VOV4.M’nông: Ntoh tă bah nau ŭch rŏng Wa Hồ, tâm ăp thôn ƀon bah rnoi Xơ đăng tâm n’gor Kon tum, ntĭm nti ndrel pah kan tĭng nau bah Wa geh nŭih ƀon lan lŏ mât ân ueh. Bu ranh A Bơ, Bí thư Chi bộ ƀon Tua Tem, xã Đăk Long, nkuăl Đăk Hà, n’gor Kon Tum, du ntoh lư tâm nau ntĭm nti ndrel kơt tĭng nau Wa Hồ tâm nkuăl rnoi mpôl đê̆ bah n’gor Kon Tum.

Ăp nar dŭt khay 8, nau geh srê Covid-19 tâm ăp n’gor mpeh ba dâng geh tât jêr ngăn, tâm n’gor Kon Tum hŏ geh âk nŭih tă nkuăl srê sĭt ntưp ma srê Covid-19. Bah năp nau tât bah srê nuh ntưp tâm ƀon lan, bu ranh A bơ, Bí thư Chi bộ ƀon Tua Tem, xã Đăk Long, nkuăl Đăk Hà vay tât ăp rnăk gay ma nkoch trêng, ntĭm mbơh kônh wa ƀư rep ntŭk gŭ, dŏng dak rao kloh kman, put bok put mbung rnôk hăn trong ndrel mbơh dak si rnôk geh kon ndrel ăp nŭih băl mpôl tă bah nkuăl srê sĭt. Ăp nau ma bu ranh A Bơ nkah ri ƀon lan gĭt rbăng ndrel kơt tĭng. Rnôk geh ôp, moh nau mpeh nau blau nkoch trêng, bonh đă geh tam ngăn kơt nê, ri bu ranh A Bơ gơm rhơn: mô geh nau ma blau ôh, knŭng nơm ân geh uănh, mĭn kơl an ân ƀon lan lah ƀon lan saơ hôm:

‘Gâp mro tâm dăch ma ƀon lan hăn tât ăp rnăk vâl gay ma nkoch trêng ân ƀon lan ngăn lah nau mĭn, nau kan gay ma hun hao văng sa nar lơn ma têh dăng. Mpeh nau tâm rnglăp tâm ƀon lan, ntĭm nti bah kon sau mô dơi mô geh. Ndâk nau mĭn, nau rêh văn háo tâm thôn ân mhâm ƀư ân kônh wa gĭt ƀư, mât chăm, tuch tăm hun hao văng sa jêh ri ntĭm nti ân geh gĭt blau”.

Năm aơ bol ma tât 70 năm, yơn bu ranh, Bí thư Chi bộ A Bơ ăp nar hôm tât tâm lôch ƀon. Ndrel ma nuih n’hâm kan, nau gơih ri nau tă blau bah nŭih tă ƀư nai nti kon se, jêh ri ƀư nau mât ngih săm ƀŭt kŏ geh kơl an păng âk ngăn. Geh nau ntĭm nti ndrel ma nau blau mbơh ngơi, nau ntrŭnh bah Đảng, Ngih dak, bah n’gâng kan ăp gưl bah bu ranh A Bơ tât ma kônh wa nơih, ngăch ngăn. Ngăn lah kơt nau ƀư nau ntrŭnh hun hao văng sa tâm nŭih kônh wa tĭng chrtoh, Chi bôk ƀon Tua Tem ma păng nơm ƀư Bí thư geh 11 đảng viên ri 10 đảng viên geh lăp đảng lah nŭih tĭng chroh. Tâm nau ƀư nau rđau mrô 05 bah Bộ chính trị “mpeh nau ntrŭt dăng nau ntĭm nti ndrel pah kan tĭng nau ang ueh, nau rêh Hồ Chí Minh”, Chi bôk ƀon Tua Lem mro leo bôk tâm rnoh 9 Chi bộ tâm Đảng bộ xã, Bí thư Đảng uỷ xã Đăk Long Trần Ngọc Trực, ngơi:

‘Đảng bộ rnê prêh ngăn Chi bộ aơ tâm nau ntrŭnh ƀư nau rđau mrô 05 geh nau ueh ngăn. Mpeh nau kan ntrŭnh ƀư tât ăp đảng viên. Geh ăp nau kan, nau ƀư ueh săk tam. Đảng viên, ƀon lan kơt tĭng ueh. Lôch 5 năm ƀư nau rđau mrô 05, chi bộ ndrel êng săk wa A Bơ geh Đảng bộ xã mbơh, đă đah Rnâng kan nkuăl uỷ uănh gay ma pă săm ƀŭt rnê nkhôm ân rmôt ndrel săk wa bah Chi bộ aơ geh ƀư ueh nau rđau mrô 05”.

Kơt tĭng nau dơi kan bah nơm, bu ranh Bí thư Chi bộ ƀon Tua Lem A Bơ hŏ geh âk nau rgop ân nau hun hao nsum bah ƀon ndrel bah xã Đăk Long. Bah rnôk aơ 7 năm, rnôk ma xã Đăk Long geh ndâk rnoh rnăk ach o tât rlau 73%. Rnôk aơ rnoh aơ n’huch hôm 37,2%. Tâm nau hun hao văng sa rgâl nau rêh, bu ranh A Bơ nkre leo lor tâm nau kan, nkre mbơh nau blau, ntĭm mbơh kônh wa nau tăm, mât chăm cà phê, cao su, njrăng rdâng srê ân ndrôk rpu, hun hao nkre bri…Wa A Sự, Kruanh Uỷ ban MTTQ Việt Nam xã Đăk Long mbơh, ƀon Tua Tem geh 125 rnăk rnoi Xơ đăng, bu ranh A Bơ lah n’gâng tơm leo tâm nau kơt tĭng nuih n’hâm tâm rnglăp, rgum ƀon lan, lah nŭih leo trong anh bah rnăk vâl ndrel ƀon lan:

‘Bu ranh A Bơ dŭt n’hâm gơih kan ndrel bu ranh rêh ueh ân ăp kon sau tâm ngih kơt tĭng ndrel kơp n’ăp ma tâm thôn ƀon. Tâm ăp rơh rƀŭn thôn, bu ranh A Bơ nkoch ân kônh wa, kônh wa djăt tĭng”.

Ndrel đah nau rêh nŭih ƀon nar lơn geh rgâl, ăp năm êp aơ xã Đăk Long, nkuăl Đăk Hà, n’gor Kon Tum, rnơm bu ranh leo trong lor kơt wa A Bơ, âk nau khlay ơm ueh bah rnoi Xơ đăng geh mât, kơt tĭng. Xã Đăk Long geh 5 ƀon ri ăp ƀon geh ndâk ngih rƀŭn rgum tĭng tâm di nau vay ơm bah rnoi Xơ đăng ƀư ntŭk rƀŭn rgum, ntĭm nti tâm ƀon lan. Ăp rmôt tur chĭng, njroh mprơ geh mât ndrel geh ntĭm ân rơh mom. Du đê̆ nau kan ơm, kơt tanh dông, tanh sah, cheh tanh bok ao…dôl ma pơk luh nau ueh ân rnoi Xơ đăng tâm aơ hun hao văng sa rnăk vâl./.

Nŭih rblang: H’Thi