VOV4.M’nông – Măng 25/4, rmôt tahen n’har bri ta n’har bri Dak Lak lĕ saơ n’hanh nkhah ngăch 13 nuĭh ƀon lan plơ̆ sĭt bah Campuchia. 13 nuĭh aơ lah ăp nuĭh ƀon lan gŭ ta nkuăl Ea Súp, hăn dak băl Camuchia ƀư sa. Rnôk srê Covid-19 ntoh ta Campuchia n’hanh nu nău jêr jŏt, rmôt nuĭh aơ lĕ plơ̆ sĭt Việt Nam tă bah trong har ta trong n’har bri Việt Nam-Campuchia.

Ntŭk uănh nđôi srê Covid-19 ta Ia Rvê-Dak Lak

Rnôk 12 mông măng 25/4, rmôt rmôt nuĭh aơ lăp tâm neh dak he lĕ geh rmôt n’har bri Ia Rvê, nkuăl Ea Súp uănh nđôi saơ. Jêh nĕ, lĕ rngôch 13 nuĭh dơi ndơ̆ sĭt nkhah êng rgum ta Ngih dak si nkuăl Ea Súp n’hanh dơi sŏk mham ƀư uănh năl srê. Jêh uănh năl srê bah Ntŭk uănh nđôi ji n’gor măng 25/4 an saơ, lĕ 13 nuĭh aơ mô ntưp đah Sars-CoV-2 rơh 1.

          Nŭih rblang: Y Sưng Phê Ja