VOV4.M’nông: Nau kan nkoch trêng gay ma n’hao nau njrăng, rdâng srê Covid-19 tâm nkuăl ƀon lan mhe geh nau khlay ngăn, ngăn lah tâm rnôk geh âk nŭih sĭt tă bah nkuăl geh srê. Yuh Nguyễn Thị Phương (rnoi Tày) ta xã Cư M’gar, nkuăl Cư Mgar, n’gor Dak Lak geh nau nkoch trêng ueh ngăn, nê lah ndrĭng nau Then tĭng nkô̆ nau njrăng rdâng srê Covid-19. Đah nau mprơ nơih gĭt, nkô̆ nkoch ngăn hŏ geh yuh ntoh nau mprơ ueh, m’ak ndrel ma đơn tính, ƀư dŭt ueh djăt. Ăp đoạn video bah yuh Phương geh leo tâm mạng xã hội Facebook, Youtube hŏ geh nau rêng ngăn tâm ƀon lan.

Aơ lah ăp nau mprơ bah yuh Nguyễn Thị Phương, rnoi Tày, ta thôn 5, xã Cư M’gar, nkuăl Cư M’gar, n’gor Dak Lak nchih rklă êng tĭng nau Then bah rnoi Tày-Nùng ndrel yuh nơm mprơ êng. Tâm nau mprơ yor yuh Phương ndrĭng nau geh nchih “Njrăng rdâng srê kơt lah njrăng rdâng phung rlăng, nơm ân nsum ndrel nuih n’hâm jut jăng lơi srê ji Covid…Ăp nŭih, ăp nơm ân lah tahen, nơm ân ndrel njrăng rdâng ân rlet rlau”…

Đah nkô̆ nau mprơ nơh gĭt, nơih rbăng, yơn hŏ nkoch âk ngăn nuih n’hâm nau rđau “njrăng rsê kơt njrăng phung rlăng” bah Thủ tướng Chính phủ, nau kan “5K” bah N’gâng kan dak si tâm njrăng srê. Nkre ma nkoch, tâm ban nuih n’hâm đah nau jâk rgănh, roh hoach bah ăp rmôt nŭih nai dak si, rmôt công an, tahen…tâm nau njrăng rdâng srê. Bah nê, bonh đă ăp nŭih ân geh ntrŭt jăng srê ji ndrel plŏ tay nau rêh ueh ơm.

Đah 4-5 nar đăng klơ mạng xã hội Facebook ndrel Youtube, nau mprơ bah yuh geh âk rbăn nŭih uănh, âk nau nkoch ndrel leo mbơh. Nô Nguyễn Trung Hải, rnoi Tày, tâm nkuăl têh Quảng Phú, nkuăl Cư M’gar uănh video geh nkoch klơ Facebook nkoch nau:

‘Bah nau tă uănh Video bah yuh Phương ri gâp saơ nau mprơ nê ueh ngăn, tă bah nau mprơ, er mprơ ndrel nteh đơn. Nau mprơ bonh đă nuih n’hâm bah kônh wa ƀon lan tâm nau nsôih njrăng rdâng srê, đah nau geh bah rnôk aơ lah tâm di. Đah nau dŏng nau mprơ gay ma nkoch trêng, kônh wa geh djăt đah nau mprơ bah rnoi nơm, nau nteh đơn bah rnoi nơm ri ma ƀon lan gĭt kloh. Săk gâp ndrel ăp nŭih tă djăt nau mprơ bah yuh Phương ri ŭch ngăn ndrel geh nau njrăng rdâng srê ân nâp lơn”.

Yuh Nguyễn Thị Phương nkoch, lôch âk nar ma aơ, yuh ndrel ăp nŭih tâm rmôt njrăng srê bah thôn, xã dôl ma nsôih nkoch mbơh nau njrăng rdâng srê bah kônh wa, kŏ kơt lah kơl an kônh wa ƀư nau kan kơl an ân nŭih geh nkhah tâm nkuăl geh srê bah ăp n’gor tă sĭt. Ndăn mông rlu, yuh Phương hŏ lăp tâm mạng gay ma joi ăp nau mprơ geh nau nkoch tât nau njrăng srê Covid-19 gay a njêng nau mprơ Then jêh nê mprơ êng ndrel quay video gay ma ân tâm trang mạng xã hội.

Tĭng yuh Phương, mprơ Then đơn tính lah nau djăt mpeh mpeh nuih n’hâm mô dơi mô geh bah rnoi Tày-Nùng. Thôn yuh gŭ ndrel ăp thôn êp nê geh âk ngăn rnoi Tày-Nùng rêh ri ma nau nkoch trêng aơ mra kơl an bu gĭt lơn ndrel nkah đŏng.

‘Saơ nau ndơn uănh bah âk nŭih đah nau ƀư bah nơm ri gâp saơ rhơn ngăn. Bol ma rnôk aơ gâp âk nau mô ru đŏng đah nau kan njrăng rdâng srê tâm xã, yơn jêh aơ tă gâp mra nsôih joi âk nau mprơ tĭng er mprơ Then mhe ndrel nau mprơ ân tâm di ueh gay ma mprơ tĭng Then gay ma nkoch trêng ân ƀon lan djăt”.

Wa Hồ Thị Thanh Hải, Kruanh Uỷ ban MTTQ Việt Nam xã Cư M’gar mbơh, rnoi Tày-Nùng geh rlau 16% rnoh ƀon lan lam xã. Ngăn lah ƀon lan tâm di năm hôm pah kan tâm xã dôl hăn pah kan công nhân tâm ăp n’gor Bình Dương, Đồng Nai ndrel nkuăl ƀon têh Hồ Chí Minh. Ăp nar rlau aơ, rnôk ăp n’gor aơ ƀư nau nkhah tĭng nau rđau mrô 16, âk nŭih pah kan sĭt tâm nkuăl gay ma der srê. Ndri ma, ndrel nau kan bonh đă, kơl an ndrel kơl ăp nau tât nau rêh bah ƀon lan lah nau khlay.

Lah Kruanh Rnâng kan Mặt trận thôn, nkre Kruanh rmôt bu ur, yuh Nguyễn Thị Phương hŏ geh âk nau kan ndrel ăp rmôt njrăng rdâng srê. Tâm nê dŏng nau mprơ Then gay ma nkoch trêng tât nau kan mhe, tâm di đah nau ŭch djăt bah âk nŭih bah nkuăl:

‘Yuh Phương lah ngoai tâm ăp cán bộ gơih ngăn nau kan, n’ơr pah kan đah ăp nau đă bah nkuăl yuh mro geh n’gâng kan ba lơ rnơm ndrel ƀon lan ŭch rŏng. Rơh rlau aơ, yuh dŏng nau mprơ then bah rnoi nơm gay ma nkoch trêng tâm ƀon lan mpeh nau njrăng rdâng ma srê. Aơ lah ăp nau kan mhe mham, ma nau tam ngăn đah xã Cư M’gar lah êng ndrel lam nkuăl Cư M’gar lah nsum”.

Mprơ then lah du ntil nau mprơ ƀư ueh nuih n’hâm mô dơi mô geh bah âk nŭih rnoi Tày-Nùng tâm ăp nkuăl. Kơt tĭng nau ueh, nau dơi tă bah nau mprơ ndrel ma ndơ goh nteh ơm ueh bah rnoi nơm, yuh Nguyễn Thị Phương hŏ geh nau mprơ ueh ngăn gay ma nkoch trêng tât nau kan njrăng srê kơt njrăng phung rlăng, kŏ kơt lah nau jêr rgănh bah rmôt nŭih kơl njrăng rsê mpeh ba lơ, ntơm bah nê kuăl jă nau n’hao nau gĭt rbăng bah ƀon lan ndrel nsum ty kơl njrăng ndrel jăng lơi srê ji Covid-19./.

Nŭih rblang: H’Thi