VOV4.M'nông: Tĭng nău mbơh báo chí bah Bộ Ngoại giao n'hanh tâm boh dak bah dih Campuchia tâm nar (24/11), Groi Thủ tướng Prak Sokhon hŏ geh rơh kuăl điện tâm nchră đah wa Derek Chollet, nuĭh nsŏng kơl kan an Bộ Ngoại giao Mỹ mpeh ăp nkô̆ nău bar ding n'hanh nkual ma lĕ bar ding ndrel uănh khlay. Tâm rơh kuăl điện tâm nchră, Groi Thủ tướng Prak Sokhon lah rjăp, bol hôm mâp du đêt kŏ kol yơn Campuchia way uănh khlay tâm boh đah Mỹ. Groi Thủ tướng Campuchia lah rjăp tâm boh đah bar dak dôl hăn di trong n'hanh nar lơn ma hun hao âk trong kan kơt: tăch rgâl, ntuh kơl, dak si, tuch tăm mât rong, văn hóa n'hanh ra joi bom mìn. Mpeh nău ƀư kruanh ASEAN bah Campuchia tâm năm 2022, Groi Thủ tướng Prak Sokhon hŏ nkoch rtŭt glêh an wa Derek Chollet mpeh ăp trong an ƀư lor bah Campuchia tâm let năp tay, tâm ban kơt ăp ntul rlong ân nkra du trong na nê̆ gay rdâk tay nău khlay ƀư tơm n'hanh nău dơi bên di bah ASEAN, ntrŭt ntrôl ăp nău nsrôih rdâk njêng jâng wăng sa nsum ASEAN, mât đăp mpăn, bah tâm lơh tâm su n'hanh rnă njrăng tâm n'hanh bah dih nkual Đông Nam Á.

Nuĭh rblang: Điểu Thân