VOV4.M'nông:  Rnoh nchih rgum ôi 10/6 bah Bộ Y tế Ấn Độ an saơ dak dja hŏ năl geh 6.148 nuĭh khĭt tă bah COVID-19 tâm 24 mông aơ. Aơ lah rnoh nuĭh khĭt tĭng nar âk ndal kơp ntơm bah nar nuh srê ntoh luh ta dak dja, âk rlău 3 tơ̆ rđĭl đah rnoh dơi mbơh tâm ăp nar dăch aơ n'hanh âk rlău 2 tơ̆ rđĭl đah rĭng geh bah 7 nar rlău aơ, n'hao lĕ rngôch rnoh nuĭh khĭt ta dak dja hao  359.676 nuĭh. Nkô̆ jêng geh tât nău dja lah tă bah Sở Y tế bang Bihar nar 9/6 rgâl âk rnoh nuĭh khĭt ta bang dja, ntơm bah ta nâm 5.500 nuĭh hao 9.429 nuĭh, jêng lah hao tay 3.900 nuĭh lôch uănh năl di tay. Tâm rnôk nê, rnoh nuĭh ntưp Covid-19 mhe ta dak dja hao âk tay ta rnoh 100.000 nuĭh/nar tâm nar tâl 3 mbro đah 94.000 nuĭh dơi năl geh ntưp tâm 24 mông aơ, n'hao lĕ rngôch rnoh âk nuĭh ntưp lah 29,18 rkeh nuĭh./.  

Nuĭh rblang: Điểu Thân