VOV4.M’nông: Kơp ntơm bah kơi năm 1975, nkah ndray Nar pah kan lam ntŭr neh 1/5 ta Việt Nam nar lơn ma geh nkô̆ hôr khlay rnôk lam Đảng, lam ƀon lan, lam tahen he nkah ndray Nar lơh dơi 30/4. Aơ lah rnôk rơh kơn Công nhân n'hanh nuĭh ƀon lan pah kan lam dak nkah tay nău way ơm rdâng lơh phŭng rlăng lăp pit in neh dak; khuh n'gôr tĭng ăp trong leo tâm rlong rŏng dak gay mpơl nuih n'hâm nkah gĭt, nkah gĭt jru đah Kruanh Hồ Chí Minh- nuĭh kruanh têh kuâng bah rnoi nuĭh he. Wa hŏ geh n'hâm suan dŭt têh kuâng kơl ƀon lan he gĭt dơi nău khlay kăl e n'hanh ring tam bah nău nkah ndray Nar pah kan lam ntŭr neh 1/5, ntơm bah nê lơn ma nsrôih tay tĭng trong cách mạng tă bah Đảng n'hanh Wa Hồ dêh rŏng hŏ sơch, rdâk njêng n'hanh mât njrăng nâp neh dak Việt Nam xã hội chủ nghĩa.

            Ta Hà Nội, Tổng liên đoàn Lao động Việt Nam mhe ƀư nau nkah 135 năm nar lam ntur nẹh pah kan (1/5/1886-1/5/2021), rgŏ jă Khay công nhân. Tât râng ndrel ntoh nau ta nar rƀŭn, Kruanh dak Nguyễn Xuân Phúc lah kloh, tâm nau kan hun hao bah cách mạng Đảng, Ngih dak ndrel ƀon lan nơm mro ân nau kơl an, mât chăm ueh ngăn tât giai cấp công nhân, nŭih pah kan ndrel ntŭk kan công đoàn. Ngăn lah jêh 30 năm rgâl mhe công nhân ndrle nŭih pah kan dôl geh mặt tâm ăp nau kan, ăp nau văng sa, ăp rmôt hăn leo lor tâm nau kan rgâl mhe ăp ntil, ueh mhe neh dak ndrel ƀư nau ŭch bah rnoi mppol. Kruanh dak rnê ăp gưl kan công đoàn hŏ ƀư rjăp nau rđau bah Ban bí thư mro nsôih, blau mhe ntrŭnh ăp nau kan geh nau khlay bay bơi tât 10 năm Khay công nhân ngăn jêng lah nar rgum bah công nhân, viên chức, pah kan lam dak. Kruanh dak rnê prêh nau mĭn blau mhe bah đoàn viên, nŭih oah kan lam dak yor nau têh dăng bah ntŭk kan, rmôt kan ndrel nau hun hao bah neh dak. Nkre lah, đă ntŭk kan công đoàn ơm ndâk bôk nau kan bah Công đoàn Việt nam ƀư nau ntrŭnh Đại hội tal 13 bah Đảng đăp mpăn khoa học ân năn, n’hêl./.

Nuĭh rblang: Điểu Thân n'hanh H'Thi