VOV4.M’nông: Tâm nau ndâk njêng ƀon lan mhe, nau kan bah rmôt kan Đoàn druh ndăm lah khlay ngăn, ngăn lah tâm nau kan nkoch trêng ndrel rgum đă nŭih kơl. Nau kan bah mom ndăm mro ueh, mro ngăch, ndăn tâm nau ngăn dôl geh bah nkuăl. Tâm rnôk aơ, nau kơl an ăp rnăk vâl geh nau rêh jêr, khuch bah srê Covid-19 lah nau khlay. Tâm xã Ia Blứ, nkuăl Chư Pưh, n’gor Gia Lai, ntŭk kan Đoàn druh ndăm hŏ ntoh nau aơ, tâm nê rup gui bah bu ur Bí thư xã Đoàn Trương Thị Ngọc Lan lah ntuh mhô.

            Mông gŭ kan hŏ lôch, yơn yuh Trương Thị Ngọc Lan, Bí thư Đoàn xã Ia Blứ, nkuăl Chư Pưh, n’gor Gia Lai ndrel du đê̆ đoàn viên druh ndăm hôm pah kan tâm UBND xã, ndơn ndơ sa bah kônh wa gay ma kơl an tâm nkuăl geh srê Covid-10. Ăp ntil ndơ geh kơl âk ngăn lah byăp, bum, play rih, găng ty, bok put mbung, kho ao…Ăp ntil ma kônh wa njoăl tât ri ngăch geh khân păng ndơn, pă. Ăp nau kan mra geh njoăl tât ntŭk nkhah mô lah rmôt ƀư nau kan tâm mpeh bôk năp bah nkuăl, geh rmôt kan geh leo tât Bình Dương, nkuăl ƀon têh Hồ Chí Minh kơl an nkuăl geh srê. Yuh Nguyễn Thị Hà, ta Thôn Thiên An, xã Ia Blứ, leo ndơ kơl an tât, ngơi:

            “Bah nau kuăl jă bah yuh Trương Thị Ngọc Lan, Bí thư Đoàn xã ri đah nuih n’hâm dŭm geh dŭm ân, ri gâp tât rgop kơl an mì tôm gay nsum ty đah ăp nŭih gay ma njoăl tât kônh wa tâm ntŭk bu tâm nkhah srang ndrel ƀon lan tâm nkuăl geh srê. Gâp kŏ nsum ty rgop du gưl ndrel ăp nŭih, ŭch lah srê nuih aơ ơm ngăch bah gay ma kônh wa ƀon lan đăp mpăn pah kan jan sa”.

            Tâm ăp nar tâm bôk ndeh hon-đa bah nơm, lah mô ru nau kan, yuh Lan lŏ hăn khâl, bonh đă ăp rnăk tâm xã. Wa Nguyễn Văn Doan, ta Thôn Thiên An, xã Ia Blứ hŏ bơi tât 60 năm, dôl ma rong yuh păng rlau 70 năm kŏ ranh săk. Bar hê oh nur wa Doan kŏ mô geh kon, mô geh kan pah, tâm tâm nsing tâm ngih bu kơl ndâk an hŏ lĕ sat ơm. Mhe ndơn nau kơl an bah nkuăl ndrel săk êng bah Bí thư đoàn xã, wa Doan rhơn ngăn:

            ‘Bar hê oh nur hên ri jêr ngăn, yuh gâp ri vay ji kuet mô geh nau dơi pah kan, gâp ri kŏ mô geh kan pah. Ndơ sa tâm ngih ri lah moh ndơ geh ri sa ndơ nê, sa byăp, sa mì tôm. Geh prăk ri hăn chợ lah mô ri sông piăng ma dak măm, byăp ân rlau nar. Đoàn druh ndăm kŏ kơl an ndơ sa, mì tôm, phe ndrel dak mắm ri gâp mbơm oi, đoàn druh ndăm geh nau kơl an bah bar hê oh nur hên ri ueh ngăn”.

            Êng ăp nau rgop kơl an tă bah ăp gưl ân ma nŭih ach o ndrel kon se tâm nkuăl, Đoàn druh ndăm Xã Ia Blứ hôm tât bonh đă, kơl an ăp rnăk mpeh nau rêh jêng gay kônh wa geh nau dơi rlet hao, kơl an kơl kon be ntil, tơm tăm, ndâk ngih âk rnăk ach o.

            Đoàn druh ndăm xã Ia Blứ, nkuăl Chư Pưh, n’gor Gia Lai gĭt kloh nau rêh bah rđau kan nơm kŏ jêr đŏng. Yuh Trương Thị ngọc Lan dôl du hê rong êng 2 kon bu ur jê̆. Sai păng ji play leh ndrel dôl kol tâm nkuăl ƀon têh Hồ Chí Minh, Yuh Lan mpôn nau rngot, ndrel nsôih êng tâm nau rêh, lah nŭih rđau leo phung mom ndăm bah nkuăl. Yuh Trương Thị Ngọc Lan, nkoch:

            ‘Ntŭk tât ri nơm kơp tât nê, nau kan ri ân geh đăp mpăn dơm, kơt lah rnôk aơ ri mâp nau jêr ri ăp nŭih kŏ mâp nau jêr da dê, lah nơm mô geh nau lap dơm. Gâp mĭn hôm, nau kan ri ƀư nau kan, nau geh kơt nê ri nơm mô dơi ma rgâl êng. Mpeh ngih ri nơm mĭn nau kan tâm ngih, hăn kan ri ân geh hăn kan đŏng, yơn nơm mĭn rvê mô geh dơi rklaih ôh”.

            Yuh Phạm Thị Thu Thảo, Bí thư Đoàn nkuăl Chư Pưh, n’gor Gia Lai mbơh: năm 2020, Ia Blứ geh UBND nkuăl săch ƀư xã tơm gay hun hao văng sa, rêh jêng. Tĭng nê, Đoàn druh ndăm kŏ mbơh kloh nau kan bah nơm. Xã hŏ tâm rgop nsum đah ăp tơm prăk êng êng gay ma ntuh kơl 1,7 rmen kơl an kon ntil tăm, mpa rong ân tâm di. Tât rnôk aơ, xã hŏ hun hao geh 720 ha tơm sa play, be bơi tât 11 rbăn mhâm, rlau 3 ha tơm ndrŭng brai ndrel rlau 4000 ha cà phê. Tâm ne êgh âk rnăk đoàn viên, druh ndăm hŏ geh hao jêng. Đah nau gơih dăch ngăn bah Rnâng kan Đoàn xã, ngăn lah Bí thư Trương Thị Ngọc Lan, ăp nau kan hŏ geh ƀư ueh ma nau ngăn, geh nau kơl an bah đoàn viên, druh ndăm:

            ‘Đah ma yuh Trương Thị Ngọc Lan, Bí thư đoàn druh ndăm xã Ia Blứ lah du hê bí thư pah kan gơih n’ơr ngăn, ndrel dŭt ŭch ma nau kan đoàn tâm xã. Bol ma nau rêh rnăk vâl păng hôm âk nau jêr, sai păng geh nau ji jâk jru dôl ma kâp play leh gay ma ndop tâm nkuăl ƀon têh Hồ Chí Minh, yơn lah srê ji ri ma gŭ kâp, ê dơi geh ndop, hôm êng yuh Lan nkre ƀư nau kan ngih dak, nkre ƀư nau kan tâm rnăk vâl ndrel rong 2 hê kon jê̆. Yơn lah, rlay nau jêr yuh Lan mro gơih ma nau kan ma đoàn nkuăl ntrŭnh ƀư ndrel đoàn xã Ia Blứ mro lah rmôt kan leo lor tâm nau kan đoàn tâm nkuăl. Mhe rlau, tâm nau njrăng rdâng srê, yuh Lan kŏ kơt lah đoàn xã Ia Blứ geh ndơn săm ƀŭt rnê nkhôm bah Đoàn nkuăl, đoàn n’gor”.

Đah nau kơl an gơih jăp tâm nau kan ndrel mro leo lor bah nau kan Đoàn, yuh Trương Thị Ngọc Lan dôl ƀư rêng ngăn nau ueh lăng, ntrŭt dăng ăp nau kan tâm đoàn Ia Blứ, bonh đă ân druh ndăm ndâk nau kan. Ndrel tă bah nê, Đoàn xã Ia Blứ lŏ bư jêh nau kan geh jao, nar lơn geh ăp nau rgop ueh ngăn ân ƀon lan, rgop nau khlay tâm nau kan ndâk njêng ƀon lan mhe bah nkuăl./.

Nŭih blang: H’Thi