VOV4. M’nông: Mô tŏng dak dŏng dôl ƀư an nău rêh bơi 500 rnăk ƀon lan ta xã Đăk R'la, nkuâl Dak Mil, n'gor Dak Nông geh rlơ̆ rlơt. Âk nuĭh hŏ manh nuĭh khoan ntu roh bar pe jât rkeh prăk yơn mô hŏ ban tơm dak tu ơm.

Rlău 1 khay aơ, rnăk wa Trần Thị Bích Phượng ndrel âk rnăk ta thôn 5, xã Đắk R’la ân rgop prăk ăp nar, rvăt hang rbăn lít dak sĭt tâm pă dŏng yor ăp ntu dak hŏ suăt kroh. Wa Phượng an gĭt, nô nău mô tŏng dak dŏng ƀư nău rêh bah kônh wa geh tât khuch dŭt âk. Ăp rnăk ân đă du hê gŭ ta jay kâp geh dak gay sŏk:

“Nuĭh ƀon lan ta aơ lĕ rngôch mô tŏng dak dŏng da dê n'hanh ân rvăt dak sĭt dŏng. Ăp nar rĭng mpôl hên rvăt dak kloh uĕh dŏng lĕ 1.500 lít, dak ân hăn rvăt lah mô mô geh ndơ gay ma dŏng. Mpôl hên ŭch rŏng ăp gưl mhâm ƀư gay ntop kơl mô lah nsĭt an mpôl hên du tơm dak  kloh uĕh gay nuĭh ƀon lan geh tơm dak dŏng gay nuĭh ƀon lan đăp mpăn gŭ rêh".

Mô dơn ân rvăt dak lọc sĭt dŏng, rnăk wa Phạm Thị Vân, ta thôn 3, xã Đắk R’la hôm n'gluh bar pe jât rkeh prăk manh đă bu hăn khoan ntu joi tơm dak đŏng. Wa Vân an gĭt, rnăk i lap mơ lôk di geh ta tu dak hôm ƀa ƀă lah lôk jru hang rhiăng mét mô hŏ ban tơm dak ơm.

“Nkual dja nău kuĭh ntu mâp dŭt âk jêr jŏt. Rnăk gâp hŏ n'gluh 40 rkeh prăk gay lôk ntu joi tơm dak yơn dŭt jêr ngăn. Ân roh tât 3 nar rnăk mơ bơm geh du bồn dak gay dŏng. Aƀaơ rnăk hên hôm n'gluh prăk rvăt dak thŭng sĭt dŏng ngêt sa ăp nar đŏng".

Tâm ban kơt nê đŏng, ta thôn 2 bah xã dja aƀaơ hŏ geh 30 rnăk ntuh kơl lôk ntu dak joi geh dak dŏng, ri tât 28 ntu mô ban geh tơm dak. 3 ntu dak dơi ngih dak ntuh kơl ƀư bah âk năm bah năp nơh, hŏ suăt lĕ rngôch đŏng.

Tĭng ôp uănh bah UBND xã Đắk R’la, lam xã aƀaơ geh nklăp 500 rnăk, đah rlău 1.500 nuĭh dôl mô tŏng dak dŏng mbro, lơn âk rgum ta thôn 2, 3 n'hanh 5. Wa Ngô Quang Văn, Groi  kruanh UBND xã Đắk R’la rblang ăp thôn tâm xã geh neh ntu sop prêh, ngai đah tơm dak da dê. Tâm rnôk nê, lam xã dơn geh 1 trong dak rgum dŏng nsum ta thôn 7 dơm, jêng mô dơi tâm pă ăp tŏng dak.  

“N'gâng kan ta ntŭk hŏ rgŏ jă kônh wa ƀư bah jêr jŏt mpêt nkrem dak dŏng, dŏng dak tâm di. Mpeh jŏ jong ta ntŭk xã Đăk R'la neh ntu nău lôk ntu mbra mô geh ban dak. Xã hŏ dăn đă n'gor ân geh trong nkra jŏ jong lah bơm dak kloh uĕh ta dak bât Đô Ri 2 ta thôn 5 n'hanh n'gân trạm bơm bah kơi UBND xã gay nđơn n'hoch dak tât ăp thôn”.

Nô nău mô tŏng dak dŏng tâm khay wai ta xã Đăk R’la ntoch jong bah âk năm aơ. Nuĭh ƀon lan tâm ban kơt n'gâng kan xã dŭt ŭch rŏng ăp gưl, ăp n'gâng kan ơm ntop kơl prăk dŏng ƀư gay nuĭh ƀon lan ta ntŭk geh dak dŏng ngêt sa, tŏ djrah an tơm tăm đŏng./.

Nuĭh rblang: Điểu Thân