VOV4.M’nông: Xã Đưng K’Nớ, nkuăl Lạc Dương n’gor Lâm Đồng geh bơi tât 95% rnoh nŭih lah nŭih rnoi K’ho. Rnơm ƀư ueh nau dăng tâm rnglăp lam rnoi mpôl, nsum n’hâm ndâk njêng ƀon lan mhe, ach o hŏ geh ntrŭt jăng, nau rêh ƀon lan geh hao jêng. Năm rlau aơ, bol ma rdâng đah srê nuh yor srê Covid-19, yơn Đưng K’Nớ hôm geh dơi ăp nkô̆ nau hun hao văng sa rêh jêng nchrăp luh, tâm nê geh dơi khlay lah geh tŏng 19/19 nkô̆ nau mpeh ndâk njêng ƀon lan mhe.

Sĭt tât Đưng K’Nớ, nkuăl Lạc Dương, n’gor Lâm Đồng tâm ăp nar bôk năm mhe, phung hên uănh ueh ngăn âk nau rgâl ngăch bah du xã nkuăl jru geh âk bri bah Vườn Quốc gia Bidup-Núi Bà. Ăp ngih kđar sat ntơm nơh rnôk aơ hŏ geh ntuh kơl ndâk njêng ueh nâp, ăp trong dak bŏk mbir bah năp nê hŏ geh tŏ bê tông, trong mpoh ang ŭnh, ngih săm ƀŭt, ngih dak si ndrel ăp ntŭk kơl an nau tâm rêh, nsum mpôl geh ntuh kơl tâm di trong...ân saơ nau rêh bah ƀon lan ta aơ hŏ rgâl mhe, hơm răm.

Nchŏng ty nchŏk trong bê tông têh bah năp lăp tâm ƀon, wa Bon Niêng Ha Đê, ta thôn K’Nớ 2, xã Đưng K’Nớ nkoch, kŏ rnơm trong hăn ueh ri ma ndoh ndơ geh leo tăch ueh, âk ntil, kônh wa mô geh bu mpet rnoh tăch kơt ntơm nơh ôh. Êng năm aơ, cà phê khlay, ntŭk tăch ueh ri ăp ngih rhơn ngăn, rvăt năp âk ntil ndơ gay ma kơl an nau kan tuch tăm ndrel nau rêh ăp nar:

‘Ntơm bah rnôk ƀư bôk nau kan ndâk njêng ƀon lan mhe, ƀon lan hên hŏ geh âk nau rgâl ngăn, nau văng sa geh hun hao, ngih vâl nâp nal, trong hăn ueh nơih. Ăp nau nê rnơm tâm Đảng ndrel Ngih dak kơl an âk ntil, ri ma ƀon lan hŏ geh âk nau ueh, nau rgâl, rnơm tâm bôk nau kan ndâk njêng ƀon lan mhe. Âk ngih ach o hŏ jêng sâm geh rvăt dơi âk ndơ gay ma dŏng, ndeh hăn, tâm nau ntuh kơl ân hun hao tuch tăm, nchuăn rdeng cà phê. Kônh wa ta aơ hŏ blau nau pah kan jan sa âk lơn, mât chăm tơm tăm ueh lơn ndrel nau rêh văng sa âk lơn rđil bah năp nê”.

Êng 980 ha neh tăm cà phê, xã Đưng K’Nớ hôm geh nau kan tăm byăp, kao ueh, tăm tơm sa play ndrel mât rong mpa. Rlau 80% rnoh rnăk n’hao nau geh rnơm geh trok n’hâm ndơn mât njrăng bri, đah rnoh tât 11.770 ha. Tâm rnôk âk ntŭk nau geh êng geh n’huch âk yor khuch bah srê Covid-19 ri Đưng K’Nớ hôm geh n’hao nau geh bôk nŭih ntơm 41-43 rkeh/năm. Rnoh rnăk ach o kŏ n’huch, rnôk aơ hôm 3,2%.

Tĭng bu ranh Rơ Ông Ha Bang, tâm thôn K’Nớ 1, nau tă geh kơt aơ lah nau nsôih bah cán bôk ndrel ƀon lan, tâm nê nau kơl an bah Đảng ndrel Ngih dak ntuh kơl mpeh ăp ding gay kơl an ƀon lan rgâl nau mĭn tâm nau kan tuch tăm ndrel nau rêh, rlet hao jêng ndâk njêng hơm răm lơn. Bu ranh Ông Ha Bang, ngơi:

‘Bah năp nơh, âk rnăk ach o ngăn, rnôk aơ hŏ n’huch âk, nau rêh văng sa bah kônh wa ri hun hao ngăn. Trong hăn, ngih dak si, ŭnh mpoh ang geh ngih dak ntuh kơl ăp, ăp ntil nau rêh bah xã hŏ geh n’hao nâp. Kônh wa ƀon lan ta aơ rhơn ngăn, tâm ban nau, tâm kơl ndrel râng âk nau ƀư ndâk njêng ƀon lan mhe, ngăn lah rnơm trong ueh, ndơ tăm bah kônh wa geh tăch khlay đŏng, ri kônh wa rhơn ngăn”.

Ntơm bah du xã ach o ngai ngăn bah nkuăl Lạc Dương, geh âk ngăn nŭih ƀon lan rnoi K’ho rêh. Jêh 8 năm ndâk njêng bôk nau kan ƀon lan mhe, tât lôch năm 2021, Đưng K’Nớ hao jêng ƀư jêh 18/18 nkô̆ nau kan. Wa Thân Văn Hữu, Bí thư Đảng uỷ, Kruanh UBND xã Đưng K’Nớ mbơh, gay đăp mpăn văng sa rêh jêng bah xã hun hao nâp, nau rêh đăp mpăn ri nau rêh jêng bah ƀon lan lŏ geh ndâk njêng ƀon lan mhe geh n’hao prêh, nkuăl dôl rgum âk nau kan kơl an ƀon lan n’hao nau geh jêng tâm ndrel du rnoh neh tuch tăm. Ndrel ma nê, nau kan hun hao ăp nau kan vay ơm ri tâm rgop nsum đah nau pâl n’aih nsum mpôl kŏ geh n’hao prêh kŏ geh kơp uănh tât:

‘Phung hên dôl ân nŭih ƀon lan đăng kí gay ma kơl an ƀon lan tăm tơm sa play ndrel lŏ ntơm geh nau tăm cà phê ntil mhe gay đăp mpăn ân ƀon lan geh prăk đăp mpăn. Phung hên dôl tâm rgop nsum ma ngih săm ƀŭt Đại Lạt gay ma ntrŭnh ƀư nau kan ndâk njêng ƀon lan mhe, kơl an nau kan, ntrơn jao nau kan ân ƀon lan tâm nau kan tuch tăm, mât rong. Phung hên kŏ tâm rgop nsum ma Vườn Quốc gia gay ma hun hao pâl n’aih nsum mpôl, pơk trong nơih ân ƀon lan tăch geh ăp ntil ndơ bah nơm njêng kơt lah tanh njuh, n’gon ndrănh yăng, hun hao pâl n’aih, n’hao nau geh jêng ân ƀon lan tâm rơh tât”.

Đah ăp nau tă dơi geh ndrel ăp nau rƀŏng trong kơt nau wa Thân Văn Hữu, Bí thư Đảng uye, Kruanh UBND xã Đưng K’Nớ mhe mbơh, rnơm lah nau rêh bah kônh wa rnoi K’ho ta aơ mra mô rlu geh hun hao kơp ntơm năm mhe aơ./.

Nŭih rblang: H’Thi