VOV4.M’nông: Khay 11 năm e, ntoh nau ta Quốc hội, Thủ tướng Nguyễn Xuân Phúc đă nau tăm du rmen tơm si rih tâm 5 năm 2021-2025. Lơ 31/12/2020, Thủ tướng ntrŭnh nau rđau mrô 45 mpeh nau ƀư kan “tết tăm tơm si” ndrel n’hao nau mât, hun hao bri ntơm bôk năm 2021. Ndrel ma lam dak, ăp n’gor tâm nkuăl Tây Nguyên dôl nsôih kơt tĭng nau kan tăm du rmen tơm si ndrih-yor dak Việt Nam ndrih.

Mhe aơ, ta nkuăl ƀon têh Gia Nghĩa, UBND n’gor Dak Nông ƀư kơt tĭng Bôk nau kan tăm du rmen tơm si rih. Đah nkô̆ “yor dak Việt Nam ndrih” bôk nau kan hŏ rgum geh rlau 2000 cán bộ, nŭih kan, đoàn viên, druh ndăm ndrel nŭih ƀon lan tâm nkuăl ƀon têh Gia Nghĩa râng kơt. Jêh nar rgŏ jă, rlau 300 tơm sao ôch hŏ geh ăp nŭih nsum tăm tâm ăp trong hăn bah ntŭk ntrơn mhe Dak Nur B, Phường Nghĩa Trung, nkuăl ƀon têh Gia Nghĩa. Wa Lê Trọng Yên, Groi Kruanh UBND n’gor Dak Nông mbơh, bôk nau kan tăm tơm si ndrih bah n’gor mra lŏ geh ntủ\t dăng, rgum âk lơn nŭih râng:

  ‘N’gor mra ndâk ăp nau kan, nau kơl an gay tăm tơm si nchrah, tăm tâm bri tâm rgop, tal 3 lah tăm tâm bri rgum âk, tal puăn lah hun hao dăng mpeh tăm bri gay ma dŏng tăch. Ăp tơm geh ân lah geh nau dơi nkre lah tăm jêng bri nkre lah tăm tơm ân geh văng sa kơt cao su, điều, mắc ca, ăp tơm lah ba lơ nê lah nsum phung hên mra tăm tâm nkuăl geh mih nar tâm di. N’gor Dak Nông nsôih tât lôch năm 2025 mra n’hao nau nkŭm n’hâm bah bri bah n’gor hao rlau 40%”.

Dŭt khay 3 năm mhe rlau, n’gor Gia Lai ƀư nau rgŏ ja ưtăm tơm si “yor dak Việt Nam ndrih” tâm xã Biển Hồ, nkuăl ƀon têh Pleiku. Ta aơ, wa Võ Ngọc Thành-Kruanh UBND n’gor Gia Lai mbơh, n’gor rƀŏng tât nkô̆ ndâk n’gor jêng “yôk prêh ndrih yor n’hâm soan”, tăm tơm si, tăm bri mô êng lah nau kan ntŭk ntu, ma hôm geh tât nau hun hao văng sa rêh jêng, văn hoá, pâl n’aih. Tâm 5 năm rlau aơ, n’gor hŏ tăm 20 rbăn ha bri nkhah ndrel rgum. Nau ntrŭnh Đại hội ntoh măt Đảng bộ n’gor Gia Lai tal XVI năm kan 2011-2025 kŏ nchrăp nau tăm mhe 40 rbăn ha bri, n’hao nau nkŭm n’hâm bah n’gor hao 47,75% tâm 5 năm tât. Râng tăm tơm si, wa Lưu Trung Nghĩa, Giám đốc N’gâng kan tuch tăm ndrel hun hao ƀon lan Gia Lai, ngơi:

  ‘N’gâng kan tuch tăm ndrel hun hao ƀon lan mra kơl tâm nchră mbơh nau ân UBND n’gor rđau ăp nkuăl, nkuăl têh, nkuăl ƀon têh ƀư nau tăm tơm si, rgum tăm tơm si tĭng nau rgum, mpêt khlay, geh rnoh mpeh văng sa, mpeh ntu\k ntu ndrel mât ntil tơm si ân gay ma yơng ntil mhe”.

Thủ tướng râng nau kan tăm du rmen tơm si rih.

Tâm nar rgŏ jă tăm tơm si “yor dak Việt Nam ndrih” tâm nkuăl ƀon têh Pleiku, rđau kan Ngân hàng tuch tăm ndrel Hun hao ƀon lan Việt nam pă 5 rmen prăk kơl an tâm nau rêh jêng bah n’gor, ndrel du rmen prăk ƀư prăk tăm tơm si. Hôm ta Dak Lak, kơt tĭng nau kan tăm tơm si, nau kan kơl an ntŭk ntu, Đoàn viên druh ndăm Ngân hàng tuch tăm ndrel hun hao ƀon lan ntŭk kan tâm n’gor Dak Lak hŏ tăm rlau 300 tơm sao ôch tâm Lâm viên nkuăl ƀon têh Buôn Ma Thuột. Aơ lah nau kan tâm nau nchrăp tăm 1000 tơm si tâm ăp hoa viên, trong têh, meng trong, ntŭk pâl n’aih, bri njrăng rdâng bah Agribank Dak Lak. Wa Phan Thông Thái, Kruanh Công đoàn, Groi Giám đốc Ngân hàng Agribank ntŭk kan ta Dak Lak, ngơi:

  ‘Phung hên geh nau kan tăm 1000 tơm si rih, tâm nê phung hên ntop tăm tâm 19 công đoàn tâm dâng, công đoàn pah kan bah ntŭk hên gay tăm tâm 8 nkuăl, nkuăl ƀon têh. Đah rnoh geh bơi tât 200 rbăn năch ri phung hên nkoch mbơh ân nklăp 20% ri hŏ geh ueh hôm. Tă bah nê ri bu hăn nkoch mbơh gay ma geh âk rlau lơn, khân păng mra nkoch mbơh ân rnăk vâl, ân oh kon, băl mpôl, rnoh nê̆ mra âk lơn”.

Nŭih ƀon lan râng tăm tơm si.

Ntoh nau tâm nar “tết tăm tơm si” năm mhe Tân Sửu mhe rlau ta n’gor Phú Yên, Thủ tướng Nguyễn Xuân Phúc mbơh, ndrel ăp nau kan bah ntŭk kan tuch tăm ndrel ăp nkuăl tâm nau nsôih mât ndrel n’hao nau nkŭm n’hâm bah bri, nau kan tăm du rmen tơm si mra mô êng rgop nau nkŭm n’hâm ân yôk ma hôm ân ndrih ueh tâm nkuăl têh ndrel nkuăl ƀon lan Việt Nam:

  ‘Aơ lah nau kan geh nau khlay ngăn kơt nau wa Hồ nơm hŏ tă nchŏng mbơh, nau kan aơ mô geh roh hoach âk ma nau leo nsĭt săk geh ri khlay tâm nau rgâl nau rêh ân ƀon lan ndrel nơm ân geh nkah tay ăp nau jâk bah nau kan tâm rnôk tâm lơh hăn nsum đah nau kan ƀư nâp neh dak, yơn Wa Hồ nơm lah nŭih bôk năp rgŏ jă tết tăm tơm si tâm lơ 28/11/1958 yor neh dak Việt Nam ndrih ueh kloh lơn mô lah dak Việt Nam ndrih lah nau kan ma bah BÔk nau kan du rmen tơm si rih”.

Lôch khay 3 mhr lau, tâm ntŭk nkah ơm kăl e bah Druh ndăm Xung phong ta Truông Bồn, xã Mỹ Sơn, nkuăl Đô Lương, n’gor Nghệ An, Thủ tướng Nguyễn Xuân Phúc lŏ râng bôk nau kan tăm du rmen tơm si ndrih-Yor du neh dak Việt Nam ndrih. Lah rjăp màu ndrih lah màu bah nâp nâl bah nau hao rŏ hun hao nâp nâl yor ri ma Thủ tướng kuăl jă ăp rmôt kan, ntŭk kan, êng săk nŭih lŏ kơl an, nkre hăn nsum đah n’gor, ăp ntŭk kan gay ma rêng lam nau kan tết tăm tơm si, nkŭm n’hâm neh lơi dơm bah lam dak./.

Nŭih rblang: H’Thi