VOV4.M’nông: Bol ma nau rêh bah rnăk vâl hôm mâp âk nau jêr yơn rmôt hăn kơl an bah ăp nŭih rlu ranh, âk năm tâm nkuăl têh Ea Súp, n’gor Dak Lak geh ăp nau kan ueh ngăn tâm nau njrăng rdâng srê. Bah nau kan bah khân păng, nau tâm boh geh rgum, nau mĭn, nau nsôih njrăng rdâng srê tâm ƀon lan lơn nâp.

            Wa Đào Thị Màu, ta nkuăl têh Ea Súp, nkuăl Ea Súp, n’gor Dak Lak nkoch mbơh ma phung hên lah, bah ntŭk nkoch nau mbơh mhe, gĭt lah ƀon lan tâm nkuăl geh srê dôl ma jêr mô tŏng, rmôt kan bôk năp njrăng rdâng srê dôl mâp nau khuch. Wa nkre rgop ndơn nkre rgop n’hâm gay ma bonh đă ăp rnăk geh oi, ăp rnăk ƀư nau tăch rgâl tâm nkuăl gay ma rgop prăk, phe, ăp ntil ndơ sa gay ma kơl an leo ân ăp nŭih rnăk vâl mâp nau jêr tâm nkuăl geh nkhah, ndrel ăp nŭih aơ dôl măng nar njrăng rdâng srê. Wa Màu vay bonh đă oh kon nơm, ƀon lan nơm ƀư ueh nau ntrŭnh 5K:

            ‘Mĭn tât nau rêh rnôk ma neh dôl dôl ma geh srê ma tâm mpeh bôk năp: Nai dak si, điều dưỡng, ăp nô công an, tahen. Gâp geh du nuih n’hâm ŭch ân tay ăp nŭih nê lah dak ngêt, du thùng mì tôm mô lah dak njŭng gay ma bonh đă nuih n’hâm. Nơm mô geh ndơ ôh, nơm knŭng ŭch ƀư ân ma âk, âk lơn gay ma kơl ân ăp kon, ăp nŭih dôl ma ƀư nau kan mpeh bôk năp ân bu geh nau đăp mpăn lơn”.

            Wa Phan Ba lah cán bộ rlu rnh hŏ rlau 5 năm ma aơ. Wa Ba nkoch: “Đảng viên hăn lor- ƀon lan tĭng ba kơi”. Mô di tâm rơh ntoh srê covid-19 aơ, ma bah năp nê rmôt bu ranh hên ƀư nau kơl an tâm nkuăl Ea Súp hŏ bonh đă nau rgop kơl gay ma ndâk 2 ngih kơl an ân du rnăk mâp nau jêr tâm xã n’har bri ndrel du rnăk nŭih rnoi mpôl đê̆ tâm nkuăl têh. Ăp nar rlau aơ, wa Ba mô rvê mih, nar, măng nar leo phe, ndơ sa, dak ngêt ân ăp ntŭk bu dôl ma nkhah nŭih, ăp ntŭk dôl gŭ kâp njrăng:

            ‘Bah năp nau geh bah srê nuh tât jêr kơt aơ, ndơn saơ nau kan “Du mbâr rnôk ji ngot tâm ban ma du nklâm rnôk nơm hơm” ndri ma oh nô phung hên ƀư nau ndâk mrôt hăn kơl an. Hăn bonh đă ăp ntŭk tâm nkuăl kŏ kơt lah bah dih nkuăl gay ma kơl an ăp rnăk vâl dôl mâp nau jêr tâm nkuăl. Ndrel ăp ntŭk nkân njrăng srê tâm nkuăl n’har bri ân tât rmôt tahen tâm nkuăl ân tât ntŭk bu nkhah êng nŭih tâm nkuăl. Tă bah nê, phung hên kŏ saơ ueh tâm nuih n’hâm đŏng yor geh nau kơl an ăp nŭih ach o, ăp nŭih jêr tâm rnôk srê aơ”.

Nkuăl têh Ea Súp hŏ geh nau ƀư kan ueh tâm nau nkhah nŭih pah kan tâm nkuăl ƀon têh Hồ Chí Minh, ndrel ăp n’gor mpeh ba dâng plŏ sĭt. Nê lah 4 tât 5 rnăk njêng du rmôt, khân păng rgum tâm du ntŭk gay ma vơt oh kon nơm sĭt ndrel ma tâm nkhah srang. Rnơm ƀư nau aơ ma ăp F0 geh saơ ơm ndrel mô hôm ntưp tâm ƀon lan. Ăp nŭih bu ranh tâm nkuăl têh Ea Súp hŏ geh nau rgop ngăn tâm nau njrăng rdâng srê bah nkuăl. Wa Nguyễn Thanh Bình, Kruanh UBND nkuăl têh Ea Súp, mbơh:

‘Nô Phan Ba-ntoh măt ân rmôt nŭih âk năm deh bah nkuăl, tâm rơh rlau aơ ri vay ƀa ƀơ tâm mâp kan nsum đah gưl uỷ, n’gâng kan bah nkuăl, geh geh ăp nŭih geh nuih n’hâm, nŭih ŭch rŏng, Mhe nơh geh nau rgop nsum đah gưl uỷ n’gâng kan ƀư ngih kơl an tâm ƀon. Ngăn lah rnôk êp aơ, nô Phan Ba geh nuih n’hâm kơl an, nuih n’hâm lŏng ngăn, păng kŏ hăn rgŏ jă tay du đê̆ rnăk geh ƀư nau kan tăch rgâl bah nkuăl đah nau ŭch rŏng, drăp ndơ tât kơl an ân nkuăl gay ma bah oi ăp nau jêr bah kônh wa tâm nkuăl geh srê rơh aơ”./.

Nŭih rblang: H’Thi