VOV4.M’nông: Rnơm geh nau ntrŭnh bonh đă nau hun hao điện măt nar tĭng nau ntrŭnh mrô 13/200/QĐ-TTg bah Thủ tướng Chính phủ, knŭng tâm du năm, nau geh bah prăk điện bah Gia Lai hao rlau 600 MWP. Gia Lai uănh aơ lah nau geh dơi kơp dơn mpeh nau kan ntuh kơl điện tâm n’gor. Yơn lah, rgop tâm nau dơi aơ, mô geh đê| nŭih, ntŭk kan hŏ nklă êng ăp nau kan rlăm, ntŭk nkra rlăm gay ma nkra điện, đah rnoh geh lah 1.943 prăk/kwh tâm 20 năm tĭng nau ntrŭnh 13/2020.

Bol ma geh nthoi ndrel tă bah jŏ geh nau kơl an rvăt rnoh điện thuk tâm trong điện mặt nar chor ngih tĭng nau ntrŭnh mrô 13/2020/QĐ-TTg lơ 6/4/2020 bah Thủ tướng Chính phủ, yơn tât nklang khay 3/2021, mpeh ba dâng bah ăp trong điện măt nar tâm ƀon Kte, xã Hbông, nkuăl Chư Sê, n’gor Gia Lai hôm knŭng lah pih. Ndrel ma nê, tâm neh lah lah n’gâng loih geh drăp chor ngih ndrel ma rhiăng tấn blah quang điện ba lơ. Nŭih geh manh ân uănh ta aơ mbơh, ntơm rnôk geh ndâk ndrel ma nthoi tât rnôk aơ, neh aơ hôm lơi dơm, ê tă geh tăm tơm si mô lah rong mpa ôh.

Nau ngăn mô geh kan, yơn hôm nkra săm ƀŭt ndrel ndâk ntŭk gay ma ân geh rnoh prăk điện thụ ân Điện chor ngih tĭng nau ntrŭnh mrô 13 bah Thủ tướng Chính phủ dôl lah nau geh nsum bah âk nau kan tâm ăp nkuăl Cư Sê, Chư Pưh, Chư Prông, Đức Cơ, Phú Thiện, n’gor Gia Lai. Wa Hồ Minh Hậu, Kruanh Jrâu kan văng sa gung trong nkuăl Chư Sê mbơh, nklang năm 2020, rnôk mhe knŭng geh 13 nau kan geh nkra tâm nkuăl, jrâu kan hŏ ndâk rmôt hăn mêt uănh nau kan ngăn bah ăp ntŭk điện mặt nar. Kan mêt uănh mhe geh n’gul trong ri geh đă nsrŭng lơi. Wa Hậu mbơh, 5/7 nau kan geh uănh kŏ geh nau mbơh pah kan tuch tăm mât rong, mô lah ƀư nau kan công nghệ prêh. Yơn lah, nau ngăn ri mô geh ôh, ma ƀư điện mơ lah nau ngăn:

  ‘Răk tâm săm ƀŭt lah geh nau ŭch tăm sêt, tăm tơm dak si ri ngăn lah điện chor ngih da dê. Uănh ri geh tăm tơm đinh lăng, yơn tăm kơt nê gay ma rdâng dơm, kơt lah tăm sêt, lăp uănh ngăn ri saơ du ntrong ngih geh 3 trong sêt, du trong tâm ƀah 2 mét. MÔ lah yông êp n’gâng dră, gay ma rdâng ma phung bu hănmêt uănh, uănh lĕ geh tât 10 tât 20% nau kan, hôm e lah lơi dơm”.

Du nau kan ntuh kơl điện chor ngih tâm neh tuch tăm mbơh, nau ntrŭnh 13/2020/QĐ-TTg geh nau bonh đă nau hun hao điện mặt nar. Tĭng nau kan aơ, ăp bôk nau kan điện mặt nar chor ngih geh rvăt dah rnoh âk ngăn lah 8,38 UScent/kW (tâm ban ma 1.943/kW), khay lơn ăp nau kan điện mặt nar êng. Yơn lah, tĭng nau ntrŭnh 7088/BCT-ĐL lơ 22/9/2020 mpeh nau mbơh ntĭm ntuh kơl điện mặt nar chor ngih bah N’gâng kan công thương ntrŭnh đah nau geh kơl an tăch bah chính phủt lah ăp trong điện geh ƀư tâm ăp nau kan ndâk nkra (tĭng Luật ndâk nkra năm 2014) ndrel ntŭk aơ dôl geh dŏng tâm di nau kan, nau dơi. Tĭng nŭih aơ, yor nau geh jêng âk bah nau ntuh kơl, yor ri ma ntŭk kan tăch rgâl bu joi trong der rdâng ma ntŭk mât nau kan:

  ‘Âk nŭih rdâng tât rnoh rong geh prăm prao mlâm djăr. Geh rmôt kan bu uănh ri lah djăr mhe khĭt yor srê. Hôm ŭch rong moh ntil ri ân geh ntŭk tăch, geh ntuh kơl, geh ntŭk tăch. Nkoch ngăn lah bu knŭng ƀư rdâng dơm, ypơn ân tŏng dơi 100% mô lah rklaih nau kan dŏng neh ri bu mô dơi ƀư ôh”.

Rnôk aơ, n’gor Gia Lai geh nklăp 3248 trong pă điện măt nar, rnoh dăng 604 MWp. Tâm nê geh 400 ntrong pă điện tâm ntŭk kan công nghiệp, ntŭk tuch tăm, mât rong prêh mghe, đah rnoh dăng rlau 400 MWP. Yơn lah, ân tât rnôk aơ, nau kan điện măt nar chor ngih dôl geh kơl an tĭng nau ntrŭnh 13 bah Thủ tướng Chính phủ, knŭng geh ăp nkuăl ndrel ntŭk kan mât mpeh săm ƀŭt. Ndrel ma nê, ăp rmôt kan geh tât ê geh nau tâm rgop ngăn. Wa Trần Ngọc Phận, Groi Kruanh UBND nkuăl Đức Cơ, ngơi:

 ‘ Năm 2020, nkuăl Đức Cơ nsing tâm nau dŏng neh ân nau ntrơn 20 ha neh tucgh tăm jêng tăm tơm tăm jŏ năm êng, tâm ban ma nau ntrŭnh nê gay ăp nŭih ntuh kơl tuch tăm nau kan prệh mhe tâm rnoh neh geh rgâl. Nŭih ntuh kơl tuch tăm tơm dak si, sêt. Kan pă tăch rgâl điện ri nkuăl mô pă săm ƀŭt ân kan, ma nsing tâm Công ty Điện lực Gia Lai”.

Nkuăl lah rjăp knŭng geh nau ân dơi dŏng neh, hôm nau kan tuch tăm, tăch rgâl điện lah nau kan bah ntŭk kan tăch rgâl ndrel ntŭk kan điện. Yơn wa Võ Ngọc Quý, Groi giám đốc Công ty điện lực Gia Lai mbơh, kan uănh nau tơm ntuh kơl geh nau tăm ngăn đŏng lah mô, nau kan geh tŏng tĭng nau ntrŭnh Luật ndâk nkra 2014 kơt N’gâng kan Công thương đă đŏng lạh mô ri nsing tâm rmôt kan:

  ‘Nŭih ntuh kơl ân geh pah kan đah n’gâng kan Ngih dak mât mpeh nau ndâk gay ma uănh năl nau kan ndâk njêng. Công ty điện lực Gia Lai knŭng ƀư uănh năl nau nâp tĭng nau kan đah trong điện măt nar chor ngih. Rnôk ŭch nau kan rgop prăk điện ei ăp tơm ntuh kơl ân geh mbơh ăp nau ntrŭnh ân tâm di pháp luật. Điện lực uănh tâm săm ƀŭt nŭih ntuh kơl mbơh, hôm uănh năl ri mpeh nau ndâk njêng ri công ty điện mô geh nau dơi’.

Wa Phạm Văn Bình, groi Giám đốc Sở công thương Gia Lai mbơh, UBND n’gor jao ân ntŭk kan công thương mât nau ƀư nau kan mêt uănh nau kan ngăn bah ăp nau kan điện măt nar tâm nkuăl. Nau kan aơ geh ntrŭnh tâm dŭt khay 3 ndrel khay 4 năm aơ./.

            Nŭih rblang: H’Thi