VOV4.M’nông: Uỷ ban săch kan Dak Lak mbơh, lam n’gor mra geh 1.794 ntŭk nklăch phiếu đah 1.802 ntŭk nklăch phiếu gưl XV ndrel ntơh măt HĐND năm kan 2021-2026. Bah năp nau geh bah srê tât jêr, ăp nau kan đăp mpăn nau njrăng rdâng srê Covid-19 tâm ăp nkuăl aơ mra geh ntrŭnh ân rjăp, đăp mpăn ân nar săch kan dăch tât. N’gâng kan dak si n’gor Dak Lak dôl uănh ân rjăp nau tât bah srê Covid-19 tâm ndrel bah dih dak, đăp mpăn nau tâm rgop đah Rnâng kan săch kan ndrel Rnâng kan njrăng rdâng kan rđau nau njrăng, rdâng srê Covid-19 ăp gưl.

Rđau kan Dak Lak uănh nau kan săch kan tâm ăp nkuăl.

N’gâng kan nchrăp nŭih, ndơ dŏng, dak si gay mra rdâng nau kan njrăng, rdâng srê Covid-19 tâm rơh săch kan. Uỷ ban săch kan n’gor Dak Lak đă ăp nkuăl săch ntŭk nklăch phiếu tŏng nau dơi njrăng rdâng srê, geh ntŭk tŏng hvi, kloh aih gay ma ƀư nau tâm nkhah rnôk hăn nklăch phiếu. Ăp cử tri ndrel nŭih kơl nau săch kan ân geh ntrŭnh nau put bok put mbung, rao ty đah dak si nkhĭt kman./.

Nŭih rblang: H’Thi