VOV4.M’nông: Bơi 2 năm bah năp, âk kon hŏk geh nău rêh jêr jŏt ta ăp ngih sam ƀŭt nkual jru ngai ta nkuăl Cư M’gar dơi wơt dơn du nău nchrăp ƀư mha moh săk “Ntŭk mât rong ntil bê”. Aơ lah nău nchrăp ƀư yor Câu lạc bộ Yor mpôl oh he (mpeh tâm Hội đồng Đội nkuăl Cư M’gar) boăt nthoi n’hanh ƀư tĭng gay kơl kon hŏk ach o, rgop ntop kơl gay rnăk wâl ăp oh hun hao wăng sa.

          Tât ăp ôi ơm, oh Đặng Viết Mạnh kon hŏk jrô 7A, Ngih sam ƀŭt THCS Ngô Mây xă Ea M’Droh, kơl me bơ̆ hăn tâm mir tôch n’ha, rek pih an mpôl bê bơi 10 mlâm sa. Oh Mạnh nkoch, mpôl bê dơi ntop hao bah du kôp bê, yor Hội đồng đội nkuăl Cư M’gar an tâm khay 5 năm 2020. Bơi 2 năm mât rong hun hao, aƀaơ rnăk wâl oh dơi tăch gay sŏk prăk rwăt ndơ sông sa rgâl nău rêh kơt trok prăk nti an 4 oh yuh, di bôk năm nti mhe.

          “Bah aƀaơ tât Tết bê lŏ deh tay 2-3 mlâm tay, dĭng lĕ hao 10 mlâm bê hôm. Mê̆ bơ̆ lĕ tăch 2-3 mlâm gay rwăt phê, rwăt ndrôm sam ƀŭt n’hanh trok prăk nti an 4 oh yuh kon hăn nti”.

          Tâm ban ma nĕ, oh Bàn Minh Kiệt kon hŏk jrô 7C, Ngih sam ƀŭt THCS Ngô Mây, xă Ea M’Droh dơi hội đồng đội nkuăl Cư M’gar an 3 mlâm bê ntil ta bôk khay 3 năm 2020. Tât aƀaơ hin, rnăk wâl oh Kiệt lĕ mât hun hao 13 mlâm, khlay bơi 100 rkeh prăk.

Du hê kon hŏk ach o ta nkuăl Cư M’gar dơi an 2-3 bê ntil, khlay 8-10 rkeh prăk.

Tĭng wa Lý Văn Chòi bơ̆ bah oh Kiệt, dơi dơn bê ntil rlău ma kơl rnăk wâl geh tay ndơ mât rong hun hao wăng sa jŭt n’hŭch ach o, ri hôm kơl ăp kon gĭt wât lơn tâm nău râng pah kan jan sa, tiăr nti nău gơih nđơr.

           Ăp kon gŭ ta jay mô geh ndơ ƀư, dơi an bê ri ăp mon ndăn hăn joi n’ha keo, rek pih an bê sa kơl mê̆ bơ̆. Nău kan râng pah kan kơt nĕ rƀŏng ăp mon têh jêng lơn yor gĭt rnôk nti, rnôk kan. Bah kơi aơ jêng nuĭh uĕh an nău rêh”.

          Nai Mai Văn Chuyền, Tổng phụ trách Đội Ngih sam ƀŭt THCS Ngô Mây (xă Ea M’Droh, nkuăl Cư M’gar) năm nti 2019-2020, nău nchrăp ƀư “Ntŭk mât rong bê ntil” ntơm dơi ƀư. Liên đội lĕ kuăl jă kơl bah ăp nuĭh lŏng bôk tôr ta nkual ƀon têh Hà Nội, HCM, Đà Nẵng n’hanh du đêt n’gor Tây Nguyên mbơh ƀư an bê ntil an ăp oh mât rong hun hao wăng sa. Nkre, hội tâm rgop đah mpôl kan, nsum mpôl. Rmôt kan thú y... ntop kơl ƀư ndrung wăng, chuh dak si njrăng n’gang srê mô lah ntĭm kỹ thuật mât rong bê.

Jêh 2-3 năm mât rong, ăp ntrong bê hun hao bah 10-15 mlâm da dê

          Kuăl lah “Ntŭk mât rong ntil” yor bê mbra mô an nkre ma knŭng an manh, uănh bê ntil kơt drăp ndơ bôk năp gay tâm pleh. Tĭng nĕ, du rnăk kon hŏk geh nău rêh jêr jŏt mbra dơi nău nchrăp ƀư ntop kơl bah 2-3 mlâm bê, khlay nklăp 8-10 rkeh prăk. Tâm 3 năm, rnôk bê lĕ hun hao ri rnăk wâl plơ̆ rnoh bê đah têh tâm ban bôk năp gay jao an kon hŏk ach o êng.

          Gĭt saơ săk rnglăy n’hanh nău uĕh bah nău nchrăp ƀư, Câu lạc bộ Yor mpôl oh he lĕ nsrôih rgŏ jă, kuăl jă kơl bah ăp nuĭh lŏng bôk tôr tâm n’hanh bah dih n’gor, tă bah nĕ ndơ̆ nău nchrăp ƀư tât kon hŏk ach o mô knŭng ta xă Ea M’droh ma hôm ta âk ntŭk êng ta nkuăl Cư M’gar kơt: Ea Kpam, nkuăl têh Ea Pốk... Knơm nĕ, bơi 2 năm bah năp, lĕ geh 8 mlâm bê đah âk 20 mlâm bah “Ntŭk mât rong bê ntil” dơi an rnăk kon hŏk geh nău rêh ach o ta ntŭk.

Jêh nĕ, ăp oh lŏ ntop kơl bê ntil an ăp băn jêr jŏt êng ta du đêt xă nkual jru ngai ta nkuăl Cư M’gar.

          Aƀaơ rnoh ăp oh dơi kơl dŭt âk geh tâm ăp xă Ea M’droh, Ea Kpam n’hanh Ea Pốk. Yơn lah, jêh uănh gĭt nu nău bah Hội đồng đội nkuăl Cư M’gar ri aƀaơ hôm e dŭt âk oh kon đơi, mô lah geh nău rêh jêr jŏt ta ăp xă êng ta lam nkuăl Cư M’gar an dơi kơl. Aơ lah ntrong kan uĕh n’hanh geh nkô̆ nău, kơl ăp oh nkre dơi hun hao mât rong n’hao nău geh nkre ntĭm nti gĭt wât pah kan jêng mpôl hên mbra pơk hvi gay rêng hvi lam nkuăl”.

          Nău kuăl jă ntop kơl bê ntil bah Hội đồng đội nkuăl Cư M’gar an kon hŏk ach o ta ăp xă nkual jru ngai ta nkuăl Cư M’gar lah trong ƀư uĕh, ngăn ngên. Trong ƀư aơ dŭt tâm di đah ƀon lan, nkual yôk. Tă bah nĕ, kơl rnăk wâl ăp oh geh tay dơi hun hao ntop rgâl nău rêh; lơn lah rƀŏng tât kon hŏk tât nău tiăr nti nău mĭn gơih nđơr tâm pah kan jan sa n’hanh nti nsơm./.

                    Nuĭh rblang: Y Sưng Phê Ja