VOV4.M’nông - Nău mbơh n’gor Gia Lai nkoch trong nchrăp dăn rgâl rlău 8000ha neh bri hon êng ta xă n’har bri Ia Mơr, nkuăl Chư Prông rgâl neh tuch tăm gay ƀư nkual tŏ an ndơ dak bât Ia Mơr lĕ ƀư phah bri sŏk neh tuch tăm bah nuĭh ƀon lan ta ntŭk hao na nao. Nău aơ ƀư trong kan mât uănh, njrăng bri ta nkual aơ ơm lĕ jêr jŏt, aƀaơ hôm lơ jêr âk tơ̆.

          Knŭng tâm măng 15/4, rlău 3.300 mét vuông bri ta lô 1, khoảnh 1, tiểu khu 1001, neh bri Ban mât uănh bri rchăng n’gang phŭt sial Ia Mơr (nkuăl Chư Prông), tă bah trong rbông me dak bât Ia Mơr mhe jêh nklăp 100 mét trong sŏng, lĕ geh su kloh. N’gâng si lĕ kăt djôt sĭt, n’gâng si hôm e nsŭk ŭnh, ŭnh sa. Uănh nđôi ta ntŭk, wa Nguyễn Tuấn Anh, Groi Kruanh UBND xă Ia Mơr, an gĭt, aơ lah trong phah bri gay rŭn in neh tuch tăm. Aƀaơ, knŭng kơp êng xă Ia Mơr, nuĭh ƀon lan geh tât 500 ha bri nkra njêng geh tâm srah bri hon êng tĭng kơt ntô kla. N’hêl na nê̆, nău rŭn in bri geh bah jŏ n’hanh na nao bah năm aơ rlău năm êng.

Rlău 3 sào bri tă ta rbông dak me dak bât Ia Mơr geh su phah tâm 1 măng

“Đah trong ƀư, ri khân pơng mbra in đêt in đêt, tĭng yan. Bôk năp trah, lôk ntô gay an si khĭt, jêh nĕ tăm điều gay yan tât lah tâm điều hao”.

 Wa Đinh Văn Khẩn, Kruanh Ban mât uănh bri Ia Mơr, ntŭk kan geh bơi 4000/8000 ha bri hon êng dôl dơi mbơh an Quốc hội an rgâl neh tuch tăm gay ƀư nkual tŏ an dak bât Ia Mơr an gĭt, bah dŭt năm 2020 tât aƀaơ, nu nău rŭn in bri geh dŭt hô. Tĭng nĕ, khay 1, nuĭh tơm bri saơ 4 tơ̆, geh dĭng lĕ rnoh neh rlău 5 sào, yơn tât dŭt khay 3, dĭng lĕ tơ̆ lah 29, đah dĭng lĕ rnoh neh bơi 4 ha. Nĕ lah kơp êng ăp tơ̆ dơi năl nuĭh tih. Hôm rnoh neh bri mô jêt êng lĕ geh rŭn in yơn mô dơi năl nuĭh, nuĭh phah mbra dun rlơn rmôt mât njrăng bri rnôk gĭt saơ.

“Oh nô hăn tâm măng, lah saơ, ma rmôt đêt nuĭh ri bu nsrŭt môp put măt, luh saơ măt, djôt yêh sreh oh nô. Lah rmôt âk ri bu nchoăt tâm bri du, he mô dơi năl nuĭh. Aƀaơ, oh nô tâm ban knŭng rlu du nar tâm pơh, tâm ndơn rlu”.

Âk nkual bri ta Gia Lai geh phah na nao

Wa Phạm Vũ Tú, Groi Kruanh UBND nkuăl Chư Prông an gĭt, ta nkual 8000 ha bri hon êng dôl dơi ƀon lan mbơh an Quốc hội an rgâl neh tuch tăm ƀư nkual tŏ bah dak bât Ia Mơr, aƀaơ geh 2 nuĭh tơm bri n’hanh du ntŭk mât uănh. Bah dŭt năm 2020 tât aƀaơ, nkuăl lĕ ndâk njêng tay n’hanh mât na nao nău kan bah 5 rmôt pah kan ăp nău kan, geh tahen n’har bri, công an, kiểm lâm tâm rgop đah nuĭh tơm bri n’hanh n’gâng kan ƀon lan, ƀư uănh nđôi. Yơn lah, aơ knŭng trong mkra bôk năp, n’hanh jêr dơi nking n’gang jêh nău bri geh rŭn in:

“Ăp rmôt pah kan ƀư ăp ntŭk kâp ta ăp ntŭk khlay, yơn ntŭk geh roh bri âk. 2 ban mât uănh bri lah nuĭh tơm bri, ăp xă geh bri an nsrôih tâm nău mât uănh, njrăng bri. Đah nău mĭn, mpôl hên nsrôih tâm nău mât bri, yơn pơng dŭt jêr jŏt”.

Rnôk neh bri mô dơi rgâl, bri Ia Mơr lĕ geh rŭn in lêng lang. Aƀaơ lah mô dơi geh trong mkra nking n’gang tam, ri mô knŭng rnoh neh bri dôl dăn rgâl, ma geh n’ăp nkual bri têh hvi ta nkual n’har bri aơ mbra geh rgâl jêng mir.

Nuĭh răk rblang: Y Sưng Phê Ja