VOV4.M’nông – Knŭng hôm 2 pơh tay mbra ƀư rơh săch têh Liên bang ta Đức gay săch luh chính phủ mhe n’hanh nuĭh mbra ndơn wa Angela Merkel tâm nău ƀư Thủ tướng Đức. 3 nuĭh dơi săch bôk năp ntoh măt an 3 đảng phái têh ta Đức mhe geh rơh tâm rlăch tal 2 tâm tivi dak aơ. 3 nuĭh dơi săch geh ăp nuĭh wa Olaf Scholz, ntoh măt đảng Dân chủ-Xã hội (SPD), wa Armin Laschet, kruanh đảng Dân chủ Thiên chúa giáo-CDU n’hanh wa Annalena Baerbock, kruanh đảng Xanh, lĕ rgum tâm rlăch nău mô dăng bah ăp ding. Jêh rnôk tâm rlăch ta tivi jŏ nklăp 90 mnĭt lôch jêh, du rơh sroh ôp đêt bah kênh tivi ARD an saơ, wa Olaf Scholz mât tay nău dơi nkôp đah 2 nuĭh ƀa ƀă. Na nê̆, geh nklăp 41% rnoh phiếu kơl wa Alaf Scholz, 27% an wa Armin Laschet n’hanh 25% an wa Annalena Baerbock.

Nŭih rblang: Y Sưng Phê Ja