VOV4.M’nông - Geh neh yơn mô dơi ndâk ƀư, mô an, mô nchăm; ngih wâl jŭr djơh, đê̆ đŏng roh đăp mpăn yơn mô dơi an nkra, ƀư mhe. Nĕ lah nău ma rhiăng rnăk ta ăp phường Trà Bá, Hội Phú, Ia Kring tâm nkual dăp rgum bah nău nchrăp ƀư nkual ƀon lan gŭ trong Nguyễn Văn Linh (nkual ƀon têh Pleiku, Gia Lai) dôl rdâng tâm âk năm bah năp. Ăp jêr jŏt, mô uĕh yor nău nchrăp ƀư n’gul gâl jêng ƀư nuĭh ƀon lan dŭt n’hâm jêr n’hanh ji nuih.

          Gŭ tâm nkual dăp rgum nău nchrăp ƀư nkual ƀon lan gŭ trong Nguyễn Văn Linh, âk năm aơ, ur sai wa Bùi Văn Năm (trong Châu Văn Liêm, Pleiku) ndrel đah ăp kon an rêh hăt nchep tâm jay cấp 4 n’hanh wăk kol ntơm bah lơ jŭr bah dâng, ntơm bah năp sĭt bah kơi. Jay jêh 21 năm dŏng lĕ âk ndơ plôk mpir. Tâm yan mih, jay dak lăp mro yor dak ntơm bah dih lăp tâm mpir; lŏ ntop tay chor tôl mbrĭng, bôl lĕ dơi ntưm 3 dăp, ntŭn si, yơn mô dơi dêr truh dak. 3 tâm 6 nuĭh kon bah wa Năm lĕ gŭ ur sŏk sai, hăn manh jay gŭ da dê yor wa mô dơi an neh, ƀư an ăp kon, bôl neh aơ hvi tât 1000 m2:

Yor nău nchrăp ƀư n’gul gâl rlău du rach năm, jêng nkual aơ lĕ jêng “rlŭk mâl” tâm nklang nkual ƀon têh yôk Pleiku

          “Nuĭh ƀon lan mpôl hên tâm nkual nău nchrăp ƀư djơh tâm nău rêh, mpôl hên ŭch an ngih dak ƀư nău nchrăp kan. Yơn ƀư ri an ƀư ndăn, gay nău rêh mpôl hên dơi đăp mpăn, mô di an kơt aơ, nău rêh bah mpôl hên dŭt njê. Yor trong hăn mô geh, bri mih hăn mbir, ngih wâl truh sat ma mô dơi nkra, ƀư mhe mô an ƀư”.

Tă jay wa Năm mô ngai, rnăk wa Quảng Văn Khiên (deh năm 1970) njê mô đêt. Mô knŭng mô dơi pă neh an 2 ŏ kon dôl manh jay gŭ, wa Khiên hôm geh ngân hàng dun nău nchăm neh gay manh ngân hàng ƀư sa yor nkô̆ nău neh geh tâm ntŭk dăp rgum. Geh neh yơn mô dơi geh ăp nău dơi dŏng, wa Khiên lĕ njuăl âk sam ƀŭt n’hanh tât âk rơh mâp nuĭh ƀon lan ăp gưl gay nkoch nău njê bah rnăk wâl nơm:

“Geh neh ma mô hun hao ngih wâl. Neh mô dơi nchăm ngân hàng, mô an tăch. Oh kon aƀaơ têh hôm, geh neh ma hăn manh jay bu. Nuĭh ƀon lan ta aơ geh âk sam ƀŭt njuăl UBND nkual ƀon têh Pleiku âk tơ̆ hôm. Mpôl hên hăn ăp rơh mâp nuĭh ƀon lan gưl n’gor, n’gor ơh nchrăp ƀư, ton tŏng ăp ntil đah ƀon lan, yơn mô dơi ƀư. Gâp dăn đă UBND n’gor Gia Lai n’hanh UBND nkual ƀon têh Pleiku lah ƀư nău nchrăp aơ ri ƀư ngăch, lah mô ƀư ri jăng lơi nău nchrăp gay nuĭh ƀon lan mpôl hên đăp mpăn nău rêh”.

Aơ lah nău rêh nsum bah rhiăng rnăk geh neh n’hanh jay geh tâm ntŭk dăp rgum nkual nchrăp ƀư nkual ƀon lan gŭ trong Nguyễn Văn Linh. Bah năp nĕ, nău nchrăp aơ dơi UBND n’gor Gia Lai uănh an n’hanh jao Công ty cổ phần Đầu tư Saigon Highland mbơh ƀư năm 2009, đah dĭng lĕ rnoh neh 94 ha. Yơn lah, tât năm 2015, ntŭk kan aơ mô dơi ƀư di nău ngăch, jêng geh sŏk lơi. Năm 2017, UBND nkual ƀon têh Pleiku dơi n’gor jao nkra rgâl di dăp rgum nău nchrăp ƀư jŭr hôm 39,7 ha ta gưl neh ăp phường Trà Bá, Hội Phú n’hanh Ia Kring. Năm 2019, UBND n’gor Gia Lai jao an tay UBND nkual ƀon têh Pleiku ƀư nău nchrăp aơ đah tơm prăk ngih dak.

Rnăk wa Khiên mô dơi nkra jay, mô dơi nchăm neh manh prăk ƀư sa yor geh tâm nkual nău nchrăp ƀư n’gul gâl

Wa Nguyễn Hữu Quế, Kruanh UBND nkual ƀon têh Pleiku an gĭt, ăp nău kan bah nkual TP dôl ƀư ăp gưl ƀư tĭng nău nchrăp tĭng gưl. Aƀaơ, n’gor lĕ geh rnoh ntop kơl trok neh n’hanh drăp ndơ ta neh tâm nkual nău nchrăp ƀư tât Hội đồng uănh năl rnoh khlay bah n’gor. Yơn lah, Wa Quế mô gĭt ndâng tât nău nchrăp ƀư na nê̆ dơi ƀư, ma knŭng lah nsrôih ƀư nău nchrăp kan tâm nar ơm ngăn.

          “Jêh rnôk dơi Hội đồng uănh năl rnoh khlay bah n’gor tâm ban ŭch, TP mbra ƀư ăp gưl tĭng di nău ntrŭnh. Mpôl hên mbra nsrôih mbơh ƀư nău nchrăp kan tâm nar ơm ngăn gay tŏng ăp nău dơi geh bah nuĭh ƀon lan tâm nkual nchrăp ƀư”.

N’hêl na nê̆, đah nău n’hŭch têh hvi nău nchrăp ƀư nkual ƀon lan gŭ trong  Nguyễn Văn Linh bah 94 ha jŭr hôm 39,7 ha, n’gor Gia Lai lĕ rklaih nkra an rhiăng rnăk ta Pleiku luh tâm nău mpŏng kâp. Hôm rhiăng rnăk êng tâm nkual nchrăp ƀư hôm e an nău “măng bĭch, năm gŭ”. Khân pơng mpŏng, “Nar ơm ngăn” ma kruanh nkual ƀon têh nkoch mbra knŭng kơp đah nar, đah khay, mô di kơp đah năm jŏ jong kơt bah năm 2009 tât aƀaơ./.

Nuĭh răk rblang: Y Sưng Phê Ja