VOV4.M’nông: Ôi lơ 22/3, wa Bùi Tuấn Quang, Kruanh Rnâng kan Dân vận Trung ương hŏ geh nar pah kan đah Thành uỷ Pleiku, n’gor Gia Lai mpeh nau ƀư nau kan kơt mrô 120-KL/TW bah Bộ chính trị mpeh nau lŏ ntrŭt dăng, n’hao nâp, săk tam bah nau kan ndâk ndrel ƀư ân dơi nau kan ƀon lan ƀư tơm tâm dâng. Rơh rlau aơ, gưl uỷ n’gâng kan, MTTQ, ăp rmôt kan chính trị-rêh jêng tâm nkuăl ƀon têh Pleiku hŏ ntrŭnh ƀư âk nau kan ƀon lan ƀư tơm tâm dâng. Rnôk aơ, 22 xã, phường ndrel ăp ntŭk kan bah nkuăl ƀon têh hŏ ƀư nâp, jăp Rnâng kan rđau kan, ntrŭnh nau kan ndrel pă nau kan ân ăp nŭih tĭng nau ntrŭnh. Ntoh nau ta nar pah kan, Groi Rnâng kan rgŏ jă Trung ương Bùi Tuấn Quang lah rjăp rơh tât, nkuăl ƀon têh lŏ ntrŭnh ăp nau ntrŭnh mrô 120 ndrel ăp nau ntrŭnh êng mpeh ƀon lan ƀư tơm tâm dâng ân tŏng, jru, ntrŭt dăng nau kan rgâl mhe hành chính, ngăn lah nau vơt ƀon lah ndrel n’hao nau tâm nchră ma ƀon lan.

Nŭih rblang: H’Thi