VOV4.M’nông: Ăp nkuăl bah n’gor Gia Lai dôl ma nsôih ntrŭt dăng nau kan nkoch trêng tât ăp thôn ƀon tâm nkuăl jru, ngai, kơl kônh wa ăp rnoi mpôl gĭt kloh mpeh nau dơi ndrel nau kan bah nơm tâm nau săch kan tăch tât.

            Wa Nguyễn Đăng Chung, Kruanh UBND xã, Groi Kruanh Uỷ ban săch kan xã Đông, nkuăl Kbang, n’gor Gia Lai mbơh, nkuăl dôl ma kơp, nchih lir moh săk cử tri, nkre ma nkoch mbơh nau nkoch trêng gay ma đăp mpăn tât dĭng lĕ cử tri kŏ gĭt da dê ndrel ƀư tĭng ueh nau dơi bah nơm:

             ‘Tât rnôk aơ mpeh nau nchrăp nau kan ân nar săch kan ntoh măt quốc hội gưl XV ndrel ntơ măt HĐND ăp gưl năm kan 2021-2026 ri phung hên ƀư đăp mpăn nau nâp ueh nau kan. Nau nchih moh săk cử tri ri phung hên hŏ geh nau ntrŭnh ntĭm rđau ân công an xã ƀư tơm ndrel ƀư đah ăp thôn, tât rnôk aơ ri tâm xã hŏ geh rnoh moh săk bah cử tri ndrel phung hên dôl ma jao ân ăp thôn gay ma kơp uănh đăp mpăn ân tŏng ăp ndrel đăp mpăn nau dơi bah cử tri tâm nkuăl”.

            Đah xã Đăk Talay, nkuăl Mang Yang, geh rlau 80% rnoh nŭih kah rnoi Bahnar, 2 nar du tŏ, cán bộ xã ncho ndeh hon đa, leo loa nkoch mbơh nau hăn ndrel pă ăp ntil săm ƀŭt gay ma nkoch mbơh ân ƀon lan. N’ha săm ƀŭt nkoch mbơh nau mpeh săch kan kŏ kơt lah băng mbơh nau geh ngơi ma 2 nau rnoi Bahnar ndrel nau yoăn gay ma ăp nŭih nơih gĭt. Nô Đinh Gôn-cán bộ xã Đăk Talay, mbơh:

             ‘Kônh wa ta aơ ri hăn kan tă bah ơm, tât kêng măng 5-6 mông mơ sĭt. Nau vay ri phung hên hăn nkoch mbơh nau ma loa ntơm 5 mông gay ma kônh wa geh dơi nau gĭt tăng âk. Nkoch mbơh nau ma rnoi nơm đŏng. Phung hên nkoch mbơh nau kơt nê ri mơ kônh wa gĭt, ndơn năl kloh nau ngơi bah rnoi nơm”.

            Wa Đinh Đình Chi, Giám đốc ntŭk kan văn hoá nkoch mbơh nau nkuăl Kbang mbơh, đah nạu geh bơi tât 46% rnoh nŭih bah nkuăl lah nŭih rnoi mpôl đê̆, nau kan nkoch trêng ân ăp nŭih aơ đah âk ntrong, tâm di đah nau vay bah rnoi mpôl. Du ding đŏng lah nau nkoch trêng mpeh nau săch kan bah trong loa nkoch mbơh nau tâm dâng, măt êng đah nau kan hănh nkoch mbơh tât ăp ntŭk ma săm ƀŭt:

             ‘Đah nkô̆ nau ndrel nau ntĭm bah Rnâng kan tuyên giáo kŏ kơt lah ƀư nau nkoch trêng bah uỷ ban săch kan, ri ntŭk kan dôl ma kẻ, nchih, in, nkra ndrel ntrŭnh in luh jêng rplay tâm nkuăl, nkuăl tâm nklang ntŭk kan. Tât rnôk aơ ri nau kan nkoch trêng, bonh đă, mbơh nau đah rup gui kŏ geh ntrŭnh ƀư tâm 300m2 pa nô, áp phích. Ndâk ăp nau kan, nkô̆ rƀŏng tât săch kan, Rmôt kan hăn nkoch mbơh nau geh ndâk ƀư đah âk nau kan, nkra njêng ăp nau nkoch mbơh, nkô̆ nau ueh, uănh năl geh ăp ntŭk rgum âk nŭih gay ma nkoch trêng”.

            Kan nkoch trêng mpeh nau săch kan ta Gia Lai geh âk ntil ngăn, nkoch mbơh đah ăp ntŭk, ăp ntil, uănh rjăp nau nkoch mbơh ma mbung. N’hao nau kan nkoch mbơh tâm nkuăl rnoi mpôl đê̆ tâm ntuưk đah nau ngơi rnoi Jrai, Bahnar…Wa Phạm Thị Lan, Groi Kruanh Uỷ ban MTTQ Việt Nam n’gor Gia Lai mbơh nau săk tam bah rmôt kan nŭih “nkoch trêng ma mbung” hŏ saơ kloh tâm ăp ntŭk jru, ngai:

             ‘Ngăn lah ăp nŭih geh bu rnơm ntoh lư, ăp bu ranh ƀon, kruanh ƀon mbơh nkoch ma nau ngơi rnoi nơm, nau ngơi bah nkuăl kơt lah Jrai, Bahnar gay ma nkoch mbơh ăp nau tât nuih n’hâm nsum tât đah ƀon lan. Bah nau nkoch mbơh kơt aơ ri âk ngăn kônh wa ngăn lah nŭih rnoi mpôl đê̆ bu kŏ geh nau mĭn, nau gĭt, nau dŏng n’ha phiếu bah nơm gay ma săch luh ăp nŭih geh tŏng ăp nau ueh, nau kan, nau dơi gay ma râng ntơh măt HĐND ăp gưl”.

            Nar săch kan Quốc hội gưl XV ndrel HĐND ăp gưl năm kan 2021-2026 dôl ma dăch tât. Cử tri ăp rnoi mpôl tâm n’gor Gia Lai dôl ma kâp vơt nar rgum têh./.

  Nŭih rblang: H'Thi