VOV4. M’nông: Wa Lê Văn Thanh, Thứ trưởng Bộ Lao động – Thương binh n'hanh Xã hội mhe geh rơh pah kan đah UBND n'gor Dak Lak mpeh nău ôp uănh nô nău tĭng ƀư ăp trong kơl, bôk nău kan mpeh n'hŭch ach o, nuĭh kan, nău kan ta Dak Lak. Lvang năm 2016-2020 Dak Lak hŏ ntêm an bơi 900 rmen prăk an Bôk nău kan gưl neh dak n'hŭch ach o jŏ jong. Tơm ndơ dja hŏ kơl Dak Lak ntuh kơl ƀư tay geh âk ndơ dŏng, ntop kơl hun hao ƀư njêng, âk trong geh joi sa, pơk hvi trong leo ƀư n'hŭch ach o, tĭng ƀư trong ntop kơl manh tơm prăk dơh thuk hŏ hun hao ƀư njêng, tuch tăm mât rong, ntop kơl mpeh ntĭm nti, dak si, mât uĕh ntŭk gŭ rêh, jay gŭ...tâm 5 năm aơ, bơi 252 rbăn tơ̆ rnăk ach o n'hanh ăp nuĭh dơi kơl dơi manh tơm prăk ngân hàng chính sách đah rnoh prăk bơi 7 rbăn rmen prăk.

Wa Lê Văn Thanh, Thứ trưởng Bộ Lao động Thương binh n'hanh Xã hội rnê âk ăp nău nsrôih tâm pah kan n'hŭch ach o n'hanh nta joi nău kan an nuĭh kan ta Dak Lak, yơn lah gay hŭch ach o jŏ jong, Dak Lak ân ndơ̆ luh trong kan na nê̆, kloh rvah n'hanh ân nkre nău dơn kan an nuĭh mât bôk kan bah tĭng nkuâl. Nkre an ƀư trong leo ntop kơl nuĭh râng pah kan tuch tăm mât rong, uănh năl nău ngăn geh mpôl kan gay geh trong nkra ntĭm nti nău kan, ntop kơl joi nău kan tâm di./.

Nuĭh rblang: Điểu Thân