VOV4.M’nông – Đah bôk nău kan “Mpoh ang trong ƀon tơm”, âk km trong hăn nkual n’har bri Dak Lak lĕ dơi nglăp trong rse điện mpoh ang; nta nơih an nuĭh ƀon lan hăn nsong n’hanh rgop đăp mpăn rnă njrăng, đăp mpăn nkual n’har bri. Aơ lah ăp nău ƀư ntoh lư bah N’gor Đoàn Dak Lak rgop ndâk njêng ƀon lan mhe.

Bôk khay 3 năm aơ, nuĭh ƀon lan ta thôn 8, xă Ia Rvê, nkuăl Ea Sup, n’gor Dak Lak dŭt rhơn rnôk trong me têh tâm thôn dơi nglăp trong điện ang. Ndơ ƀư “Mpoh ang trong ƀon tơm” ta thôn 8 jong rlău 1 km, đah 20 n’gâng ŭnh ang, dŏng ŭnh măt nar, dĭng lĕ 35 rkeh prăk. Aơ lah nău ƀư tâm bôk nău kan “Khay 3 n’har bri” tă bah N’gor Đoàn Dak Lak tâm rgop đah N’gor đoàn Lâm Đồng ƀư ta nkual n’har bri n’gor Dak Lak, tâm nĕ geh N’gor Đoàn Lâm Đồng ntop kơl prăk ndơ ƀư, rmôt đoàn viên druh ndăm n’hanh nuĭh ƀon lan ntop kơl nar luh nglăp. Wa Phạm Hồng Lĩnh, kruanh thôn 8, xă Ia Rvê, nkuăl Ea Sup nkoch, bah rnôk geh ŭnh trong hăn, ăp nău ƀư bah nuĭh ƀon lan tâm thôn lĕ jêng uĕh răm lơn, kônh wa ăp nuĭh răm rhơn da dê.

Ndơ ƀư mpoh ang trong ƀon tơm ta thôn 8, xă Ia Rvê, nkuăl Ea Sup dŏng ŭnh điện măt nar

“Rnôk mô hŏ ntrŭp điện trong ri dŭt jêr jŏt đah nău rnă njrăng đăp mpăn. Jêh nglăp trong rse điện aơ nuĭh ƀon lan dŭt rhơn, bôk năp lah đăp mpăn rnă njrăng gung trong, kônh wa dŭt kơl n’hanh rhơn. Bah rnôk nĕ geh trong điện aơ ri kônh wa rgum hăn thể dục n’hanh măng nar an pơk 9 mông n’gul, 10 mông mư bĭch lĕ”.

Bah năp nĕ, bâh dŭt năm e, ta buôn Drang Phôk, xă Krông Na, nkuăl Buôn Đôn, ndơ ƀư mpoh ang trong ƀon tơm dơi ƀư geh 1,5 km đah 27 ntŭk ŭnh ang. Wa Y Chuôn Bkrông, nuĭh ƀon lan Drang Phôk an gĭt, ndơ ƀư aơ bâh rnôk jêh n’hanh ndơ̆ an dŏng tât aƀaơ lĕ nsĭt tay săk rnglăy uĕh. Geh ŭnh trong hăn mô knŭng kơl nău hăn nsong đăp mpăn, uĕh lăng rnă njrăng ma hôm ƀư an trong hăn uĕh lơn, nuĭh ƀon lan gĭt wât mât njrăng drăp ndơ nsum âk lơn.

“Lĕ rngôch kônh wa ăp nuĭh rhơn da dê, yorr geh ŭnh ang, hăn măng ngo, rnôk kop ji hăn chop khâl geh ŭnh trong ang jêng dơh njê, saơ rhơn ngăn”.

Tât aƀaơ, ta Dak Lak lĕ geh 8 thôn, ƀon nkual n’har bri dơi ƀư nglăp trong điện ang ntŭk gŭ rêh đah nklăp 13 km trong hăn thôn ƀon dơi mpoh ang. Tâm rnoh aơ geh ndơ tă bah công ty Điện lực Dak Lak ntop kơl, cán bộ tahen ăp pôih tahen n’har bri tâm rgop ƀư. Du đêt ndơ dơi N’gor Đoàn Dak Lak rgŏ jă kon nuĭh tâm rgop gay ndŏ ŭnh điện tât đah nuĭh ƀon lan nkual n’har bri.

Công ty Điện lực Dak Lak ntop kơl nglăp ndơ điện ta ƀon Drang Phôk, xă Krông Na, nkuăl Buôn Đôn

Nô Y Lê Pas Tơr, Groi Bí thư rnâng kan N’gor Đoàn Dak Lak an gĭt, bah năm 2014 tât aƀaơ, ndơ ƀư Mpoh ang trong ƀon tơm lĕ dơi ăp gưl đoàn ta Dak Lak mbơh ƀư đah âk trong ƀư mĭn nchrăp lor. Du đêt ntŭk kan nkuăl đoàn n’hanh đoàn bah dâng lĕ rgŏ jă nuĭh gay ƀư, tâm rgop đah điện lực ăp nkuăl ƀư, nglăp ndơ ta ăp ntŭk ƀon lan gŭ.

Ndrel đah nĕ, tâm 2 năm dăch aơ, N’gor đoàn Dak Lak mbơh ƀư bôk nău mpoh ang trong n’har bri, rgum nuĭh gay mpoh ang ăp trong hăn ta ăp thôn ƀon nkual n’har bri. Rƀŏng tât năm 2022 mbra ƀư geh 20 km trong n’har bri dơi mpoh ang.

“Lĕ rngôch nuĭh tơm prăk dơi kon nuĭh tâm rgop da dê. N’hanh êp tât Ban thường vụ N’gor Đoàn nchrăp mpoh ang tĭng trong n’har bri. Ri aơ lah nău nchrăp ƀư dôl dăn nău ntrŭnh bah gưl ủy kơt rgŏ jă tay ăp tơm prăk. N’hanh nkô̆ nău mpoh ang trong n’har bri mbra jŏ jong, nchrăp ƀư nklăp 20 km tâm lĕ năm kan 2017-2022, nsrôih tât lor lôch năm kan, lor rnôk đại hội Đoàn gưl n’gor ƀư mbra jêh trong nchrăp aơ n’hanh mbơh bah năp đại hội”.

Ăp ndơ ƀư mpoh ang trong ƀon tơm dơi ƀư lĕ rgop mât rnă njrăng đăp mpăn, n’hao nău rêh rêh drăp ndơ, nuih n’hâm an nuĭh ƀon lan ta ăp nkual dơi geh dŏng. Đah nuĭh ƀon lan gŭ rêh ta nkual n’har bri bah n’gor Dak Lak, ăp ndơ ƀư aơ lĕ nsĭt tay săk rnglăy ngăn ngên, rgop rgâl thôn ƀon, đăp mpăn rnă njrăng, đăp mpăn nkual n’har bri.

Nuĭh rblang: Y Sưng Phê Ja