrùh dà Prenn, sơnah ƀòn 3, ƀòn dờng Dà Làc, càr Lâm Đồng kung geh hìu duh khoai ală Bơtau Hùng geh lơh nam 2002 jat bè rùp Hìu duh khoai Bơtau Hùng tàm bơnơm Nghĩa Lĩnh, càr Phú Thọ. Tàm do kung geh Hìu duh khoai hờ đang duh khoai Lạc Long Quân mờ Âu Cơ, Hìu duh khoai tàm gùl duh khoai Bơtau dơ̆ 7 mờ Hìu duh khoai hờ đơm duh khoai bơtau dut ndơl bơh ală rài Bơtau Hùng dê. Neh geh tŭ uă dơ̆ tus bal dơ̆ lơh chờ Duh kah Bơtau Hùng tàm do, bi Nguyễn Thị Minh Hiếu ơm tàm sơnah ƀòn 3, ƀòn dờng Dà Làc pà git: “Là dùl nă cau Dà Làc, pah nam añ ndrờm bal mờ hìu bơnhă tus ndo nàng tus bal dơ̆ duh kah. Añ kờñ ală kòn geh tŭ niam jòi git bè bơhiàn ờs mờng jơi bơtiàn Việt Nam dê, mờ kung là dùl tŭ niam nàng bol hi tus bal ală broă lơh niam chài mpồl bơtiàn nàng pơgồp bơnah lơh li la rlau tai niam chài jơi bơtiàn Việt Nam dê”.

Dơ̆ duh kah Bơtau Hùng kung geh lơh yŭ rơyùm ngan pah nam tàm Tiah tềl kah yau dà lơgar Hìu duh khoai ală cau geh dà kơl hề mờ dà lơgar Lạc Giao, ƀòn dờng Buôn Ma Thuột, càr Dăk Lăk mờ bơta tus bal bơh ală kwang đơng lam bồ càr, ală sở, gah broă lơh mờ ală rơnàng làng bol dê. Tơl nă cau ndrờm ki ngàm chu ñàng kah kơlôi, lơh duh khoai huềng Bơtau sơn rờp dà lơgar. Nam do, Dơ̆ duh kah Bơtau Hùng geh lơh yŭ rơyùm tàm 2 ngai (ngai 9 mờ ngai 10 nhai 3 nam lơgar he dê) mờ ală broă lơh li la bè klơm mbar lơm pòng, mbar ƀŏ, Dơ̆ bơyai lơh Tiên thường mờ Dơ̆ chu ñàng ơn bơkàu, pơ dơng ơn phan duh khoai ai Bơtau sơn rờp dà lơgar Bơtau Hùng in. Ồng Lại Đức Đại, Phó Kwang atbồ Sở Văn hóa, Thể thao mờ Zu lịc càr Dăk Lăk pà git: “Tŭ tus mờ Dơ̆ duh kah Bơtau sơn rờp dà lơgar tàm Hìu duh khoai Lạc Giao tàm ƀòn dờng Buôn Ma Thuột, ờ mìng bol he kah kơlôi bè Bơtau sơn rờp dà lơgar lơm, mờ do gam là anih tàm tơrbŏ bal bơta tam klac đah cau yoan mờ kòn cau. Pah nam tàm Ngai duh kah Bơtau sơn rờp dà lơgar ngai 10/3, làng bol jơh nùs ngan sền gròi mờ tus nàng chu ñàng, hòi dan dà lơgar lơngăp lơngai, làng bol ring lơngai mờ hòi dan pràn kơldang să jan mờ kung wèt tus nùs nhơm tam klac tàm hìu duh khoai kuơmàng do”.

Kung jat ồng Lại Đức Đại đơs, Rơndap broă lơh Hìu duh khoai Bơtau Hùng bơh ù tiah Tây Nguyên dê tàm Dăk Lăk bơh Ủy ƀan Ñân zân càr Dăk Lăk lam lơh neh geh pơyua Ƀộ Văn hóa, Thể thao mờ Zu lịc nàng yal Thủ tướng Cíñ phủ in. Hìu duh khoai geh lơh jat broă lơh mpồl bơtiàn tă pơgồp tàm bă ù ơnàng mờr 20 lồ, lơh tàm bơnơm Cư Mblim, gơ wèt ù tiah xã Ea Kao, ƀòn dờng Buôn Ma Thuột mờ xã Ea Tiêu, kơnhoàl Cư Kuiñ. Broă tă priă lơh Hìu duh khoai Bơtau Hùng nàng kờñ ai gŏ nùs nhơm ưn ngài uă ngan bơh làng bol Tây Nguyên gơ wèt mờ ală bèp ồng lài do neh geh dà kơl hề bơt bơtàu mờ sền gàr dà lơgar. Mờ kung drơng jơnau kờñ pin dờn bơh gal ngan làng bol càr Dăk Lăk dê kung bè ală càr Tây Nguyên dê.

Tiah lơi geh cau Việt Nam ơm kis là tiah hơ̆ geh duh khoai Bơtau Hùng. Ală hìu duh khoai Bơtau Hùng tàm Tây Nguyên neh dong làng bol tiah do ai tơnggŏ nùs nhơm ki ngàm, kah ưn ngài ală rài Bơtau Hùng.