VOV4.M’nông: Tây Nguyên dôl ma tâm nklang yan mih. Yơn lah, ta Ea Kar, nkuăl mpeh ba dâng ngăn bah n’gor Dak Lak dôl ma kro phang ƀư âk rbăn ha tơm tăm geh nau khuch, ăp ntil tơm gleh nar kơt mbo, ba hŏ roh dơm, khuch ngăn tât nau rêh bah nŭih ƀon lan.

            Nglau dak Ea Bư (xã Cư Huê, nkuăl Ea Kar) geh nau dâng 500 rbăn mét khối dak, đăp mpăn nau tŏ ân bơi tât 100 ha tơm tăm, tâm nê geh 46 ha ba dak 2 yan. Bah rnôk aơ n’gul khay, dak tâm nglau Ea Bư lĕ kro suăt. Gay ma kơl an ba, 2 pơh rlau aơ, Ntŭk kan Thủy lợi Ea Kar hŏ n’gân ntŭk pom dak gay ma rdâng kro ân ba. Nglau Ea Bư hŏ kro suăt, dak knŭng tŏng gay ma pom du nar tât 2 nar. Ăp ntŭk ba hŏ srih geh 2 khay ma n’gul. Ba dôl ma rnôk luh yơn mô tŏng dak, kro lĕ. Wa Võ Đức Danh, geh rlau 2 ha neh tăm tơm tăm jŏ năm ndrel ƀư lŏ êp nglau Ea Bư. Rnôk aơ hŏ lĕ dak tŏ ri ma tơm kro lĕ, rnôk aơ dôl kâp mih dơm:

‘Lah bri hôm e duh nar jŏ jong ri nau jêh aơ knŭng nklăp 50% dơm. Lah hôm prăng bri tay ri mra roh dơm lĕ ro. Ăp ntil tơm tăm khuch da dê, mô êng tơm cà phê, mà sầu riêng kŏ kơt nê, bơ kŏ ndri đŏng. Ma rnôk aơ lah nsum lah pom dak kơl an du gưl đê̆ đă dơm. Lah tâm pơh aơ ma mih ri dơi geh kơl an 50%, lah tât pơh ba kơi mô mih ri roh 100%”.

Wa Phạm Duy Hùng, Kruanh UBND xã Cư Huê, mbơh, ntơm bôk yan, n’gâng kan xã hŏ nchrăp lor nau jêr mpeh nau mô tŏng dak tŏ ân tơm tăm, ri ma bonh đă ƀon lan dŏng dak ân têm. Rnôk aơ tơm dak dŏng hôm ơm:

‘Tâm xã ri rnoh geh ba nklăp 200 ha. Hôm tâm ăp tơm tăm êng êng ri rnoh srih tăm nklăp 2.200 ha. Rnôk aơ ri ăp nglau kŏ suăt dak hôm, ndri ma nau kan pă dak kŏ jêr. Ngăn lah mbơh jă ân kônh wa ƀon lan lah ndăn dak dôl ma geh tâm ăp nglau dak bah rnăk vâl nơm ndrel rgâl nau tŏ ân tơm ân păng tâm di gay ma mât ân tơm tăm rêh. Ngăn lah hŏ khuch tât nau geh jêng, rnoh neh ngăn lah ba rgum tâm Tứ Xuân, Tư Ngiã ndrel thôn Ea Cung ndrel Buôn M’A, ƀuôn M’Riu kŏ geh nau khuch mpeh rnoh neh tăm ba”.

Rnôk aơ geh nklăp 22 nglau n’gâr dak bah nkuăl Ea Kar rnoh dak hôm knŭng 10-50% rnoh geh. Tâm nê geh nkoch tât nglau Ea Rớt. Ntŭk nglau Ea RỚt geh rnoh tŏ ân 450 ha ba tâm ăp lŏ bah xã Cư Êlang, Ea Dê ndrel 130 ha lŏ tâm nkuăl mhe ndâk bah trong hoch dak Krông Búk Hạ ndrel pă dak dŏng ân 1.200 rnăk tâm nkuăl. Rnôk aơ, ăp nglau dak ta Ea Rớt knŭng hôm 15% rnoh dak. Tâm nklăp 10-15 nar tay, rnoh dak tâm nglau aơ suăt kro. Bah năp nau tât nê, lơ 6/8, mhe nơh, UBND nkuăl Ea Kar hŏ ntrŭnh nau mbơh mpeh nau n’hao nau njrăng rdâng prăng bri tâm yan mih năm 2021. Tâm nê, rđau ngăn jrâu kan tuch tăm, UBND ăp xã, ăp ntŭk pă dak hoch, ƀư nau kuih kuai, pom nsach dak gay ma tŏ kơl tơm tăm. Wa Lê Đình Chiến, Groi Kruanh UBND nkuăl Ea Kar mbơh:

‘Ba dak lah rlau du rbăn ha, ê nkoch tât ôh ăp ntil tơm tăm êng. Mpeh tơm tăm ăp năm ri rnôk aơ nkuăl Ea Kar lah roh dơm tơm tăm ăp năm, ê nkoch tât tơm jŏ năm geh khuch tât neh tăm, rnoh geh. Mpeh ăp tơm ƀư gay ma njrăng nau prăng bri ri ê lor lah ăp nrŭk kan, rmôt kan ân geh dŏng lôch nau kan. Nkre nkuăl mra uănh gay ma kơl nchră. Tal bôk năp lah đă nau kơl an tă bah n’gor, tal bar nkuăl mra đăp mpăn nau rêh rnă njrăng, mô ân ƀon lan ji ngot. Rnôk aơ ri nau kơl an mpeh prăng bri ri jrâu kan tuch tăm dôl ma kơp ndrel mra jao ân ăp xã, nkuăl têh ndrel kơp uănh tay, pă tĭng rnoh geh nau khuch 100%, jêh ri nau khuch tă bah ăp ntil tơm nê nkuăl geh nau kơl an ân ăp rnăk ƀon lan”./.

Nŭih rblang: H’ Thi