VOV4.M’nông: Tâm n’gor Dak Lak tâm ăp nar dŭt năm aơ, ăp rmôt kan, nkuăl dôl ma ngăch ƀư ân ngăch jêh nau ndâk njêng ma rhiăng ngih kơl an ân ăp rnăk ach o, đăp mpăn nau rêh. Tâm rnôk mâp nau jêr yor srê nuh, ăp ngih geh ndâk kơl an aơ hŏ ƀư duh răm lơn ăp nau rêh bah ăp rnăk mâp nau jêr bah năp yan sial puh.

Tâm ngih hôm tăng ƀô dak sơn mhe, kon bu klô jê̆ bah rnăk yuh H’Nuyn Êban, tâm ƀon Jung A, xã Ea Ktur, nkuăl Cư Kuin, nchuăt tâm lam ngih ngăn. Bâr gơm bah kon se kơt lah ƀư bah ngăn nau ji nik bah yan sial puh. Yuh H’Nuyn rhơn nkoch:

‘Gâp rhơn ngăn yor ntơm jêh aơ tă gâp geh ngih mhe hôm. Bah năp nơh, rnăk hên rêh tâm ngih lĕ truh sat hôm, rnôk aơ mô hôm geh nau rvê ôh rnôk bri mih mô lah nar. Gâp dăn lah ueh ăp gưl n’gâng kan hŏ ndâk ngih gŭ ân ma rnăk vâl hên”.

Kŏ geh công ty điện lực Dak Lak kơl an 60 rkeh prăk gay ma ndâk ngih tâmn rơh aơ, yuh H’Blinh Niê, tâm ƀon K’niêt, xã Ea Ktur, rhơn ngăn, 2 hê ur sai, 4 nŭih kon rnôk aơ mô hôm rvê ôh lah geh bri mih sial:

‘Ur sai hên mâp nau jêr ngăn, rnôk aơ geh điện lực kơl ƀư an ngih mhe ri rhơn ngăn, m’ak ngăn. Ur sai hên nsôih tâm jă pah kan jan sa ân geh jêng”.

Wa H’Kim Hoa Byă, Kruanh Uỷ ban Mặt trận Tổ quốc Việt Nam n’gor Việt Nam n’gor Dak Lak mbơh, jêh âk khay ƀư tâm nkhah srang nŭih yor srê Covid-19, ăp nar dŭt năm aơ, ăp rmôt kan, nkuăl tâm n’gor dôl ntrŭt dăng nau ƀư ndâk ân ngăch jêh ma rhiăng ngih gay ma kơl an rnăk ach o đăp mpăn nau rêh. Tĭng nê, ăp rnăk geh kơl an 50-60 rkeh, rnăk vâl ndrel ăp ntŭk kan bah nkuăl nơm tâm rgop êng n’hâm ndrel ma prăk gay ma ndâk ân nâp lơn:

"Êng năm aơ ri Uỷ ban Mặt trận n’gor hŏ kơl an tă bah ăp nŭih geh nuih n’hâm lŏng đah rnoh prăk lah 9 rmen, ri hŏ pă kơl an ân ăp nkuăl nkuăl ƀon têh ndrel tât rnôk aơ ri hŏ ndâk geh rlau 165 ngih kơl an. Nê lah tĭng prăk pă kơl an, hôm jêh nê ri Mặt trận mra geh ăp nau kơl an tă bah tơm prăk êng đŏng, kŏ kơt lah ăp nŭih geh nuih n’hâm lŏng, ăp rmôt kan bu geh nau dơi âk ri bu kŏ geh nau kơl an ngăn đŏng ân nŭih ach o tâm ăp nkuăl”./.

Nŭih rblang: H’Thi