VOV4.M’nông: Bah nău ŭch đeh, rŏng êng bah nơm, du đêt druh ndăm nuĭh rnoi mpôl đêt ta xă Ea Mnang, nkuăl Cư M’gar, n’gor Dak Lak lĕ rgâl jêng ntrong kan ntơm ndâk njêng nău kan. Ăp săk rnglăy bôk năp ntuh kơl ăp ntrong kan lĕ nsĭt nău geh an săk nơm n’hanh dơi âk druh ndăm êng uănh nti nsơm, rgop ntrŭt nsôr ntrong leo ndâk njêng nău kan ta ntŭk.

          Bôl mâp âk jêr jŏt tă bah chôt srê Covid-19 geh jêr jŏt yơn tâm năm aơ nô Đàm Đình Hiếu, 29 năm deh, rnoi Tày, ta thôn Bình Hòa, xă Ea Mnang hôm e tăch n’gluh geh du đêt ndơ nja n’hôm an ntŭk tăch Nhật Bản n’hanh Ấn Độ. Đàm Đình Hiếu an gĭt, yor khuch bah srê, tu tơm ndơ ƀư jêr joi n’hanh nău rdêng dŭt jêr jŏt jêng nô knŭng dơn đêt sam ƀŭt nchăm ndơ dak bah dih, hôm ƀa ƀă hôm e rgum an ntŭk tăch chrai tâm dak n’hanh ăp nuĭh chrai rwăt ndơ lĕ jêh ƀư.

          Đah Đàm Đình Hiếu, ntơm ndâk njêng nău kan đah n’hôm uh lah trong hăn mhe mâp. Bôk năp yor ŭch n’hanh ŭch nơm ƀư jêh êng du dĭng n’hôm uh, nô Hiếu mĭn joi nti êng ƀư dĭng n’hâm uh tâm mạng internet. Jêh âk tơ̆ ƀư mô jêh, ƀư djơh rhiăng dĭng, nô lĕ dơi geh dĭng n’hôm nơm ŭch n’hanh nchih jêng ndơ bah nơm tâm ăp rmôt, mpôl geh tât dĭng n’hôm uh tâm trang mạng xã hội. Dơn nău ơh dŭt uĕh bah ăp nuĭh uănh tât, gĭt saơ nău geh tăch rgâl bah ndơ dĭng n’hôm jêng bah năm 2015 nô lĕ ntuh kơl rwăt tay măy mŏk gay êng nkra dĭng n’hôm uh jêh nĕ nchih mbơh tâm mạng tăch.

Đàm Đình Hiếu ntơm rdâk njêng nău kan ntoh bah nău ŭch nđor dĭng n’hôm uh

          Aƀaơ, rlău ma nuĭh rwăt nchăm âk bah 1.000-2000 dĭng n’hôm du khay, nô hôm dŏng mạng xã hội gay tăch chrai dĭng n’hôm lĕ jêh ƀư đah rnoh prăk bah 1 rhiăng tât du rkeh du mlâm dĭng n’hôm. Knơm nĕ nsĭt tay nău geh đăp mpăn ăp khay bah 15 tât 20 rkeh prăk. Đah rnoh ndơ nchăm ăp nar lơ âk, nô Hiếu dôl mĭn pơk hvi nkra njêng, rwăt năp tay ndơ ê nkra, joi tay nuĭh kơl ƀư n’hanh pơk jrô ntĭm dĭng n’hôm gay ntop tay nău ŭch bah nơm. Nô Đàm Đình Hiếu lah:

          “Tât aƀaơ gâp ƀư geh 5-6 năm hôm, bôk năp pă an ăp shop têh n’hanh geh Zalo, Facebook, Fanage gay tăch ndơ ri rnoh ndơ ăp khay geh tăch đăp mpăn. Trong rƀŏng êp tât oh mbra pơk du ntŭk tăch ndơ uh rnoi mpôl đêt n’hanh mbra tăch pă dĭng n’hôm, ntop đah băl bah oh mbra ntĭm đơn hôm oh ntĭm uh dĭng n’hôm”.

          Ntoh bah nău ŭch êng nơm, nô Hoàng Văn Nam, 33 năm deh, rnoi Nùng ta thôn 6 (xă Ea Mnang) lĕ săch mât djăr bri gay joi ntop tay ndơ geh. Hoàng Văn Nam nkoch, bôk năp knŭng mât djăr gay uănh, jêh nĕ nkoch đah băl mpôl, nchih tâm ăp trang mạng xã hội gay tâm nđŭr đah rmôt ŭch. Bah kơi aơ, âk nuĭh joi tât ôp rwăt djăr ntil n’hanh đă nkoch nău blău ơm mât rong, nô răm nkoch đŏng. Bah bôk năm e, nô ntơm hăn mĭn joi n’hanh yơng ntil, rơ̆ mbrơi mbrơi rnoh djăr me, nkuăng hao 100 nlâm. Nkre yơng ntil nkre tăch ntil, tâm năm aơ nô lĕ tăch geh rlău 30 kôp djăr ntil. Tĭng Nam, ntil djăr dôl mât dơi yơng ntil bah djăr bri jêng hôm e dơi mât nău bên bah djăr bri, lŏ dơi mât tăch kơt ơm tâm bri jêng nuĭh ŭch, du kôp djăr ntil 8 khay mât geh tăch bah 800 rbăn tât 1,2 rkeh prăk. Bôl mât djăr lah nău ƀư sa ntop dơm, dŏng rnoh neh mir ơm geh (rlău 1ha) n’hanh ndơ sa bah tơm tăm yơn nkop đah wăng sa ri mât djăr bri hôm e geh âk lơn nkôp đah ăp ntil mpa rong êng. Yor nê, nô mpŏng năm tât pơk hvi tĭng trong mât rŏng ntŭk yơng ntil djăr aơ.

Nô Hoàng Văn Nam mât mpôl djăr bri tâm rnôh deh kon.

          “Mât djăr aơ he saơ soan chŏl nău ji pơng dŭt uĕh, đah pơng sa dŭt đêt, ndơ sa knŭng lah mbo, ba. Kơt djăr kon ri gâp ntop tay ăp ntil vitamin an pơng geh soan chŏl nău nuh srê gay rlet rlău lvang pơng hôm e jêt n’hanh soan chŏl nău nuh srê mô dăng. Tâm năm tât gâp mbra ƀư yơng ntil tay đah rnoh âk lơn, ndâk ƀư nong wang gay pă an kon ntil mô lah poăch tŏng ăp nău ŭch ta ntŭk tăch”.

          Tĭng nô Nguyễn Văn Mẫn, bí thư đoàn xã Ea Mnang, nkuăl Cư Mgar, ăp năm dăch aơ ta xă ntoh âk ntrong kan druh ndăm hun hao wăng sa, ndâk njêng săk nơm, ndâk njêng nău kan. Tâm nĕ âk ntrong kan bah druh ndăm rnoi mpôl đêt hun hao bah nău ŭch rŏng mhe. Êng ntrong kan ƀư dĭng n’hôm uh n’hanh mât rong djăr bri lah 2 ntrong kan bôl mhe yơn ntơm nsĭt geh săk rnglăy wăng sa uĕh, nsĭt tay nău geh đăp mpăn an druh ndăm jêng dơi đoàn xã uănh mĭn, ntrŭt đă. Ndrel đah ăp nău ƀư hăn ndrel, ntop kơl nta nơih đah ntŭk ntô, đoàn xã ntop kơl mbơh ntĭm n’hanh boăt nthoi gay druh ndăm dơi gĭt ăp tơm prăk, hăn uănh nsong nti nsơm ăp ntrong kan gay bah nĕ geh tay trong rƀŏng ndâk njêng nău kan, ndâk njêng an săk nơm.

          “Êp tât Đoàn xã mbra tâm ôp ăp sam ƀŭt rhăch nău gay dăn manh prăk ntop kơl bah tơm prăk nkrem ntơm rdâk njêng nău kan đah Nkuăl Đoàn n’hanh rmôt kan an đoàn viên druh ndăm ta ntŭk hăn uănh ăp ntrong kan aơ gay nti nsơm tay ntrong kan tâm di đah tĭng nău kan bah đoàn viên druh ndăm”.

          Nuĭh rblang: Y Sưng Phê Ja