VOV4.M’nông - Kơt Đài TNVN lĕ mbơh, jêh 12 năm kâp, nuĭh ƀon lan ta nkual n’glău dak bât Krông Pách thượng ntơm dơi trơn ntŭk gŭ mhe. Ăp gưl n’gâng kan ƀon lan dôl rgum đăp mpăn nău rêh an nuĭh ƀon lan.

          Rnăk wa Ma Thị Sinh, ta thôn 9, xă Cư San, nkuăl M’Đrăk lah ngoay tâm âk rnăk bôk năp ta nkual n’glău dak bât Krông Pách thượng trơn tât nkual ntŭk gŭ mhe mrô 1, xă Cư Ea Lang, nkuăl Ea Kar. Jêh rlău 1 pơh, rnăk wâl wa dôl dơi n’gâng kan ƀon lan ntop kơl ndoh ndơ kon nuĭh gay ƀư jêh jay si, mpir ntă gạch. Jay dơi ƀư ta nkual têh hvi, êp nklang xă, geh trong bê tông, geh dak kloh uĕh tât ta ntŭk. 3 nuĭh kon wa Sinh, dôl nti tiểu học n’hanh mẫu giáo lĕ ntơm hăn nti ta ngih sam ƀŭt mhe, knŭng ƀah jay mô tât 500 mét. Nău rêh mhe ntơm dŭt dơh:

“Âk nuĭh ta xă ri dŭt uănh mĭn, ntop kơl rnăk wâl ƀư jay, ntưm chor, sŏk tung ndơ jur hao. Xă uănh mĭn kơt nĕ lah uĕh hôm. Jay gâp geh 5 sào lŏ, 5 sào mir, ôi taơ klak gâp ntơm ƀư dơm”.

Xă Cư Elang dôl rgum ntop kơl nuĭh ƀon lan ntŭk gŭ mhe đăp mpăn nău rêh

Wa Trần Văn Thanh, Kruanh UBND xă Cư Elang, nkuăl Ea Kar an gĭt, kơp tât dŭt khay 3, lĕ geh rlău 20 rnăk trơn tât ntŭk gŭ mhe mrô 1 ta nkual xă. Yor lĕ gĭt blău tâm nău ntop kơl nuĭh ƀon lan ntŭk gŭ mhe, jêng ăp rmôt bah xă tâm rgop dŭt uĕh, pă nău kan na nê̆. Xă tŏng ăp lĕ rngôch ăp rnăk tât ntŭk gŭ mhe dơi ntop kơl gay ơm đăp mpăn nău rêh. Đah ăp rnăk lĕ trơn tât nkual gŭ mhe, xă tŏng ăp du rnăk 1 sào neh gŭ, 5 sào neh tuch ba n’hanh 5 sào neh mir, tĭng di trong ƀư bah n’gor ntrŭnh. Nău nkra njêng dŭt dơh an kônh wa rnôk dak bât Ea Rớt, du gâl tâm nău nchrăp ƀư Dak bât Krông Pách thượng gŭ bah meng nkual ntŭk gŭ, pă dak tŏ đăp mpăn. Tâm rnôk ngih sam ƀŭt bah mẫu giáo tât trung học cơ sở ta êp nkual ntŭk gŭ. Aơ lah ăp nău dơh gay kônh wa đăp mpăn nău rêh:

“Xă gĭt aơ lah nău kan chính trị dŭt n’hâm khlay. kơt trong nchrăp bôk năp ri ƀon lan lĕ đă rmôt, nuĭh gay m’hâm ƀư rnôk kônh wa đah ri đăp mpăn nău rêh, đah rnă njrăng, jêh nĕ lah trong kan nkra njêng”.

Nkual ntŭk gŭ neh rđŭng n’hanh tâm di tŏng ăp nău ŭch tâm nău rêh nuĭh ƀon lan

Tĭng trong nchră, rlău 700 rnăk đah bơi 4.000 nuĭh ta 3 thôn 9, 10 n’hanh 11, xă Cư San, nkuăl M’Đrăk mbra dơi trơn tât ntŭk gŭ mhe mrô 1 ta xă Cư Elang n’hanh nkual ntŭk gŭ mrô 2 ta xă Cư Bông, nkuăl Ea Kar gay rhŏ an nău nchrăp ƀư dak bât 4.400 rmen prăk Krông Pách thượng. Bôk năp, nău tâm ban ŭch bah nuĭh ƀon lan mô âk, jêng knŭng geh 44 rnăk dăn trơn. Tât aƀaơ, đah nău rgŏ jă, bônh leng bah ăp gưl n’gâng kan ƀon lan n’hanh đah nău ngăn ăp rnăk dơi trơn đăp mpăn nău rêh uĕh lơn ntŭk gŭ âm, rnoh rnăk dăn trơn lĕ hao bơi 200 rnăk. Wa Nguyễn Đức Thảo, Groi kruanh UBND nkuăl M’Đrăk an gĭt, nkuăl dôl rgŏ jă tay rmôt, nkre ntop kơl ƀon lan trơn, nkre rgŏ jă, bônh leng gay geh tâm ban ŭch, đah nsrôih ơm jêh nău kan ntŭk gŭ mhe nkual n’glău dak bât Krông Pách thượng:

“Tâm khay tât nkuăl mbra ntrôl ngăch trong kan trok tâm, sŏk neh, rgŏ jă ƀon lan trơn sĭt ntŭk gŭ mhe. Tă bah trong kan trơn ri lĕ rngôch ăp rnăk ƀon lan tâm ban ŭch da dê gay sĭt nkual ntŭk gŭ mhe ma n’gor, nkuăl lĕ pă”.

Nuĭh răk rblang: Y Sưng Phê Ja