VOV4. M’nông: Ơi kônh wa n'hanh băl mpôl! Lôch âk năm ntoh luh geh tât rlău 5.300 ŭnh điện măt nar ntưm chor, ăp khay mhe aơ, âk ntŭk ƀư ta n'gor Dak Lak hŏ pha lah n'hŭch đêt nchuăt điện tâm nŭng nar. Nău rlu an nchuăt điện tâm trôk nar dŭt duh mbra khuch tât nău nsĭt geh ntuh kơl, yơn tĭng nău rblang bah n'gâng kan điện, nău dja gay đăp mpăn an lam trong rse, der bah jâk bêng êng tĭng ntŭk.

            Ta n'gul nar duh n'heng bah khay wai Tây Nguyên, ŭnh điện măt nar ntưm chor bah doanh nghiệp Quang Luận ta xã Pơng Drang, nkuâl Krông Buk, n'gor Dak Lak  nsĭt tay nău geh ndrop, rnôk nkre ntưm bah duh an kho xưởng, nkre pă điện dŏng an nău kan ƀư njêng tăch rgâl ndơ ƀư nhih jay, phân poh, nkre geh tơm wăng sa đăp mpăn bah nău tăch điện an ngih dak. Nuĭh tơm doanh nghiệp, wa Nguyễn Thùy Trang, an gĭt, aơ lah rnoh ntuh kơl dŭt geh nău tam, bol mhe aơ ân n'hŭch an nchuăt đêt ăp nar:

“Đah aƀaơ 5 khay gâp ntrŭp ŭnh điện măt nar công suất 500 Kwp ri prăk điện nsĭt geh ăp khay ntơm bah 100- 120 rkeh mbro. Lah mô geh nkô̆ nău ri aơ lah tơm ntuh kơl dŭt geh wăng sa. Ntơm bah bôk năm tât aƀaơ ri mpeh điện lực geh quy định n'hŭch đêt pơk dŏng điện, geh ăp nar n'hŭch tât 15% công suất pơk, ri mpôl hên tâm boh jăp; ntĭt kơt 9h ôi koh điện ri geh công nhân điện tât n'hât, tât 2h kêng măng ri khân păng mbra geh măt ta aơ gay kơl doanh nghiệp bah ir roh huach prăk dŏng kan".

            Ân rlu pơk nchuăt điện tâm nŭng nar ăp nar ntơm bah 2 khay aơ đŏng, wa Vũ Khắc Lợi, ntơh măt du công ty nkret njêng ndơ tuch tăm tăch n'gluh ta Rkŭm công nghiệp Buôn Hồ, n'gor Dak Lak, an gĭt: gay mât dŏng nsĭt geh bah ŭnh điện măt nar mtưm chor công suất bơi 1 MWp, doanh nghiệp ƀư dŏng điện mpêt nkrem, đăp mpăn tĭng di nău ntĭm nti bah n'gâng kan dơi kan, nkre pơk hvi tay nău kan ƀư njêng:

“Geh ăp rnôk n'hŭch tât 7%, 11% mô lah 15% ri mpôl hên ŭch tĭng jăp đŏng. Mpeh nău dŏng điện tâm rnôk dja ri công ty n'hât ăp ndơ ntrŭp dŏng, ăp máy móc mô lăng khlay, mô lah tâm trôm kho nđik ri n'hŭch an dŭt lĕ, nkre dŏng an nău ŭch ƀư nđik ndơ prăp. N'hanh công ty dôl ƀư tay du jay xưởng đŏng gay n'hao rnoh âk dăng nkret njêng rlău bar tơ̆ rđĭl đah jay xưởng bah aơ".

Tĭng wa Hà Văn Chương, Groi giám đốc Công ty Điện lực Đăk Lăk, lam n'gor aƀaơ geh 5.339 nhih máy điện măt nar ntưm chor đah lĕ rngôch công suất bơi 650.000 KWp. Tâm rnôk dja hŏ geh rlău 400 nhih máy hŏ n'hŭch đêt nchuăt pơk điện, tă bah phụ tải dŏng đêt, tơm điện pơk rmeh. Aơ lah ăp nhih máy geh công suất ntơm bah 100 KWp let lơ, geh trạm biến áp êng gay n'glăp điện tâm trong sre. Dơn geh ăp nhĭh máy điện măt nar ntưm chor jê̆, nthoi sŏng tâm trong rse điện dŏng ri mô geh n'hŭch đêt. Rblang mpeh nău ân n'hŭch mpoh nchuăt điện bah âk nhih máy điện măt nar ntưm chor (way lah n'hŭch đêt pơk tâm nŭng nar- rnôk bri dŭt duh tâm nar) wa Hà Văn Chương lah:

Tơm ŭnh nar pă an bah điện măt nar âk nklăp 20- 25% ri trong rse nchuăt dŏng đăp mpăn. Rnôk păng geh rnoh rlău nê ri nău đăp mpăn lam trong rse điện dŭt jêr jŏt. Yor điện măt nar jŭr hao mbro ŭanh tĭng duh nđik trôk nar, tĭng nar- măng n'hanh mô dơn nê tŭk hăn rlău đŏng. Jêng năư koh n'hŭch điện măt nar tâm ăp mông mô rgâl lah ndơ dŭt n'hâm khlay gay đăp mpăn nău nchuăt dŏng bah lam trong kan điện".  

Tĭng nău rblang bah wa Hà Văn Chương, đah ăp nhih máy điện măt nar ntưm chor kalơ jay xưởng, ntŭk mât rong têh hvi, bol ma geh n'hŭch đêt pơk điện ri nsĭt geh dŏng hôm uĕh đŏng, tă bah khân păng lor nchră dŏng tơm ŭnh nar sĭt jêng tay ơm geh. Nău n'hŭch đêt mô khuch âk tă bah dơn "koh" du gâl rnoh điện tâm nŭng nar dơm. Dơn geh nhih máy điện măt nar ntưm chor ma ta nâm nê mô ƀư njêng tăch rgâl roh huach âk điện, ri mbra geh n'hŭch du gâl nsĭt geh wăng sa tă bah mô dơi tăch điện. Yor kơt nê̆ nuĭh tơm ntuh kơl ân mĭn tât nău ŭch geh dŏng điện ndăn lĕ an nhih máy điện măt nar ntưm chor bah he./.

(Minh Huệ VOV Tây Nguyên)- Nuĭh rblang: Điểu Thân