VOV4. M’nông: Chư Pưh tă lah nkuâl tăm tiêu rgum âk tiêu bah n'gor Gia Lai n'hanh lah nkuâl geh tât khuch dŭt hô tăch bah tiêu khĭt n'hanh jŭr thuk. Ta năp ăp nău jêr jŏt hô yor tơm geh wăng sa geh koh tăch, ăp gưl uỷ Đảng n'hanh n'gâng kan ta nkuâl Chư Pưh ndơ̆ luh nău kan khlay lah joi trong nkra kơl ăp thôn ƀon dăp rgum tay si tăm ndơ mât, đăp mpăn tay pah kan tuch tăm. Ngăn geh ta thôn Tung Đao, xã Ia Đreng (Ia Drêng), nkuâl Chư Pưh an saơ, rnôk chi bộ thôn saơ dơi ăp jêr jŏt kŏ kol, gĭt kloh dơi nău way gĭt kan bah nkuâl, grêt dêh ndrel ƀon lan joi trong nkra bah, nău kan tuch tăm n'hanh nău rêh bah nuĭh ƀon lan mbra ngăch plơ̆ dơi đăp mpăn tay.

Lĕ tết bơi 2 khay, wa Ksor Neo, 72 năm deh thôn Tung Đao, xã Ia Dreng hŏ tăch du mblâm ndrôk hăn tât Ngân hàng Chính sách Xã hội nkuâl Chư Pưh gay trok lor du đêt rnon hŏ manh bah năm 2017. Lôch trok, rnon ntơm bah 6 rkeh jŭr hôm 3 rkeh prăk. Wa Ksor Neo an gĭt, păng tăch ndrôk kon geh bơi 7 rkeh prăk, yơn tĭng nar ton trok 3 rkeh prăk dơm. 4 rkeh hôm ƀa ƀă, păng an dŏng tay n'hanh rvăt du mblâm máy bơm, tŏ dak an neh tăm pih tâm mir. Wa Ksor Neo dŭt di nuih n'hâm mpeh nsĭt nău geh tam bah tơm prăk dŏng mât ndrôk.

Gâp manh tơm prăk Ngih dak ntop kơl gay rvăt ndrôk sĭt mât. Lôch ndrôk deh kon, kon ndrôk he mât ndrôk me he tăch trok tơm prăk. Tât aƀaơ, kon ndrôk hao têh n'hanh deh tay hôm, gâp tăch trok lĕ prăk rnon hŏ manh hôm. Gâp hôm geh tay 2 mblâm ndrôk n'hanh hôm nsĭt geh tay 10 rkeh prăk.

Tâm rnôk ăp bu ranh ta thôn Tung Đao jăp gơih đah nău kan mât ndrôk n'hanh nsĭt geh wăng sa đăp mpăn, ri ăp ur sai mom ta aơ rhơn nđơr đah ăp trong wăng sa mhe. Tâm rnoh nê geh ur sai Ksor Uyn. Dŭt nkah uĕh mpeh rgâl mhe tâm trong ƀư bah ur sai nô he mbra saơ dĭl ta trong ƀư tăm tơm sa play. Mpeh mir bah dâng, tĭng tơm bơ, tơm sầu riêng mhe tăm, dơi chŭt ndăl ma mâng, dơi nkrum sial ma jal nhựa n'hanh rhe njâm tơm. Ta mir mpeh bah lơ, rlău 400 tơm đŭr cao sản tăm rlŭ tâm mir cà phê bah Ksor Uyn hŏ luh play têh dĭng phích dak, dơi mât chăm na nê̆, mô an geh play tâm nchâm nsum gay der bah tu ndrŭng chuh sa. Tâm nău nteh dak hoch chroch chroch, Ksor Uyn rhơn nkoch mpeh nău kơt nti ăp trong wăng sa mhe gay nsĭt geh wăng sa âk lơn:

Rnôk hăn luh kan an bu saơ trong tăm tơm đŭr bah khân păng way ƀư mô lah nău rêh bah khân păng mbơm oi, kơt nti êng n'hanh ƀư tĭng tăm tơm đŭr kơt aơ. Gâp ôp trong khân păng ƀư hôm sĭt kơt ƀư tay. Săk gâp nơm n'hanh trong ƀư bah gâp mô hŏ lăng blău ôh, mô hŏ nsĭt geh âk ôh. Năm mhe aơ nơh, geh kaman jêng mô hŏ nsĭt geh wăng sa đêt, năm aơ play đŭr luh play hôm nse,mpŏng mbra păng uĕh lăng.

Tĭng nô Phạm Đình Nghĩa, Bí thư Chi bộ thôn Tung Đao, thôn geh 267 rnăk, lơn âk lah rnăk kônh wa nuĭh Jarai.  Lôch bar pe năm rvah rvăch tăm bah tơm tiêu geh khĭt play tiêu jŭr thuk, kônh wa tâm ƀon hŏ ngăch an ƀư âk trong leo kan tuch tăm mhe gay rdâk hao tay jâng wăng sa. Tâm njăr trong hăn klaih rlău jêr jŏt nê, ăp đảng viên nkre grêt dêh, nkre hăn lor bôk năp. Ăp đảng viên dơi tâm pă leo du rmôt nklăp 30 rnăk, mbơh nti đah kônh wa ăp trong tât đah tơm prăk manh, joi ntŭk ntĭt leo lor gay an ƀư trong kan tuch tăm mhe mhâm an tâm di đah rnoh prăk manh. Wa Phạm Đình Nghĩa an gĭt, lĕ 9 đảng viên tâm chi bộ n'hanh ăp rnăk ƀon lan ntrŏng he lah nuĭh ân hăn kơt nti. Ntŭk kơt nti dŭt geh nău tam, dơi ntrŏng lah lah ntŭk mât rong têh hvi bah ăp nuĭh ƀon lan kan lŏ mir bah ăp nuĭh ƀon lan kan lŏ mir têh hvi jăp blău tâm nkuâl, tâm xã, ăp nuĭh ngăch ngăr n'hanh dôl geh nău dơi tâm nău kan ƀư njêng tăch rgâl:

Ăp đảng viên mât uănh du ƀon jê̆, nsrôih ăp năm lah rgâl lĕ mpeh nău gĭt êng n'hanh trong ƀư bah du đêt nuĭh ƀon lan, lơn lah kônh wa nuĭh Jarai dơm. Lah nuĭh Yăn tâm xã ri âk nuĭh khân păng hôm blău rlău he, jăp gơih rlău he âk ngăn. Ngoăy lah he nơm đă ăp nuĭh nê ntrŭt đă, yor mô geh trong nkoch trêng ban dah nău kan geh ngăn ngăn. He ndrel kônh wa hăn tât nê, gay geh rnôk tâm nđŭr mpeh trong hun hao, tât ăp tơm prăk, khoa học kỹ thuật n'hanh trong dŏng tơm prăk, trong mât tơm prăk...ƀư tĭng trong nê ri geh nău tam lơn.

  Lôch 3 năm ntrôl dăng dăp rgum tay tuch tăm, ăp ntil cà phê cao sản, âk ntil tơm sa play jŏ năm… hŏ dơi tăm âk ta Tung Đao, đah rlău 60ha bôk năp hŏ an geh play. Nău kan mât rong ndrôk way bên hao rơ̆ jêng âk đŏng rnôk geh du đêt rnăk mât rong tât bar pe jât mblâm n'hanh gĭt tay tăm pih mô dơn mƀơk lêng kơt ntơm nơh. Yor kơt nê, tâm lvang năm 2018- 2020 âk jêr jŏt, Tung Đao hôm hŭch dơi rnoh rnăk ach o ntơm bah 6,7% jŭr hôm 5,5%. Wa Rmah Khanh, kruanh thôn Tung Đao an gĭt, aƀaơ lĕ ma ƀon hôm 16 rnăk ach o, yơn geh dŭt âk trong leo ƀư mhe nsĭt geh nău dơi, tâm di gay ăp rnăk kơt nti, an tĭng ƀư. Chi bộ n'hanh Ƀan mât njrăng êng thôn ntrŏng dơi mbra grêt dêh, ndrel kơl kônh wa ơm đăp mpăn nău kan tuch tăm mât rong n'hanh n'hŭch ach o:

Gâp lah du đảng viên, dơi mât uănh ta ndrel 30 rnăk kônh wa Jrai. Ta aơ geh du nău dŭt rhơn lah ntơm nơh tăm tiêu geh rnoh khlay n'hanh lôch tiêu jŭr thuk ri geh cà phê đăp mpăn tâm âk năm aơ đŏng. Năm aơ năm 2021, ŭch rŏng kônh wa gĭt dŏng trong wăng sa tĭng trong ntĭm nti bah Ngih dak kơt gĭt trong mât ndrôk, gĭt mât chăm tơm cà phê n'hanh gĭt ƀư ba lŏ mhâm an jêng uĕh. Gĭt mpêt nkrem, tĭng ƀư nău rêh mhe kơt oh nô nuĭh Yăn wăng sa gĭt kơp nđăp n'hanh nsĭt geh nău tam lơn.

Leo ƀư tay nău kan mât ndrôk, ntrôl dăng sreh tăm tay cà phê, nănh tăm tơm sa play jŏ năm, kônh wa rnoi Jrai ta thôn Tung Đao, xã Ia Đreng, nkuâl Chư Pưh, n'gor Gia Lai dôl geh ăp nău dơi uĕh bôk năp. Ăp nău rmoh rman way ơm geh jŏ tâm nău kan tuch tăm, dôl mbrơi ƀư bah ma trong ntuh kơl na nê̆, dah găp. Đah du nuih n'hâm bah Chi bộ, ƀan mât njrăng êng thôn n'hanh ăp rnăk ƀon lan, lôch ăp khay klêh donh thôn Tung Đao hôm geh tay ăp mir ƀô kah kao play, kơl kônh wa ta aơ n'hao săk geh nău rêh./.   

 Dương Đình Tuấn- Nuĭh rblang: Điểu Thân