VOV4. M’nông: Duh phang ntoch jong, tơm dak tu n'hanh ăp n'glău suăt kroh da dê jêng âk neh tăm ba puh wai ta nkuâl Chư Păh, n'gor Gia Lai geh khĭt kro. Đah ăp rnăk ƀon lan geh ba lah tơm geh wăng sa tơm, ri khay dja roh dơm.

Uănh dâng sre Ia Sah êr kro mprang lam, wa Rơ Chăm Chíu, nuĭh ƀon lan Mrông Yố 2, xã Ia Ka, nkuâl Chư Pah, dơn gĭt n'huach n'huai dơm. Khay ba puh wai dja bah rnăk hŏ roh dơm, n'hanh păng mô hŏ gĭt mhâm trong rgâl pah kan gay geh tơm wăng sa tâm let năp tay:

“Rnăk hên tăm 3 sào ba, 1 sào an nsĭt geh ntơm bah 6 tât tạ ba, ăp năm ri rnăk hôm tŏng sa đŏng. Ndrĭ yơn du năm aơ lah mô tŏng sa tâm rnôk âk nuĭh khân păng dôl rek, ba khĭt lĕ lah tă bah dak mô hôm geh du đêt, aƀaơ ngih dak hôm ntĭm nti he tâm di đah moh ntil tơm tăm lah ân tĭng ngih dak dơm"

Ngai đah lŏ bah wa Rơ Chăm Chíu mô ngai, bơi 4 sào ba bah wa Rơ Chăm Luyên, khĭt kro đŏng. Tĭng wa Luyên, aơ lah năm tâl 2 rnăk mô geh pơih mban du rnglăy ba ta dâng sre Ia Sah.

“Bar pe năm bah năp nơh hôm tŏng sa, 2 tât 3 năm aơ mô geh dak, duh phang n'hanh khĭt kro. Mpŏng n'gâng kan ta ntŭk, Đảng, Ngih dak mĭn uănh rlong neh lŏ dja ri rgâl jêng tăm moh ntil ndơ an tâm di đah nuĭh ƀon lan"

Wa Hoàng Văn Thành, Groi kruanh UBND xã Ia Ka, nkuâl Chư Pah an gĭt, âk năm aơ kônh wa Ja Rai ta xã lơn âk mât chăm du ntil tơm ba nsing tâm dak tu n'hanh dak bah ăp n'hong hoch, mô geh pă n'hoch dak bah ăp tơm dak bât. Năm aơ, kro phang ntoch jong, tơm dak suăt kroh êng jêng lơn âk neh tuch tăm ba lŏ hŏ nhop huănh lĕ. Nchih rgum bôk năp an saơ, hŏ geh rlău 70 ha ba puh wai ta xã geh khuch khat hô mô lah roh dơm, đah bơi 200 rnăk ƀon lan geh tât khuch, lơn âk lah ta ƀon Mrông Yố 1 n'hanh 2. Wa Hoàng Văn Thành, rvê, lah gưl bah lơ mô ơm ntĭm nti, ƀư an nuĭh ƀon lan rgâl dăp rgum tơm tăm, lơh khuch khat tuch tăm khay puh wai mbra hôm geh tay tâm ăp năm tât đŏng:

“Nkhêp geh nar aơ dăn đă gưl geh nău dơi kan geh trong nkra ntop kơl du gâl prăk kan an kônh wa plơ̆ nău kan tuch tăm tay. Tĭng nău nchroh ri ăp năm tât nklăp mbra geh duh phang tay, UBND ăp xã mbra kan nsum đah ăp nhih pah kan gưl bah lơ ri n'gâng kan xã mbra kan nsum lhăt đah kônh wa ƀon lan gay ntĭm nti an kônh wa tăm ăp ntil tơm tăm glêh nar tâm di đah dăp rgum si tăm tâm di đah trôk nar neh ntu tâm khay wai kro phang bah ăp năm tât tay đŏng".

Wa Trần Đắc Thắng, Groi kruanh Jrô kan tuch tăm mât rong n'hanh Hun hao ƀon lan nkuâl Chư Pah an gĭt, nhih pah kan hŏ ƀư ôp uănh tay ăp tŏng lam lĕ rngôch rnoh neh tuch tăm khay puh wai ta nkuâl. Khay puh wai năm aơ, lam nkuâl tăm rlău 1700ha ba geh kro phang n'hanh roh dơm. Gay nkra nkô̆ nău mpeh tơm tăm, lơn lah tơm ba dôl mâp kro phang, wa Trần Đắc Thắng, an gĭt:

“Jrô kan tuch tăm mât rong n'hanh Hun hao ƀon lan kan nsum lhăt đah Ntŭk rgum rhŏ dŏng tuch tăm mât rong tâm ban kơt UBND ăp xã tĭng ƀư n'hanh ôp uănh tay ăp tŏng lam lĕ rngôch rnoh neh tăm khay puh wai lơn lah đah tơm ba. Dơn n'glăp tăm ăp ntŭk neh đăp mpăn tŏng ăp tơm dak tŏ dơm, đah ăp nkual neh geh kro phang ri njrăng đă nuĭh ƀon lan rgâl si tăm tâm di gay duh phang mô khuch tât nuĭh ƀon lan".

Nuĭh rblang: Điểu Thân