VOV4.M’nông - Nău ntrŭnh ntrŭt nsôr hun hao ŭnh điện măt nar bah Thủ tướng Chính phủ ta Nău ntrŭnh 13/2020/QĐ-TTg lah nău ntrŭnh di gay đăp mpăn rnă njrăng điện ngih dak. N’hêl na nê̆ ta Gia Lai, rnôk mbơh ƀư ngăn nău ntrŭnh aơ, yơn lah đah nău âk doanh nghiệp nklah nău nchrăp ƀư lŏ mir gay dơi geh rnoh tăch điện khlay ngăn kơt dŏng an điện măt nar ntă chor, ri hôm nău rmeh âk nkôp đah nău ŭch điện dôl ƀư hang rhiăng doanh nghiệp ntuh kơl nău kan aơ geh koh n’hŭch (jêng lah mô rwăt điện) tâm pleh. Nău aơ lĕ geh bah bôk năm 2021 tât aƀaơ, n’hanh mô hŏ gĭt dâng tât mư lôch, ƀư nuĭh ntuh kơl rvê yor roh âk prăk n’hanh mô nchrăp lor tăch rgâl.

         Wa Võ Ngọc Qúy, Groi Kruanh Điện lực Gia Lai kơp dơn, nău kan điện lĕ nchroh geh nău rmeh tâm năm 2020, rnôk ƀư tâm ton bôk năp đah doanh nghiệp. Yor nê, 70/463 nuĭh ntuh kơl tâm ton ntŭk nthoi dŭt năm 2020 an ký ton tay ntop đah nău ŭch geh nset điện lah geh âk ir, kơt du nău nkol gay dơi nău kan điện an nthoi n’hanh ký tâm ton tăch rwăt điện. Tâm nĕ, geh 35 ntŭk kan dơi đă nglăp tay ndoh ndơ gay điện lực ƀư pơk điện, nset điện bah ngai tâm nău ndăn.

         N’hêl na nê̆ aƀaơ, dĭng lĕ công suất bah ăp nău nchrăp ƀư điện măt nar ntă chor ta Gia Lai lah rlău 603 MWp, âk rlău 2 tơ̆ nău ŭch phụ tải điện bah n’gor lah 300 MWp. Nău aơ ntop tay nău kơp hao jêng phụ tải điện nklăp 10%/năm bah nău kan điện tih nkôp đah nău ngăn, ƀư nău pă điện lĕ rmeh, aƀaơ hôm rmeh lơn.

         “Ta rnôk boăt nthoi, tĭng mĭn kơp bah nău kan điện trong điện dơi chrai công xuất nuĭh ntuh kơl. Yơn lah, nău khuch bah Covid-19, ngăch hao jêng điện mô kơt nău mĭn lah 9 tât 10%/năm, yơn n’hêl na nê̆ knŭng hao 1 tât 2%. Kơt nĕ hôm 70 tât 80% rmêh n’hanh an ntrôl hao trong điện, jêng tât rmeh n’hanh âk ir tĭng ntŭk trong điện. Rmôt 1 lĕ tâm nău kơp mĭn lah rmen jêng khân pơng ton, khân pơng trok dơm. Nĕ lah nău mô lap tâm ntuh kơl, ri nuĭh ntuh kơl an tâm pă đah nău kan điện dơm”.

Wa Trần Thị Diễm, nŭih tơm bah trong sre điện măt nar ntă chor ndrung wang công suất 1MWp ta xă Chư Hậu, nkuăl Ia Grai, Gia Lai an gĭt, bah khay 1/2021 tât aƀaơ, rĭng du pơh, trong điện 1MWp bah wa geh nset điện du nar, ƀư roh nău prăk nklăp 50 rkeh/khay. Wa Diễm an gĭt: gay ntuh kơl geh trong sre điện aơ, wa sŏk rnoh prăk 15 rmen prăk, tâm nĕ manh ngân hàng 10 rmen prăk. Tĭng kơp mĭn bôk năp, lah trong rse dŏng lĕ công suất, ri bah kơi 7 năm mbra sŏk lĕ prăk ƀư. Yơn lah, nu nău nset ntlơi ƀa ƀơ bah điện lực aƀaơ dôl ơư trong nchrăp tăch rgâl bah wa geh jêr jŏt:

“Gâp saơ mpŭng lir tơm điện, khuch nău geh doanh ngiệp. Aƀaơ, tĭng nar tâm pă bah Điện lực Gia Lai, ri rĭng mpôl hên nset 4 tât 6 nar/khay, khuch tât nău geh  prăk khay bah mpôl hên âk rkeh prăk, ƀư mbrơi ngăch trok prăk ngân hàng, mô nchrăp ăp prăk kaih”.

N’hêl na nê̆, aƀaơ, lĕ rngôch 463 trong điện măt nar ntă chor ndrung wang ta Gia Lai geh nset ntlơi điện tĭng 2 ntil lah ndal n’hanh tĭng trong nchrăp dơi mbơh lor. Tĭng nĕ, ăp ntŭk kan lĕ dơi đă nglăp ndơ nset, pơk bah ngai mbra geh nset ndal, rnôk geh rmeh điện, âk ir tĭng ntŭk. Hôm ăp trong êng mbra geh nset bah 4 tât 10 nar/khay. Nău dôl lah tay nău nset nthlơi way geh ta n’gul nar, rnôk măt nar duh ngăn, rnôk ăp trong điện aơ an rnoh điện luh âk ngăn. Du ntŭk ndrung wang ntuh kơl 15 rmen prăk ƀư bơi 1MWp điện măt nar ntă chor ta nkuăl Ia Grai, bôl mô ký ton nset ntlơi, yơn hôm e ƀa ƀơ geh nset điện an gĭt:

“Rĭng du nar geh nset điện lah roh 8 rkeh prăk, khay sŏk tay prăk jŏ. Ta nău rwăt tăch ndrel ri mô tâm ban. Yor nuĭh ntuh kơl bah nău mô mĭn na nê̆ mĭn nău geh bah nơm lŏ jêng nuĭh mô nchrăp yor nkra njêng geh ding nĕ điện ma mô gĭt mbra tăch ndâng geh ri na nê̆ ăp nău mkra mô geh kloh”.

Wa Phạm Văn Binh, Kruanh N’gâng kan Công thương Gia Lai an gĭt, n’gor geh rnoh duh nar âk n’hanh geh ntung trong ndơ̆ điện tâm di hun hao măt nar. Yơn lah, an tât rnôk geh nău ntrŭnh ntrŭt nsôr ta nău ntrŭnh 13/2020 ri ăp nuĭh ntuh kơl mư tĭng rjăp. Tâm năm 2020, bah tơm prăk ngân hàng rbăn rmen prăk bah ăp nuĭh ntuh kơl, nău kan điện lĕ geh tay rnoh ntop điện tâm ban đah công suất bah Thủy điện Ialy.

Yơn lah, n’hêl na nê̆ aƀaơ, nău điện lực tâm ton boăt nthoi uh ah, ƀư tơm điện rmeh âk tơ̆ nkôp đah nău ŭch ntop tay jêng tât nău nset ntlơi dôl ƀư mpŭng lir tơm ŭnh nar kloh uĕh n’hanh mpŭng lir têh tơm prăk bah nuĭh ntuh kơl. Uănh tâm nău tâm boh tăch rgâl, đah nău ƀư lah ntŭk kan du hê dơi rwăt điện, yơn lŏ ký boăt nthoi ân âk ir nău nchrăp ƀư, jêng rlău nău ŭch dŭt âk, ri na nê̆ EVN dôl geh du nău tăch rwăt ma knŭng săk nơm geh sa, ntrôl nău mô uĕh n’hanh geh nău mô nchrăp an ăp nuĭh ntuh kơl, an khân pơng lăp nchrat măt đah điện măt nar./.

Nuĭh răk rblang: Y Sưng Phê Ja