VOV4.M’nông – Ôi 8/4, Kruanh UBND n’gor Dak Lak Phạm Ngọc Nghị ƀư tơm rơh rƀŭn gay uănh mĭn tay, mkra du đêt nkô̆ nău geh tât tâm nău ƀư sam ƀŭt sam tra ntuh kơl ăp nău nchrăp ƀư ta ntŭk. Ta rƀŭn, nuĭh ntuh kơl, ntoh măt ăp n’gâng kan, nău kan lĕ nkoch, mbơh mpeh ăp jêr jŏt, wăk kol tâm nău mkra du đêt nkô̆ nău geh tât tâm nău ƀư sam ƀŭt sam tra ntuh kơl ăp nău nchrăp ƀư ta n’gor, geh:

Lam ntŭk nar rƀŭn

Đồ án dăp rgum pă nkual Tổ hợp pâl nđaih sinh thái, nkual pâl rlưn n’hanh tach golf Hồ Ea Nhái; dăn đă nău nchrăp ƀư Ntŭk Logistics nkual Tây Nguyên bah Tổng Công ty Cổ phần Bưu chính Viettel. Ntoh ngơi n’glôn jêh ăp rơh rƀŭn, Kruanh dak UBND n’gor Dak Lak Phạm Ngọc Nghị nkoch ăp jêr jŏt, wăk kol đah ăp nuĭh ntuh kơl. Nkre jao an ăp n’gâng kan, nău kan, ƀon lan tâm rgop đah ăp ntŭk kan geh tât n’hanh uănh tay dăp rgum, rgum lĕ rngôch, lôch jêh ăp nău mbơh, tâm ôp tâm nchră ăp sam ƀŭt khlay tĭng nău ntrŭnh, ơm mbơh an UBND n’gor uănh mĭn, dôh rklaih wăk kol gay đăp mpăn ăp nău nchrăp ƀư dơi ƀư săk rnglăy, rgop hun hao wăng sa-rêh jêng bah n’gor.

Nŭih rblang: Y Sưng Phê Ja