VOV4.M’nông: Ndrel đah ăp nău ƀư ntop kơl joi nău rêh gay kơl oh yuh hun hao wăng sa, ăp gưl rmôt bu ur ta Dak Lak hôm e nsrôih ƀư ăp nău kan gay geh prăk nkrem an rwăt bảo hiểm y tế an nuĭh tâm rmôt jêr jŏt. Nău ƀư aơ lĕ kơl tay âk oh yuh dơi gĭt đah ndoh ndơ dak si, mât uănh săk soan, n’hŭch mbak jâk wăng sa rnôk mô lap kop ji.

          Dơi dơn sam ƀŭt sam ƀŭt bảo hiểm y tế yor hội liên hiệp bu ur xă an, yuh Đặng Thị Bình, ta thôn 1, xă Ea Kpam, nkuăl Cư M’gar, n’gor Dak Lak dŭt rhơn. Yuh Bình an gĭt, rnăk wâl mô geh neh tuch tăm, ur sai yuh hăn ƀư kan bu gay geh prăk mât 2 ơ̆ kon dôl hăn nti, tâm nĕ geh 1 hê mon geh koet nte. Bah jŏ yor mô geh bảo hiểm y tế jêng rnôk kop ji, yuh dŭt rvê hăn ngih dak si but uănh yor klach hoach prăk. Bah khay 9 năm aơ, dơi rmôt bu ur xă an sam ƀŭt bảo hiểm y tế jŏ du năm, yuh saơ đăp mpăn du gâl đê̆.

          “Nău rêh rnăk wâl gâp ri dôl jêr jŏt, dơi mpeh Rmôt bu ur xă an 1 păng sam ƀŭt bảo hiểm ri gâp lah uĕh âk ngăn, geh sam ƀŭt bảo hiểm gay gâp hăn but uănh kop ji dơh oi prăk ri gâp đăp mpăn lơn rnôk hăn but uănh săm ji, n’hŭch nău jêr jŏt đah prăk kaih rnôk hăn but uănh an săk nơm”.

Du năm ăp gưl rmôt bu ur n’gor Dak Lak an rhiăng sam ƀŭt bảo hiểm y tế an oh yuh bu ur n’hanh kon hŏk jêr jŏt

          Ndrel đah yuh Bình, năm aơ geh 55 nuĭh rmôt bu ur êng ta nkuăl Cư M’gar dơi an sam ƀŭt bảo hiểm y tế. Wa Lê Thị Thu Hiền, Kruanh Hội Liên hiệp bu ur nkuăl Cư M’gar an gĭt, nău an sam ƀŭt bảo hiểm y tế an bu ur n’hanh kon se jêr jŏt lĕ dơi ƀư ta ntŭk bah âk năm aơ. Knơm nĕ lĕ kơl âk oh yuh n’hanh ăp mon kon hŏk geh tay nău dơi mât uănh săk soan, n’hŭch nău rvê n’hanh mbak jâk prăk kaih lah mô lap geh kop ji. Gay mât na nao naư ƀư aơ, ăp chi hội n’hanh rmôt kan bah dâng lĕ geh âk trong ƀư êng êng gay geh prăk nkrem, dơn geh âk nău kơl bah ăp oh yuh tâm rmôt.

          “Trong ƀư rgŏ jă ƀư prăk nkrem dơi ƀư tĭng bah ăp ntrong kan bah bu ur kơt ntrong kan rgum joi ndơ ndŏk nja djiah ƀư prăk nkrem, ăp rmôt ntêm nkrem mô lah oh yuh rgŏ jă bah ăp nuĭh bu ur tâm rmôt rgop kơl êng n’hanh nău ƀư aơ dơi ăp oh yuh rƀŏng tĭng dŭt uĕh, dŭt n’hâm”.

          Mô knŭng ta nkuăl Cư M’gar, nău ƀư an sam ƀŭt bảo hiểm y tế ma dơi âk gưl ta n’gor Dak Lak mbơh ƀư n’hanh pơk hvi. Kơt ta xă Ea Kao, nkual ƀon têh Buôn Ma Thuột, rmôt bu ur xă lĕ mbơh ƀư prăk nkrem đah trong rgum joi ndŏk nja djiah n’hanh tâm pă tĭng ntil ndơ djiah gay tăch. Tĭng wa Nguyễn Thị Tuyết, Hội trưởng Rmôt bu ur xă Ea Kao, bah năm e tât aƀaơ, tă bah ăp nău rgŏ jă oh yuh râng rgum nja djiah n’hanh tâm pă tĭng ntil ndơ gay tăch, rmôt lĕ rgum sĭt geh bơi 6 rkeh prăk, dŏng gay rwăt 9 sam ƀŭt bảo hiểm y tế an nuĭh tâm rmôt geh nău rêh jêr jŏt, ntưp nău ji jêr bah tâm xă.

          “Aơ lah ngoăy tâm âk bôk nău kan tă bah rmôt bâh lơ rgŏ jă nkre rgum ndŏk nja djiah, ndŏk nja ka su ƀư kloh ntŭk ntô gŭ rêh n’hanh mpôl hên mĭn lah aơ du nău kan dŭt n’hâm khlay gay kơl du đêt oh yuh geh nău rêh jêr jŏt”.

Âk ntil nău rgop ƀư gay geh prăk nkrem rwăt bảo hiểm y tế, ăp oh yuh lĕ ndâk njêng rmôt hăn kan bu n’hanh rlak prăk luh gay ƀư prăk nkrem

          Wa Trần Thị Phong, Groi kruanh Hội liên hiệp bu ur n’gor Dak Lak an gĭt, nău ƀư an sam ƀŭt bảo hiểm y tế an bu ur jêr jŏt dơi du đêt nkuăl hội n’hanh rmôt bah dâng ƀư bah năm 2018. Tă bah nĕ an rhiăng yuh dơi ntop kơl mât uănh săk soan ăp năm. Saơ geh săk rnglăy bah nău ƀư aơ nsĭt tay âk gưl nuĭh nti nsơm đŏng n’hanh kơt dŏng ta gưl nơm. Du đêt ntŭk kan ƀư uĕh kơt nkuăl Cư M’gar, nkual têh Buôn Hồ n’hanh nkual ƀon têh Buôn Ma Thuột. Gay ƀư săk rnglăy n’hanh mât uĕh ƀa ƀơ, ăp ntŭk kan aơ lĕ ndơ̆ nkô̆ nău an sam ƀŭt bảo hiểm y tế an nuĭh tâm rmôt jêr jŏt jêng du nkô̆ nău kan ƀư tâm năm gay rgŏ jă oh yuh râng, nkre mĭn ƀư mhe jêng trong ƀư prăk nkrem gay kơl an âk oh yuh dơi geh nău kơl.

          “Trong ƀư bah ntŭk kan ri khân pơng ndâk njêng ăp ntrong kan dŭt uĕh, ntĭt nsa kơt nău rgum nja djiah, pah kan bu tĭng rmôt gay oh yuh ƀư ntop tay n’hanh rlak an prăk nkrem gay rwăt sam ƀŭt bảo hiểm. Ri trong ƀư dŭt âk, dŭt uĕh kơt nĕ ƀư geh nău kơl nuĭh n’hanh trong ƀư mhe bah ăp gưl rmôt ri mpôl hên saơ nău nĕ dŭt ŭch dơi ntrŭt nsôr”.

Nău an sam ƀŭt bảo hiểm y tế an rmôt nuĭh jêr jŏt bah ăp gưl bu ur ta Dak Lak lah nău ƀư geh nkô̆ khlay ngăn. Mô knŭng kơl ăp oh yuh wât uĕh lơn mpeh nău dơi dŏng bảo hiểm y tế, n’hŭch mbak jâk prăk kaih rnôk mô lap kop ji, ma bah nĕ hôm rgop kơl an âk tay oh yuh dơi geh dơi gĭt ăp ndoh ndơ dak si n’hanh mât uănh săk soan, n’hao rnoh âk lam hvi bảo hiểm y tế lam ƀon lan ta ntŭk.

          Nuĭh rblang: Y Sưng Phê Ja